ସାଲେମ,୨୨।୧: ସଦ୍ୟ ସମାପିତ ଅଷ୍ଟ୍ରେଲିଆ ସିରିଜ୍ ଜିତି ସ୍ବଦେଶ ଫେରିଛି ଭାରତୀୟ ଦଳ। ଭାରତୀୟ ଦଳକୁ ନିଜ ନିଜ ରାଜ୍ୟରେ ଭବ୍ୟ ସ୍ବାଗତ କରାଯାଇଛି। ଏହି କ୍ରମରେ ବୋଲର ଟି.ନଟରାଜନଙ୍କୁ ତାଙ୍କ ଗ୍ରାମରେ ଜୋରଦାର ସ୍ବାଗତ କରାଯାଉଥିବା ଭିଡିଓ ପୂର୍ବତନ କ୍ରିକେଟର ବୀରେନ୍ଦ୍ର ସେହ୍ବାଗ ସୋସିଆଲ ମିଡିଆରେ ଭାଇରାଲ କରିଛନ୍ତି। ଭିଡିଓରେ ନଟରାଜନଙ୍କୁ ଘୋଡା ରଥରେ ବସାଇ ଘରକୁ ପାଛୋଟି ନେଇଥିଲେ। ରଥରେ ବସିଥିବାବେଳେ ନଟରାଜନ ହାତରେ ତ୍ରିରଙ୍ଗା ଧରିଥିଲେ। ତାଙ୍କୁ ଦେଖିବାକୁ ପ୍ରବଳ ଭିଡ ଜମିଥିଲା। ନଟରାଜନଙ୍କ ଖୁସି ଏବେ ଦ୍ୱିଗୁଣିତ ରହିଛି। କାରଣ ନିକଟରେ ସେ କନ୍ୟା ସନ୍ତାନର ପିତା ହେବାର ସୌଭାଗ୍ୟ ଲାଭ କରିଛନ୍ତି।
ସୂଚନାଯୋଗ୍ୟ, ଭାରତୀୟ ପ୍ରିମିୟର ଲିଗର ୧୩ତମ ସିଜିନରେ ନିଜ ବୋଲିଂରେ ସମସ୍ତଙ୍କୁ ପ୍ରଭାବିତ କରିଥିବା ଟି ନଟରାଜନ ଆଇପିଏଲ ୨୦୨୦ରେ ୟର୍କରରେ ବଡ କିମ୍ବଦନ୍ତୀକୁ ଆଉଟ କରିଥିଲେ। ତାମିଲନାଡୁ ବୋଲର ଆଇପିଏଲ ୨୦୨୦ରେ ୧୬ଟି ମ୍ୟାଚରେ ୮.୨ ଆଭରେଜ୍ରେ ସହ ୧୬ ଉଇକେଟ ନେଇଥିଲେ। ଆଇପିଏଲର ଏହି ପ୍ରଦର୍ଶନକୁ ଆଧାର କରି ସେ ଅଷ୍ଟ୍ରେଲିଆ ଗସ୍ତ ପାଇଁ ଭାରତୀୟ ଦଳରେ ମନୋନୀତ ହୋଇଥିଲେ।