ଚେନ୍ନାଇ,୩୦।୭: ଦେଶରେ କରୋନା ଦ୍ୱିତୀୟ ଲହର ସଂକ୍ରମଣ ଧୀରେ ଧୀରେ ନିୟନ୍ତ୍ରଣକୁ ଆସୁଛି। ହେଲେ ଅନେକ ରାଜ୍ୟରେ ସମ୍ଭାବ୍ୟ ତୃତୀୟ ଲହର ସଂକ୍ରମଣର ଆଭାସ ଦେଖାଦେଲାଣି। ତେଣୁ କରୋନା ପ୍ରକୋପକୁ ଦୃଷ୍ଟିରେ ରଖି ତାମିଲନାଡୁ ସରକାର ଶୁକ୍ରବାର ରାଜ୍ୟରେ ଲକ୍ଡାଉନ ଅବଧିକୁ ବୃଦ୍ଧି କରିଛନ୍ତି। ଅଗଷ୍ଟ ୯ଯାଏ ରାଜ୍ୟରେ ଲକ୍ଡାଉନ କଟକଣାକୁ ବୃଦ୍ଧି କରାଯାଇଛି। ହେଲେ ଚଳିତଥର ସରକାର କେତେକ କଟକଣାକୁ କୋହଳ କରିଛନ୍ତି। ପୂର୍ବଭଳି ରାଜ୍ୟରେ କଟକଣା ଜାରି ରହିବା ସହ ରବିବାର ସମ୍ପୂର୍ଣ୍ଣ ଲକ୍ଡାଉନ ରହିବ। କଣ୍ଟେନମେଣ୍ଟ ଜୋନ୍କୁ ଛାଡ଼ିଦେଲେ ଅନ୍ୟସ୍ଥାନରେ ସମସ୍ତ ଗତିବିଧି ଜାରି ରହିବ। ଏଥିସହ ଆଇଟିଆଇ, ଇଣ୍ଡଷ୍ଟ୍ରିଆଲ୍ ସ୍କୁଲ ଓ ଟାଇପ୍ ରାଇଟ୍ ଟ୍ରେନିଂ ଇନ୍ଷ୍ଟିଚ୍ୟୁଟ ୫୦ପ୍ରତିଶତ ଛାତ୍ରୀଛାତ୍ରଙ୍କୁ ନେଇ ଖୋଲା ରହିବ। ଏହି ସମୟରେ କେରାନା ପ୍ରୋଟୋକଲ କଡ଼ା ଭାବେ ପାଳନ କରାଯିବାକୁ ନିର୍ଦ୍ଦେଶ ଦିଆଯାଇଛି। ବର୍ତ୍ତମାନ ରାଜ୍ୟରେ ସ୍କୁଲ, କଲେଜ, ବାର, ଥିଏଟର ଓ ସୁଇମିଂ ପୁଲ ବନ୍ଦ ରହିବ। ପୁଡୁଚେରୀ ବ୍ୟତୀତ ଅନ୍ତଃ ରାଜ୍ୟ ସରକାରୀ ଓ ବେସରକାରୀ ବସ ଚଳାଚଳ ବନ୍ଦ ରହିବ। ତେବେ ବିବାହ ସମୟରେ ୫୦ ଓ ଅନ୍ତିମ ସଂସ୍କାରରେ ଅତିବେଶିରେ ୨୦ଜଣ ସାମିଲ ହୋଇପାରିବେ। ସୂଚନାଯୋଗ୍ୟ, ଦୀର୍ଘ ଦିନ ପରେ ତାମିଲନାଡୁରେ କରୋନା ସଂକ୍ରମଣର ନୂଆ ମାମଲା ବୃଦ୍ଧି ପାଇଛି। ଗତ ୨୪ଘଣ୍ଟା ମଧ୍ୟରେ ତାମିଲନାଡୁରେ ୬,୯୭୨ ନୂଆ କରୋନା ମାମଲା ଚିହ୍ନଟ ହୋଇଥିବା ବେଳେ ଏଥିରେ ୮୮ଜଣଙ୍କ ମୃତ୍ୟୁ ହୋଇଛି। ତେବେ ବର୍ଦ୍ଧିତ କରୋନା ମାମଲାକୁ ଦୃଷ୍ଟିରେ ରଖି ରାଜ୍ୟସରକାର ଲକ୍ଡାଉନ ବଢ଼ାଇବାକୁ ନିଷ୍ପତ୍ତି ନେଇଛନ୍ତି।