ସର୍ବଦା ଖୋଲାଖୋଲି ଭାବେ ମତ ପ୍ରକାଶ କରିବାକୁ ଭଲ ପାଉଥିବା ଅଭିନେତ୍ରୀ ତାପସୀ ପନ୍ନୁ ବଲିଉଡ୍ରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ପୂର୍ବରୁ ବିଭିନ୍ନ ପ୍ରସଙ୍ଗରେ ସେ ସୋସିଆଲ ମିଡିଆରେ ନିଜର ମତ ପ୍ରକାଶ କରିଛନ୍ତି। କିନ୍ତୁ ବର୍ତ୍ତମାନ ନିଜର ବିଦ୍ୟୁତ୍ ବିଲ୍କୁ ନେଇ ତାପସୀ ଟୁଇଟର୍ରେ କ୍ଷୋଭ ପ୍ରକାଶ କରିଛନ୍ତି। ସାଧାରଣତଃ ଯେତେବେଳେ ବିଦ୍ୟୁତ ବିଲ୍ ଆଶାତୀତ ଭାବେ ବଢ଼ିକି ଆସିଥାଏ ତାହା ସାଧାରଣ ଜନତାକୁ ବାଧିଥାଏ। ଯାହା ଏବେ ତାପସୀଙ୍କ କ୍ଷେତ୍ରରେ ହୋଇଛି। ତାପସୀଙ୍କ ଇଲେକ୍ଟ୍ରି ବିଲ୍ ଏତେମାତ୍ରାରେ ବଢ଼ିକି ଆସିଛି ଯେ, ଯାହାକୁ ଦେଖି ସେ ଚମକି ପଡ଼ିଛନ୍ତି। ଏହାପରେ ଟୁଇଟର୍ରେ ସେ ନିଜର କ୍ଷୋଭ ପ୍ରକାଶ କରିଛନ୍ତି। ‘ଲକ୍ ଡାଉନକୁ ତିନି ମାସ ହୋଇଛି ଏବଂ ମୁଁ ଆପାର୍ଟମେଣ୍ଟରେ ଏମିତି କ’ଣ ଉପକରଣ ବ୍ୟବହାର କରୁଛି କିମ୍ବା ନୂଆ ଜିନିଷ କିଣିକି ଆଣିଛି ଯାହା ଫଳରେ କି ଏତେ ପରିମାଣର ବିଦ୍ୟୁତ୍ ବିଲ୍ ବଢ଼ିକି ଆସିଛି। କେଉଁ ପ୍ରକାର ବିଦ୍ୟୁତ ଚାର୍ଜ କରାଯାଉଛି’ ବୋଲି ତାପସୀ ଆଦାନୀ ବିଦ୍ୟୁତ ମୁମ୍ବାଇକୁ ଟ୍ୟାଗ୍ କରି ପ୍ରଶ୍ନ କରିଛନ୍ତି। ସେହିଭଳି ଆଉ ଏକ ଟୁଇଟ୍ରେ ତାପସୀ ଉଲ୍ଲେଖ କରି କହିଛନ୍ତି, ଏହି ଆପାର୍ଟମେଣ୍ଟରେ କେହି ରହି ନ ଥାନ୍ତି। ସପ୍ତାହକୁ କେବଳ ଥରେ ସଫା କରିବା ପାଇଁ ଉଦ୍ଦେଶ୍ୟରେ ସେଠାକୁ ଯାଇଥାଉ। କିନ୍ତୁ ଏବେ ମୁଁ ଚିନ୍ତିତ ଯେ ଆମର ଅଜାଣତରେ କେହି ଆପାର୍ଟମେଣ୍ଟକୁ ବ୍ୟବହାର କରୁନାହାନ୍ତି। ଏହାକୁ ଉନ୍ମୋଚନ କରିବାରେ ଆମକୁ ସହାୟତା କରନ୍ତୁ’ ବୋଲି ତାପସୀ କହିଛନ୍ତି। ଏଠାରେ ଉଲ୍ଳେଖଯୋଗ୍ୟ, ତାପସୀ ଟୁଇଟର୍ରେ ପୋଷ୍ଟ କରିଥିବା ଇଲେକ୍ଟ୍ରି ବିଲ୍ରେ ମାର୍ଚ୍ଚ, ଏପ୍ରିଲ ଓ ମେ ମାସ ବାବଦକୁ ଯଥାକ୍ରମେ ୫୭୦, ୪୩୯୦ ଓ ୩୮୫୦ ଟଙ୍କା ବିଲ୍ ଆସିଛି। କିନ୍ତୁ ଚଳିତ ଜୁନ୍ ମାସ ବାବଦକୁ ୩୬ ହଜାର ଟଙ୍କା ଆସିଛି। ଯାହାକି ମେ ମାସ ବିଲ୍ର ୯ ଗୁଣାରୁ ଅଧିକ ବୋଲି ଜଣାପଡ଼ିଛି।