ଛେଣ୍ଡିପଦା,୨୫।୨(ସ୍ବ.ପ୍ର.) ଅନୁଗୋଳ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଭୋଟ ଗ୍ରହଣ ପ୍ରକ୍ରିୟା ଗତ ୨୨ ତାରିଖରୁ ଶେଷ ହୋଇଥିବା ବେଳେ ଏବେ ଫଳାଫଳକୁ ସମସ୍ତଙ୍କ ଅପେକ୍ଷା। ଷ୍ଟ୍ରଙ୍ଗ ରୁମ୍ରେ ସିଲ୍ ହୋଇ ରହିଥିବା ଭୋଟ ବାକ୍ସ ଆସନ୍ତା ୨୬ ରୁ ୨୮ ତାରିଖରେ ଖୋଲାଯିବାକୁ ଥିଲେ ହେଁ ଏବେଠାରୁ ବିଜୟ-ପରାଜୟ ନେଇ କଳ୍ପନା ଜଳ୍ପନା ଆରମ୍ଭ ହୋଇଯାଇଛି। ବିଶେଷକରି ଅଳ୍ପ ବ୍ୟବଧାନରେ କିଏ ଜିତିବେ ଓ ହାରିବେ ତାହା ଏବେ ଛେଣ୍ଡିପଦା ବ୍ଲକରେ ଚର୍ଚ୍ଚାର ବିଷୟ ହୋଇଛି।
ଛେଣ୍ଡିପଦା ବ୍ଲକର ୩୪ଟି ପଞ୍ଚାୟତ ସହ ୪ଟି ଜିଲାପରିଷଦ ଜୋନ୍ ପାଇଁ ୧୮ ତାରିଖରେ ଭୋଟଗ୍ରହଣ ସରିଯାଇଛି। ୧୪ଜଣ ଜିଲା ପରିଷଦ ପ୍ରାର୍ଥୀ, ୮୧ ସମିତିସଭ୍ୟ ପ୍ରାର୍ଥୀ, ୯୯ ସରପଞ୍ଚ ଓ ୮୧୭ ୱାର୍ଡସଭ୍ୟ ପ୍ରାର୍ଥୀଙ୍କୁ ମିଶାଇ ମୋଟ ୧୦୧୧ ଜଣଙ୍କ ଭାଗ୍ୟ ଭୋଟ ବାକ୍ସରେ ବନ୍ଦ ରହିଛି। ବିଶେଷକରି ଜିଲା ପରିଷଦ ପ୍ରାର୍ଥୀମାନଙ୍କୁ ନେଇ ଅଧିକ ଆଲୋଚନା ହେଉଛି। ଏଠାରେ ୩ ରାଜନୈତିକ ଦଳ ବିଜେଡି, ଭାଜପା ଓ କଂଗ୍ରେସ ପ୍ରାର୍ଥୀ ଥିଲେ ମଧ୍ୟ ମୁଖ୍ୟତଃ ବିଜେଡି ଓ ଭାଜପା ମଧ୍ୟରେ କଡ଼ା ମୁକାବିଲା ହୋଇଛି। ଶାସକ ବିଜେଡିକୁ କିପରି ଗାଦିଚ୍ୟୁତ କରାଯିବ ତାହା ଭାଜପାର ମୁଖ୍ୟ ଯୋଜନା ରହିଥିଲା। ମତଦାନକୁ ଇତିମଧ୍ୟରେ ୬ଦିନ ବିତି ଯାଇଥିଲେ ମଧ୍ୟ ମିଳିଥିବା ଭୋଟ୍ ନେଇ ୩ ଦଳର ନେତାମାନେ ଠିକ୍ ଆକଳନ କରିପାରୁ ନାହାନ୍ତି। କେଉଁ ଦଳର ପ୍ରାର୍ଥୀ କେତେ ଭୋଟ ପାଇଛନ୍ତି ତାହାର ଅନୁମାନ ଲଗାଇପାରୁ ନାହାନ୍ତି। ତଥାପି ୧୫ ନଂ. ଜୋନ୍ ଭାଜପା ଓ ୧୭ ନଂ ଜୋନ୍ ବିଜେଡି ଭାଗରେ ପଡ଼ିବ ବୋଲି ଚର୍ଚ୍ଚା ହେଉଛି। ୧୪ ନଂ. ଜୋନ୍ ଏବଂ ୧୬ନଂ. ଜୋନ୍ରେ ଭାଜପା ଓ ବିଜେଡି ମଧ୍ୟରେ ଅଳ୍ପ ବ୍ୟବଧାନରେ ହାର-ଜିତ ରହିବ ବୋଲି ଆଶଙ୍କା କରାଯାଉଛି। ତେବେ ୪ଟି ଜୋନ୍ରୁ କେଉଁ ଦଳ କେତୋଟି ହାତେଇବ ତାହା ୨୮ ତାରିଖ ସୁଦ୍ଧା ଜଣାପଡ଼ିଯିବ।