ଗିନିଜ୍ ଓ୍ବାଲର୍ଡ ରେକର୍ଡ ସୃଷ୍ଟି କରିଥିବା ଆମେରିକାର ସବୁଠୁ ଉଚ୍ଚ ବ୍ୟକ୍ତି ଇଗୋର ଭୋଭ୍କୋଭିନ୍ସ୍କି ମାତ୍ର ୩୮ ବର୍ଷ ବୟସରେ ଦୁନିଆରୁ ସବୁଦିନ ପାଇଁ ବିଦାୟ ନେଇଛନ୍ତି। ୧୯୮୨ ମସିହା ସେପ୍ଟେମ୍ବର ୧୮ରେ ଇଗୋର ୟୁକ୍ରେନ୍ରେ ଜନ୍ମ ହୋଇଥିଲେ। ତେବେ ଚଳିତମାସ ୨୦ ତାରିଖରେ ତାଙ୍କର ମୃତ୍ୟୁ ଘଟିଛି। ଇଗୋର ତାଙ୍କ ଉଚ୍ଚତା ପାଇଁ ବିଶ୍ୱପ୍ରସିଦ୍ଧ ଥିଲେ। ତାଙ୍କର ଉଚ୍ଚତା ୭ ଫୁଟ ୮ ଇଞ୍ଚ ଥିଲା। ୟୁକ୍ରେନ୍ର ମୂଳବାସିନ୍ଦା ଇଗୋର ୭ ବର୍ଷ ବୟସରେ ରୋଗ ଭଲ କରିବାକୁ ଆମେରିକା ଆସିଥିଲେ। ଇଗୋରଙ୍କ ମା’ ସୋସିଆଲ ମିଡିଆରେ ତାଙ୍କ ଫଟୋ ଶେୟାର କରି ଏହି ଦୁଃଖଦ ଘଟଣା ସମ୍ପର୍କରେ ସୂଚନା ଦେଇଛନ୍ତି।
ଇଗୋର ନ୍ୟୁୟର୍କର ରୋଚେଷ୍ଟର ମେୟୋ ହସ୍ପିଟାଲରେ ପ୍ରାଣତ୍ୟାଗ କରିଛନ୍ତି। ତାଙ୍କ ମା’ ଫେସ୍ବୁକ୍ରେ ଫଟୋ ଶେୟାର କରିଛନ୍ତି। ଏଥିରେ ସେ ଶେଷଥର ପାଇଁ ତାଙ୍କ ପୁଅକୁ ଆଲିଙ୍ଗନ କରିଥିବାର ନଜର ଆସିଛନ୍ତି।
ଇଗୋରଙ୍କ ପିଟ୍ୟୁଟାରୀ ଗ୍ଲାଡରେ ଟ୍ୟୁମର ଯୋଗୁ ତାଙ୍କ ଦେହ ଖରାପ ହୋଇପଡ଼ିଥିଲା। ଇଗୋରଙ୍କ ମା’ ଶ୍ୱେତଲଓ୍ବାନା କହିଛନ୍ତି, ମୃତ୍ୟୁ ପୂର୍ବରୁ ଇଗୋର ପ୍ରଥମେ ତାଙ୍କ ବଡ଼ ଭାଇ, ଭାଉଜ ଏବଂ ଅନ୍ୟ ସମ୍ପର୍କୀୟଙ୍କ ସହ କଥା ହୋଇଥିଲେ। ଇଗୋର ଏମାନଙ୍କୁ ଦେଖି ବହୁତ ଖୁସି ହୋଇଥିଲେ। କିନ୍ତୁ କଥା କହିବାରେ ତାଙ୍କୁ ବହୁତ କଷ୍ଟ ହେଉଥିଲା। କିନ୍ତୁ ସେ ତାଙ୍କ ଭଣଜାଙ୍କ ସହ ଥଟ୍ଟାମଜା କରିବାକୁ ଚେଷ୍ଟା କରୁଥିଲେ ମଧ୍ୟ ପାରି ନ ଥିଲେ। ଯାହା ତାଙ୍କ ଚେହେରାରୁ ସ୍ପଷ୍ଟ ବାରି ହୋଇପଡୁଥିଲା।
୨୦୧୦ରେ ଇଗୋର ପ୍ରଥମଥର ସବୁଠୁ ଲମ୍ବା ବ୍ୟକ୍ତି ଭାବରେ ପରିଚୟ ପାଇଥିଲେ। ତାଙ୍କୁ ଏନେଇ ଗିନିଜ୍ ଓ୍ବାଲର୍ଡ ରେକର୍ଡର ପ୍ରମାଣପତ୍ର ମଧ୍ୟ ମିଳିଛି। ଏହା ପରେ ସେ ବହୁତ ଖୁସି ହୋଇଥିଲେ। ଇଗୋର ସାଧାରଣ ବ୍ୟକ୍ତିଙ୍କ ପରି ଜୀବନ ଜିଉଁଥିଲେ। କିଛି ମାସ ଧରି ତାଙ୍କ ସ୍ବାସ୍ଥ୍ୟ ଖରାପ ରହୁଥିଲା। ୩୮ ବର୍ଷ ବୟସରେ ସେ ପୂରା ପରିବାରକୁ ଛାଡ଼ି ଚାଲିଗଲେ। ଯାହାକି ତାଙ୍କ ପରିବାର ପାଇଁ ବହୁତ ବଡ଼ ଦୁଃଖ ବୋଲି ମା’ କୁହନ୍ତି।
