ନୂଆଦିଲ୍ଲୀ, ୭।୭- ଲେଗ୍ ସ୍ପିନର ପ୍ରବୀଣ ତାମ୍ବେ ପ୍ରଥମ ଭାରତୀୟ କ୍ରିକେଟର୍ ଭାବେ କାରବୀୟାନ ପ୍ରିମିୟର ଲିଗ୍ (ସିପିଏଲ୍)ରେ ଖେଳିବାର ସୁଯୋଗ ପାଇଛନ୍ତି। ସିପିଏଲ୍ ପକ୍ଷରୁ ଏହାର ୬ଟି ଫ୍ରାଞ୍ଚାଇଜ ସେମାନଙ୍କ ଖେଳାଳି ତାଲିକା ପ୍ରକାଶ କରିଛନ୍ତି। ଯେଉଁଥିରେ ୪୮ ବର୍ଷୀୟ ଏହି ଭାରତୀୟ ସ୍ପିନର ତ୍ରିନିବାଗୋ ନାଇଟ୍ ରାଇଡର୍ସ ଦଳରେ ସ୍ଥାନ ପାଇଛନ୍ତି। ନାଇଟ ରାଇଡର୍ସ ସହ ସେ ଚୁକ୍ତି କରିଥିବା ଜଣାପଡ଼ିଛି। ଫଳରେ ପ୍ରଥମ ଭାରତୀୟ ଭାବେ ତାମ୍ବେ ସିପିଏଲ୍ରେ ଖେଳିବାର ସୌଭାଗ୍ୟ ଲାଭ କରିଛନ୍ତି। ବଲିଉଡ୍ର ସୁପର୍ ଷ୍ଟାର୍ ଶାହରୁଖ ଖାନ ଏହି ଫ୍ରାଞ୍ଚାଇଜର ସହ-ମାଲିକ ରହିଛନ୍ତି। ଅଗଷ୍ଟ ୧୫ରୁ ସେପ୍ଟେମ୍ବର ୧୦ ପର୍ଯ୍ୟନ୍ତ ସିପିଏଲ୍ ଖେଳାଯିବ। ମୁମ୍ବାଇ କ୍ରିକେଟର୍ ତାମ୍ବେ ୨୦୧୩ରେ ଓଡ଼ିଶା ବିପକ୍ଷ ରଣ୍ଜୀ ଟ୍ରଫି ମ୍ୟାଚ୍ରେ ପଦାର୍ପଣ କରି ତାଙ୍କ ପ୍ରଥମ ଶ୍ରେଣୀ କ୍ୟାରିୟର ଆରମ୍ଭ କରିଥିଲେ। ସେତେବେଳେ ତାଙ୍କୁ ୪୧ ବର୍ଷ ହୋଇଥିଲା। ସେ ମାତ୍ର ୨ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ୨ଟି ଉଇକେଟ୍ ନେଇଛନ୍ତି। ତେବେ ଆଇପିଏଲ୍ରେ ତାଙ୍କର ପ୍ରଭାବୀ ପ୍ରଦର୍ଶନ ରହିଛି। ୨୦୧୩ରେ ରାଜସ୍ଥାନ ପକ୍ଷରୁ ତାମ୍ବେ ଆଇପିଏଲ୍ ପଦାର୍ପଣ କରିଥିଲେ। ଆଇପିଏଲ୍ରେ ସେ ୩୩ ମ୍ୟାଚ୍ ଖେଳି ୨୮ ଉଇକେଟ୍ ନେଇଛନ୍ତି। ସିପିଏଲ୍ ଖେଳିବା ଫଳରେ ତାମ୍ବେ ଆଇପିଏଲ୍ର ଆଗାମୀ ସିଜନରେ ଅଂଶଗ୍ରହଣ କରିବା ଏକପ୍ରକାର ଅନିଶ୍ଚିତତା ଦେଖାଦେଇଛି। ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) କୌଣସି ଭାରତୀୟ କ୍ରିକେଟର୍ଙ୍କୁ ବିଦେଶୀ ଟି୨୦ ଲିଗ୍ ଖେଳିବାକୁ ଅନୁମତି ପ୍ରଦାନ କରିନାହିଁ। ତେଣୁ ତାମ୍ବେଙ୍କ ଆଇପିଏଲ୍ କ୍ୟାରିୟର ଶେଷ ହୋଇଯାଇଛି କହିଲେ ଅତ୍ୟୁକ୍ତି ହେବ ନାହିଁ।