ଗଞ୍ଜାମ,୧୫।୭(ଡି.ଏନ୍.ଏ.): ହରଡ଼ଘଣାରେ ଗଞ୍ଜାମ ତହସିଲଦାର। ତହସିଲଦାରଙ୍କ ଏକ ଭିଡିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବା ପରେ ସେ ଏବେ ବିବାଦ ଘେରକୁ ଆସିଛନ୍ତି। ଗଞ୍ଜାମ ଓ ହୁମା ପୁରୁଷୋତ୍ତମପୁର ରାସ୍ତାରେ ଥିବା ଏକ ପେଟ୍ରୋଲ ପମ୍ପରେ ଜଣେ ବାଇକ୍ ଆରୋହୀ ତେଲ ପକାଇବାକୁ ଆସିଥିଲେ। ହେଲେ ସେହି ସମୟରେ ବାଇକ ଆରୋହୀଙ୍କ ସମେତ ପେଟ୍ରୋଲ ପମ୍ପର କର୍ମଚାରୀ ମଧ୍ୟ ମାସ୍କ ପିନ୍ଧି ନ ଥିଲେ। ଯାହା ଫଳରେ ଉକ୍ତ କର୍ମଚାରୀଙ୍କୁ ଦଣ୍ଡ ଭୋଗିବାକୁ ପଡ଼ିଥିଲା। ସୂଚନାଯୋଗ୍ୟ, ବୁଧବାର ତହସିଲଦାର ଅରୁଣ କୁମାର ନାୟକ ଉକ୍ତ ରାସ୍ତା ଦେଇ ଯାଉଥିବା ବେଳେ ହଠାତ୍ ପେଟ୍ରୋଲ ପମ୍ପରେ ବିନା ମାକ୍ସରେ ତେଲ ପକାଯାଉଥିବା ଦେଖିଥିଲେ। ଗ୍ରାହକ ଏବଂ କର୍ମଚାରୀ ମାସ୍କ ପିନ୍ଧି ନ ଥିବା ଦେଖି ତହସିଲଦାର ଉକ୍ତ ପେଟ୍ରୋଲ ପମ୍ପର କର୍ମଚାରୀଙ୍କୁ ଉଠବସ ହେବାକୁ ନିର୍ଦ୍ଦେଶ ଦେଇଥିଲେ। ତେବେ ତହସିଲଦାରଙ୍କ ନିର୍ଦ୍ଦେଶ ପରେ କର୍ମଚାରୀ ଜଣକ ମଧ୍ୟ ଉଠବସ ହୋଇଥିଲେ। ଏହାର ଏକ ଭିଡିଓ ଏବେ ଭାଇରଲ ହେବାରେ ଲାଗିଛି। ଅନ୍ୟପଟେ ଏ ସମ୍ପର୍କରେ ତହସିଲଦାର ନାୟକଙ୍କୁ ପଚାରିବାରୁ ସେ ଏହାକୁ ଖଣ୍ଡନ କରିଛନ୍ତି। ଏଥିସହ ଏହା ଏକ ଫେକ୍ ଭିଡିଓ ବୋଲି ତହସିଲଦାର କହିଛନ୍ତି।