କଲୋମ୍ବୋ, ୯।୯: ସାରା ବିଶ୍ୱରେ ଟି୨୦ କ୍ରିକେଟ୍ର ଲୋକପ୍ରିୟତା ପରେ ଏବେ ଟି୧୦ କ୍ରିକେଟ୍ ଆରମ୍ଭ ହେବାକୁ ଯାଉଛି। ଶ୍ରୀଲଙ୍କା କ୍ରିକେଟ୍ ବୋର୍ଡ (ଏସ୍ଏଲ୍ସି) ଡିସେମ୍ବରରେ କ୍ରିକେଟ୍ର ସବୁଠାରୁ ଏହି ଛୋଟିଆ ଫର୍ମାଟ୍କୁ ନେଇ ଟୁର୍ନାମେଣ୍ଟ ଆୟୋଜନ କରିବାକୁ ଲକ୍ଷ୍ୟ ରଖିଛି। କିନ୍ତୁ ଏଥିପୂର୍ବରୁ ନଭେମ୍ବରରେ ଏସ୍ଏଲ୍ସି ଲଙ୍କା ପ୍ରିମିୟର ଲିଗ୍ ଆୟୋଜନ କରିବ। ରିପୋର୍ଟ ମୁତାବକ ଶ୍ରୀଲଙ୍କା କ୍ରିକେଟ୍ର କାର୍ଯ୍ୟନିର୍ବାହୀ ସମିତି ଟି୧୦ ଟୁର୍ନାମେଣ୍ଟ ଆୟୋଜନ ଲାଗି ମଞ୍ଜୁରୀ ପ୍ରଦାନ କରିସାରିଛି। ଏସ୍ଏଲ୍ସି ମୁଖ୍ୟାଳୟରେ ଅନୁଷ୍ଠିତ ବୈଠକରେ କାର୍ଯ୍ୟନିର୍ବାହୀ ସମିତି ଚଳିତ ବର୍ଷ ଡିସେମ୍ବରରେ ଟି୧୦ ଟୁର୍ନାମେଣ୍ଟ ଆୟୋଜନ କରିବାକୁ ଅନୁମତି ଦେଇଛି। ଏହି ଟୁର୍ନାମେଣ୍ଟରେ ୮ ଦଳ ଅଂଶଗ୍ରହଣ କରିବେ। ସେହିଭଳି ପ୍ରତି ଦଳରେ ୬ଜଣ ବିଦେଶୀ ଖେଳାଳି ଭାଗ ନେଇପାରିବେ ବୋଲି ଜଣାପଡ଼ିଛି।