କଟକ,୨୩ା୧୧(ଶିଳ୍ପା ପ୍ରୟଦର୍ଶିନୀ)ତାଳଦଣ୍ଡା କେନାଲରେ ପାଣି ନ ଥିବାରୁ ବିଦ୍ୟାଧରପୁରର ପ୍ରସିଦ୍ଧ ବଡ଼କାଳୀ, ସାନକାଳୀ ଓ ଦକ୍ଷିଣକାଳୀ ମୂର୍ତ୍ତି ବିସର୍ଜନ ପୂର୍ବରୁ ଘାଟକୂଳରେ ରଖାଯାଇଥିଲା। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ୨ ଘଣ୍ଟାର ଅପେକ୍ଷା ପରେ ତାଳଦଣ୍ଡା କେନାଲରେ ପାଣି ଆସିବାରୁ ମୂର୍ତ୍ତି ବିସର୍ଜନ କରାଯାଇଥିଲା। ବିଦ୍ୟାଧରପୁର ଅଞ୍ଚଳରେ ବଡ଼କାଳୀ, ସାନକାଳୀ, ଦକ୍ଷିଣ କାଳୀ ସମେତ ହରପାର୍ବତୀ, କାର୍ତ୍ତିକେଶ୍ୱର ମେଢ଼କୁ ମିଶାଇ ୩୧ଟି ମେଢ଼ ରହିଛି। ସେଥିମଧ୍ୟରୁ ବଡ଼କାଳୀ, ସାନ କାଳୀ ଓ ଦକ୍ଷିଣ କାଳୀ ମେଢ଼ ପୂର୍ବ ରୀତିନୀତି ଅନୁଯାୟୀ ତାଳଦଣ୍ଡା କେନାଲରେ ବିସର୍ଜନ କରାଯାଇଥିବାବେଳେ ଅନ୍ୟ ମେଢ଼ଗୁଡିକୁ ପ୍ରଶାସନ ପକ୍ଷରୁ ନିର୍ମିତ ଦୁଇଟି ଅସ୍ଥାୟୀ ପୋଖରୀରେ ବିସର୍ଜନ କରାଯାଇଛି। ପୂଜା ପୂର୍ବରୁ ପୂଜା କମିଟି ସହ ପ୍ରଶାସନର ସମସ୍ତ ଆଲୋଚନା ହୋଇଥିଲେ ମଧ୍ୟ ବିସର୍ଜନବେଳେ ସମସ୍ୟା ସୃଷ୍ଟି ହୋଇଥିଲା। ଏନେଇ ବିଦ୍ୟାଧରପୁର ପୂଜା କିମିଟି ଉପସଭାପତି ନଗେନ୍ ମହାରଣା କହିଛନ୍ତି, ପରମ୍ପରା ରହିଛି ସତ ହେଲେ ସରକାରଙ୍କ ନିୟମ ଅଲଗା ରହିଛି। ନିୟମ ଅନୁଯାୟୀ କୌଣସି ମେଢ଼ ନଦୀ କିମ୍ବା କେନାଲରେ ସିଧାସଳଖ ପକାଯାଇ ପାରିବନାହିଁ। ପରମ୍ପରାକୁ ଦୃଷ୍ଟିରେ ରଖି ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳଙ୍କ ସହଯୋଗରେ କାଳୀଙ୍କ ମେଢ଼ ବିସର୍ଜନ ତାଳଦଣ୍ଡା କେନାଲରେ କରାଯାଇଛି। କୌଣସି ବାଧା ସୃଷ୍ଟି ହୋଇ ନାହିଁ। ଅନ୍ୟପକ୍ଷରେ ସିଆର୍ଆର୍ଆଇ ଥାନା ଅଧିକାରୀ କୃପାସିଦ୍ଧୁ ବରାଡ଼ କହିଛନ୍ତି, କେନାଲରେ ପାଣି ନ ଥିବାରୁ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। ଲୋକଙ୍କୁ ବୁଝାଇବା ପରେ ସ୍ଥିତି ଆୟତ୍ତକୁ ଆସିଥିଲା। ପରେ କେନାଲରେ ପାଣି ଆସିବାରୁ ମେଢ଼ ବିସର୍ଜନ କରାଯାଇଥିଲା।
ସୂଚନାନୁଯାୟୀ, ଗତ ୧୨ ତାରିଖରେ ବିଦ୍ୟାଧରପୁର ଅଞ୍ଚଳରେ କାଳୀପୂଜା ଅନୁଷ୍ଠିତ ହୋଇଥିଲା। ମଙ୍ଗଳବାର ଅପରାହ୍ନରୁ ଭସାଣି ଉତ୍ସବ ଆରମ୍ଭ ହୋଇଥିଲା। ସମସ୍ତ ମେଢ଼ ମେଳଣ ପଡ଼ିଆରେ ପହଞ୍ଚିଥିଲେ। ପରେ ନମ୍ବର ଅନୁଯାୟୀ ସମସ୍ତ ମେଢ଼ ବିସର୍ଜନ କରାଯାଇଥିଲା। ଦୀର୍ଘବର୍ଷ ହେବ ତାଳଦଣ୍ଡା କେନାଲରେ ବିଦ୍ୟାଧରପୁରର ବଡ଼ କାଳୀ, ସାନ କାଳୀ ଓ ଦକ୍ଷିଣ କାଳୀଙ୍କ ମେଢ ବିସର୍ଜନ ହୋଇଆସୁଛି।