ଭୁବନେଶ୍ୱର, ୧୫।୧(କ୍ରୀଡ଼ା ପ୍ରତିନିଧି)-
ଚଳିତ ସୟଦ ମୁସ୍ତାକ ଅଲୀ ଟ୍ରଫି ଟି୨୦ ପ୍ରତିଯୋଗିତାରେ ଓଡ଼ିଶା କ୍ରମାଗତ ତୃତୀୟ ପରାଜୟ ବରଣ କରିଛି। କୋଲକାତାର ଇଡେନ ଗାର୍ଡେନରେ ଗୁରୁବାର ଅନୁଷ୍ଠିତ ମ୍ୟାଚରେ ଓଡ଼ିଶା ୮ ଉଇକେଟରେ ତାମିଲନାଡ଼ୁଠାରୁ ପରାଜିତ ହୋଇଛି। ଓଡ଼ିଶା ପକ୍ଷରୁ ଧାର୍ଯ୍ୟ ୧୩୩ ରନ ବିଜୟ ଲକ୍ଷ୍ୟର ପିଛା କରି ତାମିଲନାଡ଼ୁ ୧୫.୧ ଓଭରରେ ମାତ୍ର ୨ ଉଇକେଟ ହରାଇ ୧୩୬ ରନ ସଂଗ୍ରହ କରି ନେଇଥିଲା। ପୂର୍ବରୁ ଓଡ଼ିଶା ଏହାର ପ୍ରଥମ ୨ ମ୍ୟାଚରେ ବେଙ୍ଗଲଠାରୁ ୯ ଉଇକେଟରେ ଏବଂ ହାଇଦ୍ରାବାଦ ନିକଟରୁ ୬ ରନରେ ପରାସ୍ତ ହୋଇଥିଲା। ଏଲିଟ୍ ଗ୍ରୁପ ‘ବି’ରେ ସ୍ଥାନ ପାଇଥିବା ଓଡ଼ିଶା ୩ ମ୍ୟାଚରୁ ୩ ପରାଜୟ ଲଭିଥିବାରୁ ପଏଣ୍ଟ ଖାତା ଖୋଲି ପାରିନାହିଁ। ଅନ୍ୟପକ୍ଷରେ ତାମିଲନାଡ଼ୁ ୩ ମ୍ୟାଚରୁ ୩ ବିଜୟ ସହ ୧୨ ପଏଣ୍ଟ ପାଇ ଏହି ଗ୍ରୁପରେ ଶୀର୍ଷସ୍ଥାନ ଅଧିକାର କରିଛି। ଓଡ଼ିଶା ଆସନ୍ତା ୧୬ ତାରିଖରେ ଝାଡ଼ଖଣ୍ଡକୁ ଭେଟିବ।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଓଡ଼ିଶା କୌଣସି ବ୍ୟାଟ୍ସମ୍ୟାନ ପ୍ରତିପକ୍ଷ ବୋଲରଙ୍କୁ ସଫଳ ମୁକାବିଲା କରି ନ ପାରିବାରୁ ବଡ଼ ସ୍କୋର ଆଶା ମଉଳି ଯାଇଥିଲା। ଦଳ ଓପନିଂ ଯୋଡ଼ିରେ ୨୦ ବଲ୍ରୁ ୩୪ ରନ କରି ଭଲ ଆରମ୍ଭ କରିଥିଲେ ହେଁ ପରେ ଦିଗହରା ପ୍ରଦର୍ଶନ କରିଥିଲା। ଦୁଇ ଓପନର ଗୌରବ ଚୌଧୁରୀ ୧୯ ଓ ରାଜେଶ ଧୂପର ୨୨ ରନ କରିଥିବାବେଳେ ମିଡିଲ ଅର୍ଡରରେ ଶୁଭ୍ରାଂଶୁ ସେନାପତି ୨୦ ଏବଂ ଲୋୟର ଅର୍ଡରରେ ସୂର୍ଯ୍ୟକାନ୍ତ ପ୍ରଧାନ ସର୍ବାଧିକ ୨୩ (୧୦ ବଲ୍, ୧ ଚୌକା, ୨ ଛକା) ରନ କରିବାକୁ ସକ୍ଷମ ହୋଇଥିଲେ। ଟୁର୍ନାମେଣ୍ଟରେ ଶୁଭ୍ରାଂଶୁଙ୍କ ସ୍ଥାନରେ ପ୍ରଥମଥରପାଇଁ ଅଧିନାୟକ ଦାୟିତ୍ୱ ତୁଲାଇଥିବା ବିପ୍ଳବ ସାମନ୍ତରାୟ ମାତ୍ର ୭ ରନ କରି ପାରିଥିଲେ। ବିପକ୍ଷ ଦଳର ମୁରୁଗାନ ଅଶ୍ୱିନ ୩ଟି, ଅଶ୍ୱିନ କ୍ରିଷ୍ଟ ଓ ଏମ୍. ମହମ୍ମଦ ୨ଟି ଲେଖାଏ ଏବଂ ସନ୍ଦୀପ ଓ୍ବାରିୟର ଓ ସାଇ କିଶୋର ଗୋଟିଏ ଲେଖାଏ ଉଇକେଟ ନେଇଥିଲେ। ତାମିଲନାଡ଼ୁ ଓପନିଂ ଯୋଡ଼ିରେ ୩୯ ବଲ୍ରୁ ୫୬ ରନ ସଂଗ୍ରହ କରି ବିଜୟ ପାଇଁ ପ୍ଲାଟ୍ଫର୍ମ ପ୍ରସ୍ତୁତ କରି ଦେଇଥିଲା। ହରି ନିଶାନ୍ତ ୨୨ ବଲ୍ରୁ ୨୯ ଓ ଅର୍ଦ୍ଧଶତକ ହାସଲକାରୀ ନାରାୟଣ ଜଗଦୀଶ ୩୮ ବଲ୍ରୁ ୬୧(୪ ଚୌକା, ୪ ଛକା) ରନକରି ଆଉଟ ହୋଇଥିଲେ। ପରେ ଅରୁଣ କାର୍ତ୍ତିକ ୨୮ ଓ ଶାହରୁଖ ଖାଁ ୧୮ ରନରେ ଅପରାଜିତ ରହି ଦଳକୁ ଜିତାଇଥିଲେ। ଓଡ଼ିଶା ବୋଲରଙ୍କ ମଧ୍ୟରେ ପପୁ ରାୟ ଓ ଅଙ୍କିତ ଯାଦବ ଗୋଟିଏ ଲେଖାଏ ଉଇକେଟ ପାଇଥିଲେ।
ସଂକ୍ଷିପ୍ତ ସ୍କୋର
ଓଡ଼ିଶା ୨୦ ଓଭରରେ ୧୩୨/୯(ସୂର୍ଯ୍ୟକାନ୍ତ-୨୩, ଧୂପର-୨୨, ଅଶ୍ୱିନ-୩/୧୬, ମହମ୍ମଦ-୨/୩୦, କ୍ରିଷ୍ଟ-୨/୩୪, ଓ୍ବାରିୟର-୧/୩୪, ସାଇ-୧/୧୨)। ତାମିଲନାଡ଼ୁ ୧୫.୧ ଓଭରରେ ୧୩୬/୨(ଜଗଦୀଶନ-୬୧, ନିଶାନ୍ତ-୨୯, କାର୍ତ୍ତିକ-୨୮*, ପପୁ-୧/୩୨, ଅଙ୍କିତ-୧/୧୭)।
