ନୂଆଦିଲ୍ଲୀ,୬।୯ : ଭାରତର ରାଜଧାନୀ ଦିଲ୍ଲୀରେ ଜି-୨୦ ଶିଖର ସମ୍ମିଳନୀ ହେବାକୁ ଯାଉଛି। ସମ୍ମିଳନୀ ୯ ଏବଂ ୧୦ ସେପ୍ଟେମ୍ବରରେ ରାଜଧାନୀ ନୂଆଦିଲ୍ଲୀର ପ୍ରଗତି ମଇଦାନରେ ଅନୁଷ୍ଠିତ ହେବ। ଏହି ସମ୍ମିଳନୀରେ ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନାକଙ୍କ ସମେତ ୩୦ରୁ ଅଧିକ ଦେଶର ପ୍ରତିନିଧୀ ଅଂଶଗ୍ରହଣ କରୁଛନ୍ତି। ଏହା ସହିତ ୧୦ ହଜାରରୁ ଅଧିକ ବିଦେଶୀ ଅତିଥି ଏହି ସମ୍ମିଳନୀରେ ଯୋଗଦେବାର କାର୍ଯ୍ୟକ୍ରମ ରହିଛି। ଶିଖର ସମ୍ମିଳନୀରେ ଅତିଥିମାନେ ଯେଭଳି କୌଣସି ସମସ୍ୟାର ସମ୍ମୁଖୀନ ନ ହେବେ ସେ ନେଇ ଭାରତ ସରକାର କିଛି ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି।
ଟ୍ରେନ, ମେଟ୍ରୋ ସେବା ଏବଂ ବସ ଉପରେ ସରକାର କିଛି ପ୍ରତିବନ୍ଧକ ଲଗାଇଛନ୍ତି। ଏହା ସହିତ ଅନଲାଇନ ପ୍ଲାଟଫର୍ମ ପାଇଁ ପରାମର୍ଶଦାତା ମଧ୍ୟ ଜାରି କରାଯାଇଛି । ଅତିଥିମାନଙ୍କ ରହିବା ସ୍ଥାନ ଏବଂ ହୋଟେଲ ନିକଟରେ ସାଧାରଣ ଲୋକଙ୍କ ଗତିବିଧି ଉପରେ ପ୍ରତିବନ୍ଧକ ଲଗାଯାଇଛି। କେବଳ ଏତିକି ନୁହେଁ, ଡେଲିଭରି ବୟଙ୍କ ଉପରେ ସରକାର ମଧ୍ୟ କିଛି ପ୍ରତିବନ୍ଧକ ଲଗାଇଛନ୍ତି। ଯେଉଁଥିପାଇଁ ସେପ୍ଟେମ୍ବର ୮ ରୁ ସେପ୍ଟେମ୍ବର ୧୦ ତିନି ଦିନ ପର୍ଯ୍ୟନ୍ତ ସମସ୍ତ ପ୍ରକାର ବାଣିଜି୍ୟକ ବିତରଣ ସେବା ବ୍ୟାହତ ହେବ। ଦିଲ୍ଲୀରେ ସ୍ବିଗି, ଜୋମାଟୋ ଆମାଜନ, ଜେପ୍ଟୋ, ଫ୍ଲିପକାର୍ଟ ସମେତ ରାଜଧାନୀ ଅଞ୍ଚଳରେ ଥିବା ସମସ୍ତ ବ୍ୟବସାୟିକ ବିତରଣ ଏବଂ କ୍ଲାଉଡ କିଚେନ ସେପ୍ଟେମ୍ବର ୯ ରୁ ୧୧ପର୍ଯ୍ୟନ୍ତ ବନ୍ଦ ରହିବ।
ଏ ସମ୍ପର୍କରେ ସୂଚନା ଦେଇ ଦିଲ୍ଲୀର ସ୍ବତନ୍ତ୍ର ପୋଲିସ କମିଶନର (ଟ୍ରାଫିକ) ଏସ.ଏସ ଯାଦବ କହିଛନ୍ତି କ୍ଲାଉଡ କିଚେନ ଏବଂ ଖାଦ୍ୟ ବଣ୍ଟନ ସେବାକୁ ଅନୁମତି ଦିଆଯାଇପାରିବ ନାହିଁ। ଏହା ସହିତ ଆମାଜନ ଏବଂ ଫ୍ଲିପକାର୍ଟ ପରି ବିତରଣ କମ୍ପାନୀଗୁଡ଼ିକୁ ମଧ୍ୟ ଏକ ସୀମିତ ଅଞ୍ଚଳରେ କାର୍ଯ୍ୟ କରିବାକୁ ଅନୁମତି ଦିଆଯିବ ନାହିଁ। ତେବେ ଜରୁରୀକାଳୀନ ସେବା ଜାରି ରହିବ।