ଧୁଲେ, ୨୮।୪ : ମହାରାଷ୍ଟ୍ରର ଧୁଲେ ଜିଲାରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଛି। ଧୁଲେରେ ଏକ ସ୍କୋର୍ପିଓରୁ ୮୯ଟି ଖଣ୍ଡା ଏବଂ ଗୋଟିଏ ଛୁରୀ ଜବତ କରାଯାଇଛି। କୁହାଯାଉଛି ଯେ ଏସବୁ ରାଜସ୍ଥାନର ଚିତ୍ତରଗଡରୁ ଆସୁଥିଲା ଏବଂ ଏହାକୁ ମହାରାଷ୍ଟ୍ରର ଜାଲନାକୁ ନିଆଯାଇଥାନ୍ତା।
ଆସନ୍ତା କିଛି ଦିନ ମଧ୍ୟରେ ଜାଲନା ନିକଟ ଔରଙ୍ଗାବାଦରେ ମହାରାଷ୍ଟ୍ର ନବନିର୍ମାନ ସେନା ମୁଖ୍ୟ ରାଜ ଠାକରେଙ୍କ ଏକ ସାଧାରଣ ସଭା ହେବାକୁ ଯାଉଛି। ରାଜ୍ ଏବେ ଲାଉଡ ସ୍ପିକର ବିବାଦକୁ ନେଇ ବେଶ୍ ଚର୍ଚ୍ଚାରେ ରହିଛନ୍ତି।
ସୂଚନାନୁସାରେ, ରାଜସ୍ଥାନରୁ ମହାରାଷ୍ଟ୍ରକୁ ଏକ ବଡ଼ ଧରଣର ଅସ୍ତ୍ରଶସ୍ତ୍ର ଆସୁଥିବା ସମ୍ପର୍କରେ ଧୁଲେ ପୋଲିସ ଗୁପ୍ତ ସୂଚନା ପାଇଥିଲା। ସୂଚନା ପାଇବା ମାତ୍ରେ ଧୁଲେ ପୋଲିସ ସମସ୍ତ ପ୍ରସ୍ତୁତି କରି ୪ ଜଣ ଅଭିଯୁକ୍ତଙ୍କୁ ଅସ୍ତ୍ରଶସ୍ତ୍ର ସହ ଧରିଥିଲା।
ମୁମ୍ବାଇ-ଆଗ୍ରା ରାଜପଥରେ ଥିବା ସୋନଗୀର ଗ୍ରାମ ନିକଟରୁ ଧୁଲେ ପୋଲିସ ଏହାକୁ ଜବତ କରିଛି। ଧୁଲେ ଏସପି ପ୍ରବୀଣ ପାଟିଲ କହିଛନ୍ତି ଯେ ଜାଲନା ଅଭିମୁଖେ ଯାଉଥିବା ସ୍କୋର୍ପିଓ କାରରୁ ପୋଲିସ ଏସବୁକୁ ଜବତ କରିଛି। ଏହା ସହିତ ୪ ଜଣଙ୍କୁ ମଧ୍ୟ ଗିରଫ କରାଯାଇଛି। ଆଇପିସି ଏବଂ ଆର୍ମସ ଆକ୍ଟ ଅନୁଯାୟୀ ପୋଲିସ ଏହି ଚାରିଜଣଙ୍କ ବିରୋଧରେ ମାମଲା ରୁଜୁ କରିଛି।
ତେବେ ଏସବୁକୁ ରାଜସ୍ଥାନରୁ ମହାରାଷ୍ଟ୍ରକୁ ଏତେ ପରିମାଣରେ କାହିଁକି ଅଣାଯାଉଥିଲା, ତାହା ଏପର୍ଯ୍ୟନ୍ତ ରହସ୍ୟ ଘେରରେ ରହିଛି। ତଦନ୍ତ ଜାରି ରହିଛି। ଗିରଫ ୋହାଇଥିବା ଅଭିଯୁକ୍ତଙ୍କୁ ପଚରାଉଚରା କରାଯାଉଛି। ମହାରାଷ୍ଟ୍ରରେ ଲାଉଡ ସ୍ପିକର ଏବଂ ହନୁମାନ ଚାଳିସା ପାଠ ବିବାଦକୁ ନେଇ ରାଜନୀତି ଜାରି ରହିଛି। ଏହା ଦ୍ୱାରା ସାମାଜିକ ସୌହାର୍ଦ୍ଦ୍ୟର ବ୍ୟାଘାତ ହେବାର ଆଶଙ୍କା ରହିଛି। ଏଭଳି ପରିସ୍ଥିତିରେ ଏତେ ପରିମାଣର ଖଣ୍ଡା ଜବତ ହେବା ପୋଲିସ ପାଇଁ ଏକ ଚ୍ୟାଲେଞ୍ଜ ପାଲଟିଛି। କିଏ ଏସବୁକୁ ଆଣୁଥିଲା ଏବଂ କାହିଁକି ି ପୋଲିସ ଏବେ ତାହାର ଖୋଳତାଡ଼ ଆରମ୍ଭ କରିଛି।