ଓ୍ବାଶିଂଟନ୍, ୧।୧୨(ପି.ଟି.): ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ସହ ସମ୍ପୃକ୍ତ ପାକିସ୍ତାନୀ ବଂଶୋଦ୍ଭବ କାନାଡ଼ା ବ୍ୟବସାୟୀ ତହଉର ରାଣା ପ୍ରତ୍ୟର୍ପଣ ମାମଲାର ଶୁଣାଣି ଫେବୃୟାରୀ ୧୨ରେ ଆମେରିକାର ଏକ ଅଦାଲତରେ ହେବ। ଭାରତ ସରକାର ରାଣାଙ୍କୁ ପଳାତକ ଘୋଷଣା କରିଥିଲେ।
୨୦୦୮ରେ ହୋଇଥିବା ମୁମ୍ବାଇ ଆକ୍ରମଣରେ ୬ ଆମେରିକୀୟଙ୍କ ସମେତ ୧୬୬ ଜଣଙ୍କର ମୃତ୍ୟୁ ଘଟିଥିଲା। ଏଥିରେ ସମ୍ପୃକ୍ତ ରାଣାଙ୍କୁ ପ୍ରତ୍ୟର୍ପଣ କରିବା ଲାଗି ଭାରତର ଅନୁରୋଧ ପରେ ତାଙ୍କୁ ଗତ ଜୁନ୍ ୧୦ରେ ଲସ୍ ଆଞ୍ଜେଲସ୍ରେ ପୁନର୍ବାର ଗିରଫ କରାଯାଇଥିଲା। ଡାଭିଡ୍ କୋଲେମାନ ହେଡ୍ଲିଙ୍କ ଗିରଫ ପରେ ୨୦୦୯ ଅକ୍ଟୋବରରେ ରାଣାଙ୍କୁ ଆମେରିକା ପୋଲିସ ସିକାଗୋର ଏକ ବିମାନବନ୍ଦରରୁ ଗିରଫ କରିଥିଲା। ଫେବୃୟାରୀ ୧୨ରେ ପ୍ରତ୍ୟର୍ପଣ ଆବେଦନର ଶୁଣାଣି କରିବା ପାଇଁ ଲସ୍ ଆଞ୍ଜେଲସ୍ ଡିଷ୍ଟ୍ରିକ୍ଟ କୋର୍ଟର ବିଚାରପତି ଜାକ୍ୟୁଲିନ୍ ଚେଲୋନିଆନ୍ କହିଛନ୍ତି। ରାଣା ଚାହିଁଲେ ଡିସେମ୍ବର ୨୧ ସୁଦ୍ଧା ଏନେଇ ପ୍ରତିବାଦ ଦାଏର କରିପାରିବେ। ରାଣା ଯୁଦ୍ଧ ସ୍ଥିତି ଲାଗି ଷଡ଼ଯନ୍ତ୍ର କରିବା ସହ ହତ୍ୟା ଓ ଆତଙ୍କବାଦୀ କାର୍ଯ୍ୟରେ ସମ୍ପୃକ୍ତ ଥିବା ଅଭିଯୋଗ ହୋଇଥିଲା। ଷଡ଼ଯନ୍ତ୍ରରେ ତାଙ୍କ ସହ ସାମିଲ ଥିବା ହେଡ୍ଲିଙ୍କୁ ଭାରତ ପ୍ରତ୍ୟର୍ପଣ କରିବା ଲାଗି ଆମେରିକା ମନା କରିଥିବାରୁ ତାଙ୍କୁ ମଧ୍ୟ ପ୍ରତ୍ୟର୍ପଣ କରାଯିବ ନାହିଁ ବୋଲି ରାଣା ଯୁକ୍ତି ଦର୍ଶାଇଛନ୍ତି।