କାବୁଲ,୧।୧୧: ତାଲିବାନୀ ପରିଚୟ ଦେଇ ଆଫଗାନିସ୍ତାନର ପୂର୍ବାଞ୍ଚଳରେ ଏକ ବିବାହ ଭୋଜିରେ ମ୍ୟୁଜିକ ଚାଲୁ କରିବାରୁ ୩ ଜଣଙ୍କୁ ହତ୍ୟା କରିଥିଲେ କିଛି ବନ୍ଧୁକଧାରୀ। ହତ୍ୟାକାଣ୍ଡ ଘଟାଇଥିବା ୨ ବନ୍ଧୁକଧାରୀଙ୍କୁ ଗିରଫ କରାଯାଇଛି ଓ ଇସ୍ଲାମିକ୍ ଏମିରେଟ୍ ସହ ସେମାନଙ୍କ କୌଣସି ସମ୍ପର୍କ ନାହିଁ। ଏ ନେଇ ସୂଚନା ଦେଇଛନ୍ତି ତାଲିବାନ ସରକାରଙ୍କ ପ୍ରବକ୍ତା ଜାବିହୁଲା ମୁଜାହିଦ।
“ଗତ ରାତିରେ ନାଙ୍ଗାରହାରସ୍ଥିତ ଶାମାସପୁର ମାର ଘୁଣ୍ଡି ଗ୍ରାମର ହାଜି ମଲାଙ୍ଗ ଜାନରେ ଆୟୋଜିତ ହୋଇଥିଲା ଏକ ବିବାହ ଭୋଜି। ୩ ବନ୍ଧୁକଧାରୀ ତାଲିବାନୀ ପରିଚୟ ଦେଇ ମ୍ୟୁଜିକ ବନ୍ଦ କରିବା ପାଇଁ ଗୁଳି ଚଳାଇଥିଲେ। ଫଳରେ ଅତିକମ୍ରେ ୩ ଜଣଙ୍କ ମୃତ୍ୟୁ ହୋଇଥିଲା। ଏହି ଘଟଣାରେ ସମ୍ପୃକ୍ତ ୨ ଜଣଙ୍କୁ ହେପାଜତକୁ ନିଆଯାଇଛି। ଖସି ପଳାଇଥିବା ଅନ୍ୟ ଜଣେ ଧରା ପଡ଼ି ନାହାନ୍ତି। ଅପରାଧୀମାନେ ସେମାନଙ୍କ ବ୍ୟକ୍ତିଗତ ପ୍ରତିଶୋଧ ନେବା ପାଇଁ ଇସ୍ଲାମିକ୍ ଏମିରେଟ୍ ପରିଚୟ ଦେଇ ଏଭଳି ଘଟାଇଛନ୍ତି। ସେମାନଙ୍କୁ ଶରିଆ ଦଣ୍ଡରେ ଦଣ୍ଡିତ କରାଯିବ” ବୋଲି ମୁଜାହିଦ କହିଛନ୍ତି।