ଚେନ୍ନାଇ,୨୬।୩: ତାମିଲନାଡୁ ବିଧାନସଭା ନିର୍ବାଚନ ପୂର୍ବରୁ ପ୍ରାର୍ଥୀମାନେ ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଛନ୍ତି। ଭୋଟରଙ୍କୁ ନିଜ ଆଡକୁ ଆଣିବା ପାଇଁ ପ୍ରାର୍ଥୀମାନେ ପ୍ରତିଦିନ ପ୍ରଚାର କରିବାର ନୂତନ ପଦ୍ଧତି ଅବଲମ୍ବନ କରୁଛନ୍ତି। କେହି କେହି ଭୋଟରଙ୍କ ପୋଷାକ ଧୋଉଛନ୍ତି ତ ଆଉ କେହି କେହି ନଡ଼ିଆ ଭାଙ୍ଗି ଭୋଟରଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରୁଛନ୍ତି। ରୋୟାପୁରମ ଆସନରୁ ଏଆଇଡିଏମ୍କେ ପ୍ରାର୍ଥୀ ଡି ଜୟକୁମାର ରାସ୍ତା କଡ଼ରେ ଏକ ହ୍ୟାଣ୍ଡ ପମ୍ପ ଚଳାଇ ମହିଳାଙ୍କ ପାତ୍ରରେ ପାଣି ଭର୍ତ୍ତି କରୁଥିବା ଦେଖିବାକୁ ମିଳିଥିଲା। ରାଜ୍ୟ ସରକାରରେ ମତ୍ସ୍ୟ ବିଭାଗର ମନ୍ତ୍ରୀ ଜୟକୁମାର ଦଳର ପ୍ରତିଷ୍ଠାତା ଏମ.ଜି ରାମଚନ୍ଦ୍ରନଙ୍କ ପରିଚୟ ଥିବା ଟୋପି ପିନ୍ଧି ପ୍ରଚାର କରୁଛନ୍ତି। ସେ ସାଇକେଲ ଏବଂ ରିକ୍ସାରେ ବସି ଭୋଟରଙ୍କ ନିକଟରେ ପହଞ୍ଚିଛନ୍ତି। ନିର୍ବାଚନ ପ୍ରଚାର ସମୟରେ ଡିଏମଏମ ପ୍ରାର୍ଥୀ ଏଭିଏମ ପ୍ରଭାକର ରାଜା ଗରମ ଗରମ ଦୋସା ପ୍ରସ୍ତୁତ କରି ଲୋକଙ୍କୁ ଖୁଆଉଥିବା ଦେଖାଯାଇଛି। ମକ୍କଲ ନିଧି ମୟିୟମ ପ୍ରାର୍ଥୀ ପ୍ରିୟଦର୍ଶିନୀ ଏଗମୋର ରାସ୍ତାରେ ମସଲାଯୁକ୍ତ ମାଛ ରାନ୍ଧି ଭୋଟରଙ୍କୁ ସେମାନଙ୍କ ସପକ୍ଷରେ ଭୋଟ ଦେବାକୁ ଅନୁରୋଧ କରିଥିଲେ। ସୂଚନାଯୋଗ୍ୟ, ୨୩୪ ଆସନ ବିଶିଷ୍ଟ ବିଧାନସଭାର ନିର୍ବାଚନ ଏପ୍ରିଲ ୬ରୁ ଅନୁଷ୍ଠିତ ହେବ।
