ତାଇପେ/ବେଜିଂ,୨୯।୩ : ତାଇୱାନର ରାଷ୍ଟ୍ରପତି ତାଇ ଇଙ୍ଗ ୱେନ ବୁଧବାର ଗୁଆଟେମାଲା ଏବଂ ବେଲିଜ ଗସ୍ତ କରିବାର କାର୍ଯ୍ୟକ୍ରମ ରହିଛି। ସେ ନ୍ୟୁୟର୍କ ଏବଂ ଲସ ଆଞ୍ଜେଲସରେ ଅଟକିବେ ବୋଲି କୁହାଯାଉଛି। ଏହି ସମୟ ମଧ୍ୟରେ ସେ ଆମେରିକାର ହାଉସ ବାଚସ୍ପତି କେଭିନ ମ୍ୟାକକାର୍ଥିଙ୍କୁ ଭେଟିବାକୁ ଯୋଜନା କରୁଥିବା ସୂତ୍ରରୁ ପ୍ରକାଶ। ତେବେ ଏପର୍ଯ୍ୟନ୍ତ କୌଣସି ଅଧିକାରୀ ଏହାକୁ ନିଶ୍ଚିତ କରିନାହାଁନ୍ତି।
ଆମେରିକା ବାଚଷ୍ପତି ଏବଂ ତାଇୱାନ ରାଷ୍ଟ୍ରପତିଙ୍କ ମଧ୍ୟରେ ସାକ୍ଷାତ ହେବାର ସମ୍ଭାବନା ନେଇ ଚାଇନା କ୍ରୋଧିତ ହୋଇଛି। ଯଦି ଆମେରିକାର ହାଉସର ବାଚସ୍ପତି ତାଇୱାନର ରାଷ୍ଟ୍ରପତିଙ୍କୁ ଭେଟନ୍ତି ତେବେ ଏହାର ପ୍ରତିଶୋଧ ନେବାକୁ ଚାଇନା ଧମକ ଦେଇଛି। ଚାଇନା କହିଛି ଏଭଳି ପଦକ୍ଷେପ ନେବା ଦ୍ୱାରା ଏକ ଉତ୍ତେଜନା ମୂଳକ ସ୍ଥିତି ସୃଷ୍ଟି ହେବାର ଆଶଙ୍କା ରହିଛି।
ଚାଇନାର ତାଇୱାନ ବ୍ୟାପାର କାର୍ଯ୍ୟାଳୟର ମୁଖପାତ୍ର ଜୁ ଫେଙ୍ଗଲିୟାନ ଏକ ଖବରଦାତା ସମ୍ମିଳନୀରେ କହିଛନ୍ତି , ଯଦି ତାଇୱାନର ରାଷ୍ଟ୍ରପତି ତାଇ ଇଙ୍ଗ-ୱେନ ଆମେରିକାର ବାଚସ୍ପତି ମ୍ୟାକକାର୍ଥିଙ୍କ ସହ ଯୋଗାଯୋଗ କରନ୍ତି ତେବେ ଏହା ଏକ ଉତ୍ତେଜନାମୂଳକ ପରିସ୍ଥିତି ହେବ। ଏହା ଚାଇନା ନୀତିର ଉଲ୍ଲଂଘନ ହେବ। ଏହା ଦ୍ୱାରା ଚାଇନାର ସାବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ କ୍ଷତି ପହଞ୍ଚିବାର ଆଶଙ୍କା ରହିଛି। ଏଭଳି କାର୍ଯ୍ୟ ଦ୍ୱାରା ଶାନ୍ତି ଏବଂ ସ୍ଥିରତାକୁ ନଷ୍ଟ ହୋଇପାରେ। ଆମେ ଏହାକୁ ଦୃଢ଼ ବିରୋଧ କରୁଛୁ ଏବଂ ଏହା ପାଇଁ ନିଶ୍ଚିତ ଭାବରେ ଏକ ବଡ ପଦକ୍ଷେପ ଗ୍ରହଣ କରିବୁ।
ସୂଚନାଯୋଗ୍ୟ, ପୂର୍ବରୁ ଆମେରିକାର ହାଉସ ବାଚସ୍ପତି ନାନସୀ ପେଲୋସି ଗତ ବର୍ଷ ତାଇୱାନ ଗସ୍ତ କରିଥିଲେ। ପେଲୋସି ତାଇପେଇରେ ତାଇୱାନର ରାଷ୍ଟ୍ରପତି ତାଇ ଇଙ୍ଗ-ୱେନଙ୍କୁ ଭେଟିଥିଲେ। ଏହି ସମୟରେ ସେ ସ୍ପଷ୍ଟ ଭାବରେ କହିଥିଲେ ଆମେରିକା ତାଇୱାନକୁ ଦେଇଥିବା ପ୍ରତିଶ୍ରୁତି ତ୍ୟାଗ କରିବ ନାହିଁ।
