ସିଡନୀ,୧୮।୫: ଅଷ୍ଟ୍ରେଲୀୟ ଅଲରାଉଣ୍ଡର ଡାନିଏଲ ସିମସ ଅନ୍ତର୍ଜାତୀୟ କ୍ରିକେଟରୁ ବିରତି ନେବାକୁ ନିଷ୍ପତ୍ତି ନେଇଛନ୍ତି। କୁହାଯାଉଛି ଯେ ମାନସିକ ଚାପ ଯୋଗୁ ସେ ଏହି ନିଷ୍ପତ୍ତି ନେଇଛନ୍ତି। ସୋମବାର ମାଳଦ୍ୱୀପରୁ ଘରକୁ ଫେରିବା ପରେ ସାମସ ତାଙ୍କ କ୍ରିକେଟ ବୋର୍ଡକୁ ଅନୁରୋଧ କରିଛନ୍ତି ଯେ, ଏବେ କିଛିଦିନ କୌଣସି ଦଳରେ ମନୋନୀତ କରନ୍ତୁ ନାହିଁ। ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ର ୧୪ତମ ସିଜନରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳରେ ସାମସଙ୍କୁ ଅନ୍ତର୍ଭୁକ୍ତ କରାଯାଇଥିଲା।
ସୂଚନାଯୋଗ୍ୟ, ସାମସ ଅଷ୍ଟ୍ରେଲିଆର ପ୍ରଥମ କ୍ରିକେଟର ନୁହନ୍ତି, ଯିଏ ମାନସିକ ଚାପ ଯୋଗୁ ଅନ୍ତର୍ଜାତୀୟ କ୍ରିକେଟରୁ ବିରତି ନେଇଛନ୍ତ। ମାନସିକ ସ୍ତରରେ ଅସୁସ୍ଥ ଅନୁଭବ କରିବା ଯୋଗୁ ଅତୀତରେ ଗ୍ଲେନ ମ୍ୟାକ୍ସୱେଲ, ୱିଲ ପୁକୋସ୍କି ଏବଂ ନିକ ମେଡିସନ୍ସ ମଧ୍ୟ ବିରତି ନେଇଛନ୍ତି। ଏହି ସମୟରେ କ୍ରିକେଟ ଅଷ୍ଟ୍ରେଲିଆ ୱେଷ୍ଟଇଣ୍ଡିଜ ଗସ୍ତ ପାଇଁ ୨୩ ଜଣିଆ ଦଳ ଘୋଷଣା କରିଛି। ଅଷ୍ଟ୍ରେଲିୟ ଦଳରେ ଅନେକ ଭେଟେରାନ ଖେଳାଳି ଅନ୍ତର୍ଭୁକ୍ତ କରାଯାଇଛି। ଏଥିରେ ମାଥ୍ୟୁ ୱେଡ, ଝାଏ ରିଚାର୍ଡସନ, ରିଲେ ମେରେଡିଥ ଏବଂ ତନଭୀର ସାଂଘାଙ୍କ ଭଳି ଖେଳାଳିଙ୍କ ନାମ ଅନ୍ତର୍ଭୁକ୍ତ ହୋଇଥିଲା, କିନ୍ତୁ ସାମସଙ୍କୁ ସ୍ଥାନ ଦିଆଯାଇ ନ ଥିଲା। ଏଥି ସହିତ ମାର୍ନୁସ ଲାବୁସେନ ଏବଂ କ୍ୟାମେରନ ଗ୍ରୀନ ଦଳରୁ ବାଦ ପଡିଥିଲେ।
