ଭୁବନେଶ୍ୱର, ୭।୮(ବ୍ୟୁରୋ): ଲୟୋଲା ସ୍କୁଲ ପରିସରରେ ଶନିବାର ଷଷ୍ଠ ବାର୍ଷିକ ପ୍ରଦର୍ଶନୀ ସିନର୍ଜୀ -୨୦୨୨ ଅନୁଷ୍ଠିତ ହୋଇଯାଇଛି। ଦୁଇ ବର୍ଷ ପରେ ନିଜ ଲୁକ୍କାୟିତ ପ୍ରତିଭାର ପ୍ରଦର୍ଶନ କରିବା ପାଇଁ ସୁଯୋଗ ମିଳିଥିବାରୁ ଛାତ୍ରୀଛାତ୍ରଙ୍କ ମଧ୍ୟରେ ଉତ୍ସାହ ଓ ଉଦ୍ଦୀପନା ଦେଖିବାକୁ ମିଳିଥିଲା। ଏହି ପ୍ରଦର୍ଶନୀକୁ ବିଦ୍ୟାଳୟର ଅଧ୍ୟକ୍ଷ ଫାଦର ଭିକ୍ଟର ଏଫ୍. ମିସ୍କୁଇଥ ଉଦ୍ଘାଟନ କରି ଛାତ୍ରୀଛାତ୍ରଙ୍କୁ ଉତ୍ସାହିତ କରିବା ସହ କେତେକ ପରାମର୍ଶ ଦେଇଥିଲେ। ପିଲାଙ୍କ ସୃଜନଶୀଳତା ଓ ଅନ୍ତର୍ନିହିତ ପ୍ରତିଭାର ବିକାଶ ସାଧନ ପାଇଁ ସିନର୍ଜି ଏକ ପ୍ରକୃଷ୍ଠ ମାଧ୍ୟମ ବୋଲି ସେ ମତବ୍ୟକ୍ତ କରିଥିଲେ।
ପ୍ରଥମରୁ ଦ୍ୱାଦଶ ଶ୍ରେଣୀ ଛାତ୍ରୀଛାତ୍ର ନିଜେ ପ୍ରସ୍ତୁତ କରିଥିବା ବିଭିନ୍ନ ମଡେଲ, ପ୍ରକଳ୍ପ ପ୍ରଦର୍ଶିତ ହୋଇଥିଲା। ପିଲାଙ୍କ ଦ୍ୱାରା ବିଭିନ୍ନ ସଚେତନାମୂଳକ କାର୍ଯ୍ୟକ୍ରମ, ପରିବେଶ, ବିଜ୍ଞାନ ଓ କଳାକୌଶଳର ବିକାଶ ସମ୍ବନ୍ଧୀୟ ବିଭିନ୍ନ ତଥ୍ୟ ନିଆରା ଥିଲା। ହାତ ତିଆରି ରୋବର୍ଟ ଥିଲା ପ୍ରଦର୍ଶନୀର ଅନ୍ୟତମ ଆକର୍ଷଣ। ବିଦ୍ୟାଳୟର ଉଦୀୟମାନ ବାଳିକା ବାଳକଙ୍କ ଉଚ୍ଚକୋଟୀର ଚିନ୍ତାଧାରାକୁ ଦର୍ଶକ ଓ ଅତିଥିମାନେ ପ୍ରଶଂସା କରିଥିଲେ।
