ବ୍ରାସିଲିଆ, ୬ା୪: ଲାଟିନ୍ ଆମେରିକୀୟ ଦେଶ ବ୍ରାଜିଲର ଜଣେ ମଡେଲ ନିଜ ବିବାହକୁ ନେଇ ଚର୍ଚ୍ଚାରେ ଅଛନ୍ତି। ‘ମୁକ୍ତ ପ୍ରେମ’ ନାଁରେ ପୂର୍ବରୁ ୯ ଥର ବିବାହ କରିସାରିଥିବା ମଡେଲ ଆର୍ଥର ଓ’ ଉରସୋ ଏବେ ଆଉ ଦୁଇଟି ବାହାହେବାକୁ ଯାଉଛନ୍ତି। ୯ ଜଣ ସ୍ତ୍ରୀଙ୍କ ମଧ୍ୟରୁ ଜଣେ ଆର୍ଥରଙ୍କୁ ଛାଡ଼ପତ୍ର ଦେବାକୁ ଯାଉଥିବାରୁ ତାଙ୍କ ସ୍ଥାନ ପୂରଣ କରିବାକୁ ମଡେଲ ଜଣକ ଅନ୍ୟ ଜଣଙ୍କୁ ବିବାହ କରିବେ। ଏହାସହ ଜୀବନରେ ୧୦ ସ୍ତ୍ରୀ ରଖିବା ଲକ୍ଷ୍ୟ ପୂରଣ ପାଇଁ ସେ ଦଶମ ବିବାହ ମଧ୍ୟ କରିବେ ବୋଲି ଆର୍ଥର କହିଛନ୍ତି।
ବିବାହ ପ୍ରଥାକୁ ବିରୋଧ କରି ମୁକ୍ତ ପ୍ରେମକୁ ପ୍ରୋତ୍ସାହିତ କରିବା ପାଇଁ ଆର୍ଥର ବିବାହିତ ଥିବା ସତ୍ତ୍ୱେ ଗତ ବର୍ଷ ଆଉ ୮ ଜଣଙ୍କ ହାତ ଧରିଥିଲେ। ମିଡିଆକୁ ପ୍ରତିକ୍ରିୟା ଦେଇ ଆର୍ଥର କହିଛନ୍ତି, ସ୍ତ୍ରୀ ଆଗାଥା ତାଙ୍କ ଉପରେ ସମ୍ପୂର୍ଣ୍ଣ ଅଧିକାରୀ ଚାହୁଁଛନ୍ତି। କିନ୍ତୁ ତାହା ସମ୍ଭବ ନୁହେଁ। ଆମକୁ ମିଶି ରହିବାକୁ ପଡ଼ିବ। ଆଗାଥା ଅଲଗା ହେବାକୁ ଯାଉଥିବା ଜାଣି ବେଶ୍ ଦୁଃଖିତ। କିନ୍ତୁ ଏହାର କାରଣ ତାଙ୍କୁ ଅଧିକ କଷ୍ଟ ଦେଇଛି ବୋଲି ଆର୍ଥର କହିଛନ୍ତି। ୧୦ ସ୍ତ୍ରୀ ରଖିବାକୁ ତାଙ୍କର ସ୍ବପ୍ନ ରହିଛି ଏବଂ ସମସ୍ତଙ୍କଠାରୁ ସେ ପିଲା ଚାହାନ୍ତି ବୋଲି ଆର୍ଥର ଗଣମାଧ୍ୟମରେ ପ୍ରକାଶ କରିଛନ୍ତି।