ଫ୍ଲୋରେନ୍ସ, ୩୦ା୫- ଇଟାଲିଆନ ଗ୍ରାଁ ପ୍ରି ଇଭେଣ୍ଟର ମୋଟୋ-୩ କ୍ୱାଲିଫାଇଂ ରେସ୍ବେଳେ ଦୁର୍ଘଟଣା ଯୋଗୁ ଚାଲିଯାଇଛି ସୁଇଜରଲାଣ୍ଡର ୧୯ ବର୍ଷୀୟ ବାଇକ୍ ରାଇଡର ଜାସନ ଡୁପାସ୍କ୍ବିଅର୍ଙ୍କ ଜୀବନ। ଏଥିଲାଗି ମୋଟୋଜିପି ପକ୍ଷରୁ ଦୁଃଖ ପ୍ରକାଶ କରାଯାଇଛି।
ଶନିବାର ଯୋଗ୍ୟତାପର୍ଯ୍ୟାୟ ରେସ୍ ଶେଷ ଆଡ଼କୁ ଆୟୁମୁ ସାସାକି ଓ ଜେରେମି ଆଲ୍କୋବାଙ୍କ ସହ ଜାସନଙ୍କ ଧକ୍କା ହୋଇଥିଲା। ତୁରନ୍ତ ରେସ୍କୁ ରୋକି ଦିଆଯାଇଥିଲା। ଡୁପାସ୍କ୍ବିଅର୍ଙ୍କ ଉପରେ ଦୁଇଟି ବାଇକ୍ ଚଢ଼ିଯାଇଥିଲା। ହେଲିକପ୍ଟରରେ ଫ୍ଲୋରେନ୍ସସ୍ଥିତ କାରେଗି ହସ୍ପିଟାଲ ନିଆଯିବା ପୂର୍ବରୁ ଟ୍ରାକ୍ ଉପରେ ତାଙ୍କର ଚିକିତ୍ସା କରାଯାଇଥିଲା। ରବିବାର ଚିକିତ୍ସାଧୀନ ଥିବାବେଳେ ତାଙ୍କର ମୃତ୍ୟୁ ଘଟିଥିବା ହସ୍ପିଟାଲ କର୍ତ୍ତୃପକ୍ଷ ଘୋଷଣା କରିଛନ୍ତି।