ବିଶାଖାପଟ୍ଟନମ,୨୩ା୧୧(ପି.ଟି.): ବିଶ୍ୱକପ ଫାଇନାଲ ପରାଜୟର ଗ୍ଲାନି ମଧ୍ୟରେ ଆରମ୍ଭ ହେବାକୁ ଯାଉଛି ଅଷ୍ଟ୍ରେଲିଆ ବିପକ୍ଷ ଟି୨୦ ସିରିଜ୍। ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜର ପ୍ରଥମ ମ୍ୟାଚ୍ ବିଶାଖାପଟ୍ଟନମରେ ଖେଳାଯିବ। ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଆହତ ହୋଇ ଅନୁପସ୍ଥିତ ଥିବା ବେଳେ ସୂର୍ଯ୍ୟକୁମାର ଯାଦବ ଭାରତୀୟ ଦଳର ନେତୃତ୍ୱ ନେବେ। ଭାରତୀୟ ଦଳରେ ଏକାଧିକ ଯୁବ ଖେଳାଳି ଖେଳୁଥିବାରୁ ସେମାନଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିବ। ବିଶ୍ୱକପ ପରାଜୟରେ ଭାରତୀୟ ଫ୍ୟାନ ମାନେ ମର୍ମାହତ ହୋଇଥିବା ବେଳେ ଏଥିରୁ ବାହାରିବା ପାଇଁ ନିଶ୍ଚିତ ସମୟ ଲାଗିବ। ତେବେ ସୂର୍ଯ୍ୟକୁମାର ଯାଦବ ନିଜ ଫେଭରିଟ୍ ଫର୍ମାଟକୁ ଫେରିଥିବା ବେଳେ ଦଳକୁ ବିଜୟୀ କରିବାକୁ ଚେଷ୍ଟା କରିବେ। ତେବେ ସୂର୍ଯ୍ୟ କେବଳ ସିରିଜ୍ ବିଜୟୀ ହେବାକୁ ପ୍ରାଥମିକତା ଦେବେ ନାହିଁ ବରଂ ବିଭିନ୍ନ ଯୁବ ଖେଳାଳି ମାନଙ୍କୁ ନେଇ ପରୀକ୍ଷା ନୀରିକ୍ଷା ମଧ୍ୟ କରିବେ। ଆସନ୍ତା ବର୍ଷ ଟି୨୦ ବିଶ୍ୱକପ ଥିବାରୁ ସେ ନେଇ ଖେଳାଳି ମାନଙ୍କୁ ଆଗୁଆ ପ୍ରସ୍ତୁତ କରିବାକୁ ପଡିବ। ଜୁନ୍ ଓ ଜୁଲାଇ ମାସରେ ଆମେରିକାରେ ଟି୨୦ ବିଶ୍ୱକପ ଖେଳାଯିବ।
ଭାରତୀୟ ଦଳରେ ଯଶସ୍ବୀ ଜୟସ୍ବାଲ, ରିଙ୍କୁ ସିଂ, ତିଲକ ବର୍ମା, ଜିତେଶ ଶର୍ମା ଓ ମୁକେଶ କୁମାରଙ୍କ ଉପରେ ସମସ୍ତଙ୍କ ନଜର ରହିବ। ଏହି ସମସ୍ତ ଖେଳାଳି ବିଗତ କିଛି ମାସ ତଳେ ହିଁ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିଲେ ମଧ୍ୟ ନିଜର ଏକ ଛାପ ଛାଡିବାରେ ସମର୍ଥ ହୋଇଛନ୍ତି। ରୋହିତ ଶର୍ମା, ବିରାଟ କୋହଲି ଓ ଲୋକେଶ ରାହୁଲଙ୍କ ଅନୁପସ୍ଥିତିରେ ଏହି ଖେଳାଳି ମାନଙ୍କ ଉପରେ ଭାରତୀୟ ପ୍ରଶଂସକଙ୍କ ନଜର ରହିବ। ଏହି ଖେଳାଳି ମାନଙ୍କ ମଧ୍ୟରୁ ରିଙ୍କୁ ସିଂ ଫିନିଶର ଭୂମିକାରେ ସବୁଠାରୁ ପ୍ରଭାବୀ ପ୍ରଦର୍ଶନ କରିଥିବା ବେଳେ ଯଶସ୍ବୀ ଜୟସ୍ବାଲ, ତିଳକ ବର୍ମା ଓ ମୁକେଶ କୁମାର ମଧ୍ୟ କିଛି ମ୍ୟାଚରେ ନିଜର ଛାପ ଛାଡିବାରେ ସକ୍ଷମ ହୋଇଛନ୍ତି। ଇଶାନ କିଶନଙ୍କୁ ଭାରତୀୟ ଦଳକୁ ଡାକରା ମିଳିଥିବା ବେଳେ ଜୀତେଶ ଶର୍ମା ବେଞ୍ଚରେ ବସିବା ସ୍ପଷ୍ଟ ହୋଇଛି। ଏହି ଖେଳାଳି ମାନେ ପୂର୍ବରୁ ଓ୍ବେଷ୍ଟଇଣ୍ଡିଜ୍, ଆୟର୍ଲାଣ୍ଡ ଓ ଏସିଆନ୍ ଗେମ୍ସର ଦୁର୍ବଳ ଦଳ ମାନଙ୍କ ବିପକ୍ଷରେ ଖେଳିଥିବା ବେଳେ ଗୁରୁବାର ଏମାନଙ୍କ ପ୍ରକୃତ ପରୀକ୍ଷା ହେବ। ଏକ ଶକ୍ତିଶାଳୀ ଅଷ୍ଟ୍ରେଲିଆ ଦଳ ବିପକ୍ଷରେ କିଭଳି ପ୍ରଦର୍ଶନ କରୁଛନ୍ତି ତା ଉପରେ ସମସ୍ତଙ୍କ ନଜର ରହିବ। ଏହି ସିରିଜ୍ ପରେ ଦକ୍ଷିଣ ଆଫ୍ରିକା ଓ ଆଫଗାନିସ୍ତାନ ସିରିଜ୍ ଆସୁଥିବା ବେଳେ ଏହି ଖେଳାଳି ମାନେ ପ୍ରଭାବୀ ପ୍ରଦର୍ଶନ କରିବାକୁ ଚାହିଁବେ। ଆଇପିଏଲ୍ ପୂର୍ବରୁ ଭାରତୀୟ ଖେଳାଳିଙ୍କ ନିକଟରେ ୨ ମାସର ସମୟ ରହିଥିବା ବେଳେ ୧୧ ଟି୨୦ ମ୍ୟାଚ୍ ଖେଳାଯିବ। ଅନ୍ତରୀଣ ମୁଖ୍ୟ କୋଚ୍ ରହିଥିବା ଭିଭିଏସ୍ ଲକ୍ଷ୍ମଣଙ୍କ ନିକଟରେ ବ୍ୟାଟିଂ ଅର୍ଡରକୁ ନେଇ ଚିନ୍ତା ରହିବ। ଦକ୍ଷିଣ ଆଫ୍ରିକା ସିରିଜ୍ ବେଳକୁ ଶୁବମନ ଗିଲ୍ ପ୍ରତ୍ୟାବର୍ତ୍ତନ କରୁଥିବା ବେଳେ ଏହା ଓପନିଙ୍ଗ ଯୋଡିକୁ ନେଇ ସମସ୍ୟା ସୃଷ୍ଟି କରି ପାରେ। ଋତୁରାଜ ଗାଏକ୍ୱାଡ ଓପନ କରିବା ସ୍ପଷ୍ଟ ହୋଇଥିବା ବେଳେ ତାଙ୍କ ସହିତ ଯଶସ୍ବୀ ଜୟସ୍ବାଲ କିମ୍ବା ଇଶାନ କିଶନଙ୍କ ମଧ୍ୟରୁ ଜଣେ ଓପନ କରିବେ। ସୂର୍ଯ୍ୟକୁମାର ଯାଦବ ୩/୪ ନମ୍ବର ସ୍ଥାନରେ ବ୍ୟାଟିଂ କରିବେ। ଏହି ଦଳରେ ୭ ଜଣ ବାମହାତୀ ବ୍ୟାଟର ରହିଥିବା ବେଳେ ଏହା ଏକ ସମସ୍ୟା ହୋଇପାରେ। ଫିନିଶର ଭାବରେ ରିଙ୍କୁ ଓ ଜିତେଶ ଖେଳିବାର ସମ୍ଭାବନା ଅଧିକ। ବୋଲିଂରେ ଲେଗ୍ ସ୍ପିନର ରବି ବିଷ୍ଣୋଇଙ୍କୁ ଏକାଧିକ ମ୍ୟାଚ୍ରେ ସୁଯୋଗ ମିଳିବ। ଦ୍ୱିତୀୟ ସ୍ପିନର ଭାବରେ ଅକ୍ଷର ପଟେଲ ଖେଳିବାର ସମ୍ଭାବନା ଅଧିକ।
ଅନ୍ୟ ପକ୍ଷରେ ବିଶ୍ୱକପ ବିଜୟ ପରେ ଆତ୍ମବିଶ୍ୱାସର ସହ ଏହି ସିରିଜ୍ ଖେଳିବ ଅଷ୍ଟ୍ରେଲିଅ। ସନ୍ ଆବୋଟ୍, ଟ୍ରାଭିସ୍ ହେଡ୍, ଜୋଶ ଇଂଲିଶ, ଗ୍ଲେନ୍ ମ୍ୟାକ୍ସଓ୍ବେଲ, ଷ୍ଟିଭ୍ ସ୍ମିଥ୍, ମାର୍କସ୍ ଷ୍ଟୋଇନିସ୍ ଓ ଆଡାମ ଜାମ୍ପାଙ୍କ ପରି ବିଶ୍ୱକପ ଖେଳିଥିବା ଖେଳାଳିଙ୍କ ମଧ୍ୟରୁ ମାତ୍ର ୭ ଜଣ ଟି ୨୦ ଦଳ ସହ ରହିବେ। ସେହିପରି ଦଳର ଏକାଧିକ ଖେଳାଳି ଆଇପିଏଲ ଖେଳୁଥିବାରୁ ଏହା ଅଷ୍ଟ୍ରେଲିଆ ପାଇଁ ସହାୟକ ହେବ। ବିଶାଖାପଟ୍ଟନମ ପିଚ୍ରେ ଦ୍ରୁତ ବୋଲରଙ୍କୁ ସାମାନ୍ୟ ସହୟତା ମିଳିବା ନେଇ ଆଶା କରାଯାଏ।