ଡେଲାଙ୍ଗ,୧୪।୫(ଡି.ଏନ୍.ଏ.):ଡେଲାଙ୍ଗ ଷ୍ଟେଶନ ବଜାର ଉପରେ ସ୍ଥାନୀୟ ୭ଟି ପଞ୍ଚାୟତରୁ ଊର୍ଦ୍ଧ୍ୱ ଲୋକ ନିର୍ଭର କରୁଥିବାବେଳେ ବଜାର ଏବେ ନିଶାଡ଼ି ଓ ବାଇକ୍ ଚୋରଙ୍କ ଆଡାସ୍ଥଳୀ ପାଲଟିଛି। ସନ୍ଧ୍ୟା ହେଲେ ବଜାରକୁ ଆଲୋକୀକରଣ କରିବାକୁ ଥିବା ହାଇମାଷ୍ଟ ଲାଇଟ୍ ଆଜକୁ ଦୀର୍ଘ ୨ବର୍ଷ ହେବ ଜଳୁନି। ଫଳରେ ନିଶାଡ଼ି ଓ ଗାଡି ଚୋର ଅନ୍ଧାରରେ ଆଡ୍ଡା ଜମାଇବା ସହିତ ସାଧାରଣ ଲୋକଙ୍କ ବାଇକ୍ ଲୁଟୁଛନ୍ତି। ଗତ ଫନୀ ବାତ୍ୟା ପରେ ବିଦ୍ୟୁତ୍ ଖୁଣ୍ଟଗୁଡ଼ିକ ସଜଡ଼ା ଯାଇ ଆଲୋକୀକରଣ ପାଇଁ ୩୦ଟି ହାଇମାଷ୍ଟ ଲାଇଟ୍ର ବ୍ୟବସ୍ଥା ହୋଇଥିଲା। ସେଥିମଧ୍ୟରୁ ଏବେ ମାତ୍ର ୧୩ଟା ଜଳୁଛି। ବଜାର ଅନ୍ଧାରରେ ରହୁଥିବାରୁ ରାତିରେ ଚୋର ଓ ନିଶାଡ଼ିଙ୍କ ପ୍ରାଦୁର୍ଭାବ ବଢୁଥିବାରୁ ଦୋକାନ ଛାଡ଼ି ଘରକୁ ଯିବାକୁ ଦୋକାନୀ ଭୟ କରୁଛନ୍ତି। ଚୋରି ହେବା ଭୟରେ ଅସହ୍ୟ ଗୁଳୁଗୁଳିରେ ବାଧ୍ୟ ହୋଇ ଦୋକାନ ଭିତରେ ଶୋଉଛନ୍ତି। ୧୯୬୦ ମସିହା ପୂର୍ବରୁ ୬ ଗୋଟି ଦୋକାନକୁ ନେଇ ଗଢି ଉଠିଥିବା ଡେଲାଙ୍ଗ ବଜାରର ମାନଚିତ୍ର ସମ୍ପୂର୍ଣ୍ଣ ବଦଳି ଯାଇଥିଲେ ମଧ୍ୟ ଅଦ୍ୟାବଧି ତାର ସାଧାରଣ ସମସ୍ୟା ବଦଳି ପାରିନି। ବର୍ତ୍ତମାନ ବଜାରରେ ୨୬୦ ଦୋକାନରେ ରହିଛି। ଭାରତୀ ବିହାରଠାରୁ ଆରମ୍ଭ କରି ବେରବୋଇ ବଜାର ଓ ଡେଲାଙ୍ଗ ଷ୍ଟେଶନ ଛକଠାରୁ ଆରମ୍ଭ କରି ରାଧାକାନ୍ତ ବିଦ୍ୟାପୀଠ ପର୍ଯ୍ୟନ୍ତ ବିସ୍ତୃତ ବଜାରରେ ଆଲୋକୀକରଣ ବ୍ୟବସ୍ଥା ନ ଥିବାରୁ ବଜାର ଆସିବାକୁ ସ୍ଥାନୀୟ ବାସିନ୍ଦା ନା ପସନ୍ଦ କରୁଛନ୍ତି। ହାଇମାଷ୍ଟ ଲାଇଟ୍ଗୁଡ଼ିକ ୨ବର୍ଷ ହେବ ଅକାମି ହୋଇ ପଡ଼ିଥିଲେ ମଧ୍ୟ ଏହାର ମରାମତି ନିମନ୍ତେ ପ୍ରଶାସନ ଚିନ୍ତା କରୁନି ବୋଲି ସ୍ଥାନୀୟ ଲୋକେ କହିଛନ୍ତି। ଏନେଇ ରେଞ୍ଚ ପଞ୍ଚାୟତର ସରପଞ୍ଚ ହରିହର ସ୍ବାଇଁଙ୍କୁ ପଚାରିବାରେ, ଲାଇଟ୍ଗୁଡ଼ିକ ମରାମତି କରିବାକୁ ଫଣ୍ଡ ନାହିଁ। ବିଗତ ଗ୍ରାମସଭା ମିଟିଂରେ ଏଥିପାଇଁ ଆଲୋଚନା ହୋଇଛି। ସ୍ଥାନୀୟ ପ୍ରଶାସନ ଏହି ସମସ୍ୟାକୁ ଯଥାଶୀଘ୍ର ସମାଧାନ କରିବାକୁ ବ୍ୟବସାୟୀ ଓ ଜନସାଧାରଣ ନିବେଦନ କରିଛନ୍ତି। ଅନ୍ୟପଟେ ପୋଲିସ ପକ୍ଷରୁ ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରିବାକୁ ଦୋକାନୀ ଦାବି କରିଛନ୍ତି।