ରସୁଲପୁର,୩୧।୧୨(ଡି.ଏନ.ଏ.): ରସୁଲପୁର ବ୍ଲକ ଅଧୀନ ପ୍ରଥମାଖଣ୍ଡି ପଞ୍ଚାୟତ ଗୋପାଳପୁର ଗାଁରେ ହସ୍ତତନ୍ତ ଓ ବୟନଶିଳ୍ପ ଉପନିର୍ଦ୍ଦେଶକ ଆଶୁତୋଷ ମହାନ୍ତି ପହଞ୍ଚତ୍ ଏକ ସମୀକ୍ଷା ବୈଠକ କରିଛନ୍ତି। ମା’ ତାରିଣୀ ତନ୍ତୁବାୟ ସହଯୋଗ ସମିତି କାର୍ଯ୍ୟାଳୟ ପରିସରରେ ବୁଣାକାର ସଂଘ ନେତାଙ୍କୁ ନେଇ ଏହି ବୈଠକ ଅନୁଷ୍ଠିତ ହୋଇଥିଲା। ବୈଠକରେ ତନ୍ତଶାଳାକୁ କଞ୍ଚାମାଲ ଅଭାବ ଉପରେ ଉପନିର୍ଦ୍ଦେଶକଙ୍କ ଦୃଷ୍ଟି ଆକର୍ଷଣ କରାଯାଇଥିଲା। କଞ୍ଚାମାଲ ଅଭାବ ଯୋଗୁ ବହୁ ତନ୍ତଶାଳା ବନ୍ଦ ହୋଇଯାଇଛି। କାରିଗର କାର୍ଯ୍ୟଶୂନ୍ୟ ହୋଇପଡ଼ିଛନ୍ତି। ରୋଜଗାର ଠପ୍ ହୋଇଯାଇଛି। ଟସର ଲୁଗା ବ୍ୟତୀତ ଅନ୍ୟ ବସ୍ତ୍ର ବୁଣିବାକୁ କାରିଗର ଆଗ୍ରହ ପ୍ରକାଶ କରୁନାହାନ୍ତି। ଟସର ଲୁଗା ବଜାରରେ ଚାହିଦା ରହୁଛି, ଅନ୍ୟସବୁକୁ ବିକ୍ରିକରିବାରେ ସମସ୍ୟା ହେଉଛି। ଏହି ସବୁ କାରଣରୁ କାରିଗର ଟସର କୋଷା ଅଭାବରୁ କାମ ପାଉନାହାନ୍ତି। ପ୍ରାୟତଃ ୧୦୦୦ରୁ ଊର୍ଦ୍ଧ୍ୱ କାରିଗର ହାତବାନ୍ଧି ବସିଛନ୍ତି ବୋଲି ବୁଣାକାର ନେତା ରମେଶ ଦାସ, ଅଶୋକ କୁମାର ଗୁଇଁ, ମକରଧ୍ୱଜ ଗୁଇଁ, ସାମନ୍ତ ଦାସ, ସୁରେନ୍ଦ୍ର ଦାସ, ପୀତବାସ ସୁର, ନରେନ୍ଦ୍ର ବେହେରା, କୁଳମଣି ଗୁଇଁ, ପ୍ରଶାନ୍ତ କୁମାର ଦାସଙ୍କ ସମେତ ୧୭ଟି ସମିତିର ସଭାପତି ଓ ସମ୍ପାଦକ ପ୍ରମୁଖ ଉପନିର୍ଦ୍ଦେଶକକ ମହାନ୍ତି, ଏସ୍ଆର୍ ପ୍ରକାଶ ପାତ୍ର, ବୟନ ନିରୀକ୍ଷକ ତରିଣୀ ଛାଟୋଇ ଓ ଦୁଷ୍ମନ୍ତ ପାତ୍ର ପ୍ରମୁଖଙ୍କ ଦୃଷ୍ଟି ଆକର୍ଷଣ କରିଥିଲେ।
ପରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଜାରି ରହିଥିବା ବୁଣାକାର ସହାୟତାର ସଦୁପଯୋଗକୁ ନେଇ ବୈଠକରେ ଆଲୋଚନା ହୋଇଥିଲା। ବିଭିନ୍ନ ସହାୟତା ପାଇଁ ଅନଲାଇନ ଜରିଆରେ ଅବେଦନ କରିଥିବା ବୁଣାକାର ପରିବାର ମଧ୍ୟରୁ ଯୋଗ୍ୟଙ୍କୁ ଚିହ୍ନଟ କରାଯାଇ ସହାୟତା ପ୍ରଦାନ ଉପରେ ଗୁରୁତ୍ୱ ଦିଆଯାଇଥିଲା। ପିଏଚ୍ଓଆଇ ଯୋଜନା ଜରିଆରେ ବୁଣାକାରଙ୍କୁ ତନ୍ତ, ଜାକଡ, ଡବି ଆଦି ସାମଗ୍ରୀ ବଣ୍ଟନ କରାଯାଉଛି। ଏଥିରୁ ବଞ୍ଚତ୍ତ ଥିବା ଅନ୍ୟମାନଙ୍କୁ ପର୍ଯ୍ୟାୟ କ୍ରମରେ ତନ୍ତଶାଳା ଯନ୍ତ୍ରାଂଶ ବଣ୍ଟନ କରାଯିବ ବୋଲି ସୂଚନା ଦିଆଯାଇଥିଲା। ବୈଷୟିକ ସହାୟକ ଶ୍ରୀକାନ୍ତ ମିଶ୍ର କାର୍ଯ୍ୟକ୍ରମକୁ ପରିଚାଳନା କରିଥିଲେ। କଞ୍ଚାମାଲ ଅଭାବ ସମ୍ପର୍କରେ ଉପନିର୍ଦ୍ଦେଶକ ମହାନ୍ତିଙ୍କୁ ପଚାରିବାରୁ ସେ କହିଛନ୍ତି, ପ୍ରତିକୂଳ ପାଣିପାଗ ପାଇଁ କୋଷା ଚାଷରେ କ୍ଷତି ହୋଇଛି। ଏହାଛଡା କୋଷା ଯୋଗାଣ କରୁଥିବା ସଂସ୍ଥା ସେରିଫେଡର ବୋର୍ଡ ନିର୍ବାଚନ ପାଇଁ ବିଜ୍ଞପ୍ତି ଜାରି କରାଯାଇଥିବାରୁ ଆଚରଣ ବିଧି ଲାଗୁ ହୋଇଛି। ନିର୍ବାଚନ ପରେ ଆଚରଣ ବିଧି ଉଠିଗଲେ ଟସର କୋଷା ଅଭାବୀକରଣ ଦୂର ହେବ।