ମଣିଷ ନିଜର ସୁବିଧା ପାଇଁ ବନ୍ୟଜନ୍ତୁଙ୍କ ବାସସ୍ଥାନ ନଷ୍ଟ କରିବାରେ ଲାଗିଛି। ଫଳରେ ପଶୁପକ୍ଷୀମାନେ ପଣଜଙ୍ଗଲ ଛାଡି ଜନବସତି ମଧ୍ୟକୁ ପଶିଆସୁଛନ୍ତି। ଏପରି ଏକ ଘଟଣା କ୍ରମରେ ତାମିଲନାଡୁର ଶିବଗାଙ୍ଗ ନିକଟରେ ଥିବା ଏକ ଗ୍ରାମରେ ପକ୍ଷୀ ପାଇଁ ଲୋକମାନଙ୍କ ବଳିଦାନ ଚର୍ଚ୍ଚାର ବିଷୟ ପାଲଟିଛି। ଉକ୍ତ ଗ୍ରାମରେ ଥିବା ଷ୍ଟ୍ରିଟ୍ ଲାଇଟ୍ ସୁଇଜ୍ ବୋର୍ଡରେ ଏକ ପକ୍ଷୀ ବସା କରି ଅଣ୍ଡା ଦେଇଥିଲା। ଏହା ଜାଣିବା ପରେ ଗ୍ରାମବାସୀ ଷ୍ଟ୍ରିଟ୍ ଲାଇଟ୍ ଲଗାଇବା ବନ୍ଦ କରିଦେଇଥିଲେ। ଦୀର୍ଘ ୩୫ ଦିନ ପର୍ଯ୍ୟନ୍ତ ସେମାନେ ଆଉ ଲାଇଟ୍ ଲଗାଇ ନ ଥିବା ଜଣାପଡ଼ିଛି।
ଲକ୍ଡାଉନ୍ ଆରମ୍ଭରୁ ଷ୍ଟ୍ରିଟ୍ ଲାଇଟ୍ ସୁଇଜ୍ ବୋର୍ଟରେ ଚଢ଼େଇ ବସା ହୋଇଥିବା ଗ୍ରାମବାସୀ ଦେଖିବାକୁ ପାଇଥିଲେ। ଏହି ବସାରେ ୩ଟି ନୀଳ ଏବଂ ସବୁଜ ରଙ୍ଗର ଅଣ୍ଡା ଥିଲା। ଜଣେ ବ୍ୟକ୍ତି ଏହାର ଫଟୋ ଉଠାଇ ଗାଁ ହ୍ବାଟସ୍ଆପ୍ ଗ୍ରୁପ୍ରେ ଛାଡିଥିଲେ। ଏହାପରେ ଗ୍ରାମରେ ଏକ ମିଟିଂ ବସିଥିଲା। ଅଣ୍ଡାରୁ ଛୁଆ ହୋଇ ସେ ଟିକେ ବଡ଼ ହେବା ପର୍ଯ୍ୟନ୍ତ କେହି ସୁଇଜ୍ ଲଗାଇବେ ନାହିଁ ବୋଲି ନିଷ୍ପତ୍ତି ନିଆଗଲା। କିଛି ଲୋକ ଏହାର ବିରୋଧ ମଧ୍ୟ କରିଥିଲେ । ମାତ୍ର ଗ୍ରାମବାସୀ ବୁଝାଇବା ପରେ ସେମାନେ ମଧ୍ୟ ଏଥିରେ ରାଜି ହୋଇଯାଇଥିଲେ। ଫଳରେ ୩୫ ଦିନ ପର୍ଯ୍ୟନ୍ତ ଗାଁ ଅନ୍ଧାରରେ ରହିଥିଲା।
