ଚେନ୍ନାଇ,୭।୫: ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ୍ଙ୍କ ଉଦାରତା ସାମ୍ନାକୁ ଆସିଛି। ସରକାରୀ ବସ୍ରେ ସାଧାରଣ ଜନତାଙ୍କ ସହ ଯାତ୍ରା କଲେ ଷ୍ଟାଲିନ୍। ଯାହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ଷ୍ଟାଲିନ୍ ସରକାର ଶନିବାର ନିଜର ଗୋଟିଏ ବର୍ଷ ପୂରଣ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ଷ୍ଟାଲିନ୍ ଶନିବାର ଚେନ୍ନାଇର ମାରିନା ବେଳାଭୂମିର କରୁଣାନିଧି ମେମୋରିଆଲରୁ ଆନ୍ନା ମେମୋରିଆଲ ପର୍ଯ୍ୟନ୍ତ ଏକ ସରକାରୀ ବସ୍ରେ କିଛି ସମୟ ପାଇଁ ଯାତ୍ରା କରିଥିଲେ। ସେ ବସ୍ ନଂ ୨୯ସିରେ ରାଧାକୃଷ୍ଣ ସଲାଇରୁ ଚଢ଼ିଥିଲେ। ଏହି ସମୟରେ ଯାତ୍ରୀମାନେ ତାଙ୍କୁ ଦେଖି ଚମକିପଡ଼ିଥିଲେ। ଷ୍ଟାଲିନ୍ ଯାତ୍ରୀମାନଙ୍କୁ ସହ ଟିକେଟ ଓ ସୁବିଧା ବିଷୟରେ ଆଲୋଚନା କରିଥିଲେ। ବିଶେଷକରି ମହିଳାମାନଙ୍କୁ ସରକାରୀ ବସ୍ରେ ଦିଆଯାଇଥିବା ମାଗଣା ଯାତ୍ରା ସୁବିଧା ବିଷୟରେ ଷ୍ଟାଲିନ୍ ପଚାରି ବୁଝିଥିଲେ। ବସ୍ରେ ଯାତ୍ରା କରିବା ପରେ ଷ୍ଟାଲିନ୍ ତାମିଲନାଡୁ ବିଧାନସଭାରେ ପହଞ୍ଚି ତାଙ୍କ ସରକାରର ଏକ ବର୍ଷ ପୂର୍ତ୍ତି ପାଇଁ ଅନେକ ଜନକଲ୍ୟାଣ ଘୋଷଣା କରିଥିଲେ। ବସ୍ ଯାତ୍ରା ସମୟରେ ମୁଖ୍ୟମନ୍ତ୍ରୀ ଷ୍ଟାଲିନ ଯାତ୍ରୀମାନଙ୍କ ସହ ତାଙ୍କ ସରକାର ଏବଂ ବସ୍ ସେବା ବିଷୟରେ ଆଲୋଚନା କରିଥିଲେ। ସୂଚନା ମୁତାବକ, ଗତ ବର୍ଷ ମେ’ ୭ରେ ଏମ୍.କେ ଷ୍ଟାଲିନ୍ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ସେ ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ହୋଇଛନ୍ତି। ୨୦୨୧ ତାମିଲନାଡୁ ବିଧାନସଭା ନିର୍ବାଚନରେ ଡିଏମ୍କେ ଏକ ବଡ଼ ବିଜୟ ହାସଲ କରିଥିଲା। ଏପ୍ରିଲ ୨୦୨୧ ବିଧାନସଭା ନିର୍ବାଚନ ପୂର୍ବରୁ ରାଜ୍ୟରେ ମହିଳାମାନଙ୍କ ପାଇଁ ମାଗଣା ବସ୍ ଯାତ୍ରା ଯୋଗାଇଦେବାକୁ ଶାସକ ଦଳ ଡିଏମକେ ପ୍ରତିଶୃତି ଦେଇଥିଲା।