ଚେନ୍ନାଇ,୨୩।୫: ଦେଶରେ କରୋନାର ଦ୍ୱିତୀୟ ଲହର ଯୋଗୁ ଲୋକଙ୍କୁ ନାହିଁ ନ ଥିବା ଅସୁବିଧାର ସାମ୍ନା କରିବାକୁ ପଡୁଛି। କରୋନା ଯୋଗୁ ବିଭିନ୍ନ ରାଜ୍ୟରେ ଲକ୍ଡାଉନ୍ ଘୋଷଣା କରାଯାଇଛି। ଏହାର ପ୍ରଭାବ ଶ୍ରମିକମାନଙ୍କ ଉପରେ ପଡିଛି। ଏହି ସବୁ ଅସୁବିଧା ମଧ୍ୟରେ ତାମିଲନାଡୁର ଜଣେ ଫଳ ବିକ୍ରେତା ଶ୍ରମିକମାନଙ୍କ ପାଇଁ ନୂଆ କିଛି କରିଛନ୍ତି। ତାମିଲନାଡୁର ଥୋଥୁକୁଡି ଜିଲାର କୋଭିଲପଟ୍ଟିରେ ଫଳ ଦୋକାନ ବନ୍ଦ ହେବା ସତ୍ତ୍ୱେ ମାଲିକ ମୁଥୁପାଣ୍ଡି ଦୋକାନ ବାହାରେ କଦଳୀ ଝଲାଇ ରଖିଛନ୍ତି। ମୁଥୁପାଣ୍ଡି ମଧ୍ୟ ତାଙ୍କ ଦୋକାନ ବାହାରେ ଏକ ପୋଷ୍ଟର ରଖିଛନ୍ତି, ଯେଉଁଥିରେ ଲେଖା ଅଛି- ଯଦି ତୁମେ ଭୋକିଲା, ତେବେ ତୁମେ ସେଗୁଡ଼ିକୁ ମାଗଣାରେ ଖାଇ ପାରିବ, ଦୟାକରି ନଷ୍ଟ କର ନାହିଁ।
ସୂଚନାଯୋଗ୍ୟ, ମୁଥୁପାଣ୍ଡି ଏହି ଦୋକାନକୁ ଭଡା ଘରେ ଚଲାଇଥାନ୍ତି। ସେ ଗତ ଦୁଇ ବର୍ଷ ଧରି କୋଭିଲପାଣ୍ଡିରେ ଏହି ଦୋକାନ ଚଳାଉଥିଲେ। ପ୍ରତିଦିନ ଯେତେବେଳେ ସେ ଦୋକାନ ବନ୍ଦ କରନ୍ତି, କଦଳୀଗୁଡିକୁ ଦୋକାନ ବାହାରେ ଝୁଲାଇ ରଖିଥାନ୍ତି। ଅନେକ ଭୋକିଲା ଲୋକ, କ୍ଳାନ୍ତ ଯାତ୍ରୀ ଏବଂ ପିଲାମାନେ ଦୋକାନକୁ ଆସି ସେଗୁଡିକୁ ଖାଇକି ଯାଆନ୍ତି। ମୁଥୁପାଣ୍ଡି କହିଛନ୍ତି ଯେ କରୋନା ମହାମାରୀର ଏହି ସଙ୍କଟରେ ଅନେକ ଲୋକଙ୍କର ରୋଜଗାର ନାହିଁ। ଏପରି ପରିସ୍ଥିତିରେ, ମୁଁ ମୋ ତରଫରୁ ସାହାଯ୍ୟ କରିବାକୁ ଯାହା କରିପାରିବି ତାହା କରୁଛି। ମୁଁ ଚାହୁଁଛି ଏହି ପ୍ରୟାସର ଲାଭ ଯେଉଁମାନେ ପ୍ରକୃତରେ ଭୋକରେ ଅଛନ୍ତି ଏବଂ ଖାଦ୍ୟ ପାଇଁ କଦଳୀ ନେବାକୁ ଚାହୁଁଛନ୍ତି ସେମାନେ ଉପକୃତ ହୁଅନ୍ତୁ ବୋଲି ସେ କହିଛନ୍ତି।