ଭୁବନେଶ୍ବର, ୨୫ା୭(ବ୍ୟୁରୋ): ଓଡ଼ିଆ ଝିଅ ଦ୍ରୌପଦୀ ମୁର୍ମୁ ଦେଶର ୧୫ତମ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି। ତାଙ୍କର ବିଜୟ ପରେ ସାରା ଦେଶରେ ଖୁସିର ମାହୋଲ ଦେଖିବାକୁ ମିଳିଥିବା ବେଳେ ଓଡ଼ିଶାର ବିଭିନ୍ନ ସ୍ଥାନରେ ବିଜୟ ଉତ୍ସବ ପାଳନ କରାଯାଇଥିବା ଦେଖିବାକୁ ମିଳିଛି। ଭାଜପା ପକ୍ଷରୁ ମଧ୍ୟ ଅନେକ ସ୍ଥାନରେ ବର୍ତ୍ତମାନ ସୁଦ୍ଧା ବିଜୟ ଉତ୍ସବ ପାଳନ ଚାଲିଛି। ସୋମବାର ମୁର୍ମୁଙ୍କ ଶପଥ ଉତ୍ସବ କାର୍ଯ୍ୟକ୍ରମ ଥିବାବେଳେ ଓଡ଼ିଶାରୁ ନେତା, ମନ୍ତ୍ରୀଙ୍କଠାରୁ ଆରମ୍ଭ କରି ସାଧାରଣ ଲୋକ ଯେଉଁମାନଙ୍କୁ ନିମନ୍ତ୍ରଣ ପତ୍ର ମିଳିଛି ସମସ୍ତେ ଦିଲ୍ଲୀ ଗସ୍ତ କରିସାରିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି କାର୍ଯ୍ୟକ୍ରମରେ ଯୋଗଦେବା ଲାଗି ନୂଆଦିଲ୍ଲୀ ଯାଇଛନ୍ତି। ସେହିପରି ରାଜ୍ୟପାଳ ଗଣେଶୀ ଲାଲ୍ ମଧ୍ୟ ଦିଲ୍ଲୀ ଗସ୍ତରେ ଅଛନ୍ତି। ଅନ୍ୟପଟେ ନବୀନ ରବିବାର ନିଜ ଏମ୍ପିମାନଙ୍କ ସହିତ ଯାଇ ମୁର୍ମୁଙ୍କୁ ଶୁଭେଚ୍ଛା ଜଣାଇଛନ୍ତି। ସୂଚନା ମୁତାବକ ନବୀନଙ୍କ ସମେତ ସମସ୍ତ ଏମ୍ପିଙ୍କୁ ଶପଥ ଉତ୍ସବରେ ସାମିଲ ହେବା ଲାଗି ନିମନ୍ତ୍ରଣ ପତ୍ର ମିଳିଥିବା ରାଜ୍ୟ ସଭା ଏମ୍ପି ସୁଲତା ଦେଓ କହିଛନ୍ତି। ସେହିପରି ଭାଜପାର ମଧ୍ୟ ସମସ୍ତ ଏମ୍ପିଙ୍କ ସମେତ ଓଡ଼ିଶାର ୩ କେନ୍ଦ୍ରମନ୍ତ୍ରୀ, ମୟୂରଭଞ୍ଜର ୬ଜଣ ଭାଜପା ବିଧାୟକ ଉପସ୍ଥିତ ରହିବେ। ତେବେ ରାଷ୍ଟ୍ରପତିଙ୍କ ଶପଥ ଉତ୍ସବ କାର୍ଯ୍ୟକ୍ରମରେ ଯୋଗଦେବା ଲାଗି ମୟୂରଭଞ୍ଜ ଜିଲାର ଆହୁରି କିଛି ଲୋକଙ୍କୁ ନିମନ୍ତ୍ରଣ ମିଳିଛି। ସେମାନଙ୍କ ମଧ୍ୟରେ ମୁର୍ମୁଙ୍କ ଜଣେ ବନ୍ଧୁ ଏବଂ ସମ୍ପର୍କୀୟ ରହିଛନ୍ତି। ଅନ୍ୟ କେତେଜଣ ନିମନ୍ତ୍ରଣ ନ ପାଇବା ସତ୍ତ୍ୱେ ଦିଲ୍ଲୀଠାରେ ଡେରା ପକାଇଥିବା ଜଣାପଡିଛି।