୨୦୨୧ ଜାନୁଆରୀରେ ଅଷ୍ଟ୍ରେଲିଆ ମାଟିରେ କଙ୍ଗାରୁକୁ ଧୂଳି ଚଟାଇଥିବା ଭାରତୀୟ ଦଳର ଐତିହାସିକ ବିଜୟ ହୋଇଥିଲା। ଭାରତର ଏହି ବିଜୟ ପରେ ଦଳର ୬ ଯୁବ ଖେଳାଳିଙ୍କୁ ମହିନ୍ଦ୍ରା କମ୍ପାନୀ ‘ମହିନ୍ଦ୍ରା ଥର ୟୁଏସ୍ଭି’ ଦେବ ବୋଲି ପ୍ରତିଜ୍ଞା କରିଥିଲା। ଏବେ କମ୍ପାନୀ ତାର କଥାରଖି ଭାରତୀୟ ଦଳର ପେସ୍ ବୋଲର ଟି ନଟରାଜନ ଏବଂ ଶାର୍ଦ୍ଦୁଳ ଠାକୁରଙ୍କୁ ଏହି କାର ଉପହାର ରୂପେ ଦେଇଛି। ନଟରାଜନ ଏବଂ ଶାର୍ଦ୍ଦୁଳ ନିଜର ସୋସିଆଲ ମିଡିଆରେ ଗାଡିର ଫଟୋ ଶେୟାରକରି ଏହି ସୂଚନା ଦେଇଛନ୍ତି।
ନଟରାଜନ କାରସହ ନିଜର ଏକ ଫଟୋ ଶେୟାର କରି ଲେଖିଛନ୍ତି, ଭାରତ ପାଇଁ କ୍ରିକେଟ ଖେଳିବା ହେଉଛି ମୋ ଜୀବନର ସବୁଠାରୁ ବଡ଼ ସମ୍ମାନ। ମୁଁ ବର୍ତ୍ତମାନ ଯେଉଁଠାରେ ପହଞ୍ଚିଛି ସେଥିପାଇଁ ବହୁତ କଷ୍ଟ କରିବାକୁ ପଡ଼ିଛି। କିନ୍ତୁ ଯେଉଁ ଭଲପାଇବା ମୋତେ ମିଳିଛି ତାହା ଅଭିଭୂତ କରିଦେଇଛି। ଆହୁରି ମଧ୍ୟ ସେ ଲେଖିଛନ୍ତି, ଆଜି ମୁଁ ଏସ୍ୟୁଭି ଥର୍ ଗାଡିଚଲାଇ ଘରକୁ ଆଣିଛି।
କାର ବଦଳରେ ନଟରାଜନ ମହିନ୍ଦ୍ରା କମ୍ପାନୀକୁ ଅଷ୍ଟ୍ରେଲିଆ ବିପକ୍ଷରେ ଗାବା ଟେଷ୍ଟରେ ପିନ୍ଧିଥିବା ନିଜ ଜର୍ସିରେ ସାଇନ୍ କରି ରିଟର୍ନ ଉପହାର ଦେଇଛନ୍ତି। କ୍ରିକେଟ ପ୍ରତି ଆପଣଙ୍କ ଭଲପାଇବା ଦେଖି ଗାବା ଟେଷ୍ଟର ଜର୍ସି ଆପଣଙ୍କୁ ଉପହାର ଦେଇଛି ବୋଲି ଲେଖିଛନ୍ତି। ଏଥିପାଇଁ ଆନନ୍ଦ ମହିନ୍ଦ୍ରାଙ୍କୁ ଧନ୍ୟବାଦ ମଧ୍ୟ ଜଣାଇଛନ୍ତି।
ସେହିପରି ଶାର୍ଦ୍ଦୁଳ ମଧ୍ୟ କାର ସହ ନିଜର ଏକ ଫଟୋ ଶେୟାର କରି ଧନ୍ୟବାଦ ଜଣାଇଛନ୍ତି।