ନୂଆଦିଲ୍ଲୀ, ୨୩।୮ : ମହାପୁରୁଷ ମହମ୍ମଦଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଥିବା ମାମଲାରେ ଭାରତୀୟ ଜନତା ପାର୍ଟି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଦଳ ତେଲେଙ୍ଗାନା ବିଧାୟକ ଟି ରାଜା ସିଂଙ୍କୁ ନିଲମ୍ବିତ କରିଛି। ଏହା ସହିତ ତାଙ୍କୁ ଏକ କାରଣ ଦର୍ଶାଅ ନୋଟିସ ମଧ୍ୟ ଜାରି କରାଯାଇଛି। ରାଜା ସିଂଙ୍କୁ ୧୦ ଦିନ ମଧ୍ୟରେ ଏହାର ଜବାବ ଦେବାକୁ ଦଦଳ ପକ୍ଷରୁ କୁହାଯାଇଛି। ଏହା ବ୍ୟତୀତ ତାଙ୍କ ବିରୋଧରେ ଏକ ତଦନ୍ତ ଆରମ୍ଭ ହୋଇଛି।
ନିକଟରେ ରାଜା ସିଂ ସୋସିଆଲ ମିଡିଆରେ ଏକ ଭିଡିଓ ଅପଲୋଡ କରିଥିଲେ। ଭିଡିଓରେ ସେ ମହାପୁରୁଷ ମହମ୍ମଦଙ୍କ ବିରୋଧରେ ମନ୍ତବ୍ୟ ଦେଇଥିବା ଅଭିଯୋଗ ହୋଇଥିଲା। ଏହା ପରେ ସୋମବାର ବିଳମ୍ବିତ ରାତିରେ ଶହ ଶହ ଲୋକ ହାଇଦ୍ରାବାଦ ରାସ୍ତାରେ ପ୍ରଦର୍ଶନ କରି ତାଙ୍କୁ ଗିରଫ କରିବାକୁ ଦାବି କରିଥିଲେ। ବିକ୍ଷୋଭ ପ୍ରଦର୍ଶନକୁ ଦେଖି ପୋଲିସ ମଙ୍ଗଳବାର ସକାଳେ ଧାର୍ମିକ ଭାବନାକୁ ନେଇ ଲୋକଙ୍କ ମଧ୍ୟରେ ଉତ୍ତେଜନା ସୃଷ୍ଟି କରିଥିବା ଅଭିଯୋଗରେ ତାଙ୍କୁ ଗିରଫ କରିଥିଲା।
ଛଅ ମିନିଟ ତିରିଶ ସେକେଣ୍ଡର ଏହି ଭିଡିଓ ରାଜା ସିଂ ବିବାଦୀୟ ହାସ୍ୟ ଅଭିନେତା ମୁନୱାର ଫାରୁକିଙ୍କୁ ଟାର୍ଗେଟ କରି ମନ୍ତବ୍ୟ ଦେଇଛନ୍ତି। ସେ କହିଛନ୍ତି, ଜଣେ ହାସ୍ୟ ଅଭିନେତା ଅଛନ୍ତି ଯିଏ ଥାର୍ଡ କ୍ଳୂାସ୍ର କମେଡି କରନ୍ତି। ସେ ହିନ୍ଦୁ, ଭାଜପାର ବରିଷ୍ଠ ଅଧିକାରୀମାନଙ୍କୁ ଟାର୍ଗେଟ କରନ୍ତି। ଭଗବାନ ରାମଚନ୍ଦ୍ର ଏବଂ ସୀତା ମାତାଙ୍କ ବିଷୟରେ ଅପମାନଜନକ ଶବ୍ଦ ମଧ୍ୟ କୁହନ୍ତି।
ଏହି ଭିଡିଓରେ ରାଜା ସିଂ ମହାପୁରୁଷ ମହମ୍ମଦଙ୍କ ବିରୋଧରେ ଅପମାନଜନକ ମନ୍ତବ୍ୟ ମଧ୍ୟ ଦେଇଥିବା ଅଭିଯୋଗ ହୋଇଛି। ସେ ଭିଡିଓରେ କହୁଛନ୍ତି, ଯିଏ ଯେଉଁ ଭାଷାରେ କୁହନ୍ତି ତାଙ୍କୁ ରାଜା ସିଂ ସେଭଳି ଭାଷାରେ ଉତ୍ତର ଦେବ। ମୋର ଏପରି ଉଦ୍ଦେଶ୍ୟ ନଥିଲା, କିନ୍ତୁ ଏହାର କାରଣ ହେଉଛି ଯେ ଜଣେ ବ୍ୟକ୍ତି ମୋର ରାମ ଏବଂ ସୀତା ମାତା ବିଷୟରେ ଅପମାନଜନକ କଥା କହି ଆମ ଭଗବାନ ଉପରେ କମେଡି କରିଥିଲେ। ସେଥିପାଇଁ ମୁଁ ଏଭଳି କମେଡି କରିବାକୁ ବାଧ୍ୟ ହେଲି। ଏହାର ବିଚାର ଆପଣ କରନ୍ତୁ ବୋଲି ରାଜା ଭିଡ଼ିଓରେ କହିଥିଲେ।