ପୁରୁଷୋତ୍ତମପୁର, ୨/୧୦(ଡିଏନଏ): ଗଞ୍ଜାମ ଜିଲା ତଥା ଦକ୍ଷିଣ ଓଡିଶାର ପ୍ରସିଦ୍ଧ ଇଷ୍ଟ ଦେବୀ ମା ତାରାତାରିଣୀଙ୍କ ପୀଠରେ ରବିବାର ମହାଷ୍ଟମୀ ପର୍ବ ଲାଗି ଲକ୍ଷାଧିକ ଭକ୍ତଙ୍କ ସମାଗମ ହୋଇଛି। ମାତ୍ର ଏଠାରେ କିଛି ସେବାୟତଙ୍କ ଦୌରାତ୍ମ୍ୟ ଲାଗି ରହିଛି। ସେମାନେ ଭକ୍ତଙ୍କୁ ଅସଦବ୍ୟବହାର ପ୍ରଦର୍ଶନ କରିବାରେ ଲାଗିଛନ୍ତି। ଏହାକୁ ନେଇ ଭକ୍ତମାନେ ଅତିଷ୍ଠ ହୋଇପଡିଛନ୍ତି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଏହାକୁ ନେଇ ଉପସ୍ଥିତ ଗଣମାଧ୍ୟମ ପ୍ରତିନିଧିମାନେ ନିର୍ବାହୀ ଅଧିକାରୀଙ୍କ ଦୃଷ୍ଟି ମଧ୍ୟ ଆକର୍ଷଣ କରିଛନ୍ତି। ସୂଚନାଯୋଗ୍ୟ, ଗତ ୨୦୨୦ମସିହାରେ ଏଭଳି କିଛି ସେବାୟତ ଭକ୍ତଙ୍କୁ ଅସଦବ୍ୟବହାର କରିଥିଲେ। ଦକ୍ଷିଣା ନଦେବାରୁ ଖଣ୍ଡାରେ ହାଣି ପକାଇଥିଲେ। ଏହାକୁ ନେଇ ପୋଲିସ ଦୁଇ ଜଣ ସେବାୟତଙ୍କୁ ଗରିଫ ମଧ୍ୟ କରିଥିଲେ।
ସେବାୟତଙ୍କ ଦୌରାତ୍ମ୍ୟ ଯୋଗୁ ଭକ୍ତମାନେ ମାଙ୍କ ପୀଠକୁ ଆସିବା ଲାଗି କୁଣ୍ଠାବୋଧ କରିଥିଲେ। ଏହି ଘଟଣାକୁ ନେଇ ସେତେବେଳେ ପ୍ରଶାସନ ସେବାୟତଙ୍କୁ କଡା କାର୍ଯ୍ୟାନୁଷ୍ଠାନର ଚେତାବନୀ ଦେଇଥିଲେ। ଏହା ପରଠାରୁ କିଛି ଦିନ ହେଲା ଠିକ ଚାଲିଥିବା ବେଳେ ପୁଣି କିଛି ସେବାୟତ ସେମାନଙ୍କ ଦୌରାତ୍ମ୍ୟ ଆରମ୍ଭ କରିଦେଇଛନ୍ତି। ଏଣୁ ତୁରନ୍ତ ଜିଲା ପ୍ରଶାସନ ଓ ସ୍ଥାନୀୟ ପ୍ରଶାସନ ଏ ଦିଗରେ ଦୃଷ୍ଟି ଦେଇ ଏଭଳି କାର୍ଯ୍ୟ କରୁଥିବା ସେବାୟତଙ୍କ ବିରୋଧରେ କଡା ପଦକ୍ଷେପ ନେବା ଜରୁରୀ ହୋଇ ପଡିଛି ବୋଲି ସାଧାରଣରେ ଦାବି ହେଉଛି।
ଭୋର ସକାଳ ୪ଟା ୩୦ରେ ମନ୍ଦିର ଦ୍ୱାର ଫିଟା ଯାଇ ମଙ୍ଗଳ ଆଳତି, ଅବକାଶ , ମାଜଣା ,ମହା ଆଳତି ପରେ ସକାଳ ୭ଟା ୨୦ ରେ ସାହାଣ ମେଲା ହୋଇଥିଲା। ମା ତାରାତାରିଣୀ ଦୁଇ ଭଉଣୀ ମହାଗୌରୀ ବେଶରେ ଭକ୍ତଙ୍କୁ ଦର୍ଶନ ଦେଇଥିଲେ। ଏହା ପରେ ମୁଖ୍ୟ ପୁରୋହିତ ପଣ୍ଡିତ ସୀମାଞ୍ଚଳ ଦାଶ ଶର୍ମାଙ୍କ ଦ୍ୱାରା ଚଣ୍ଡି ପାଠ, ହୋମ, ଯଜ୍ଞ ଆରମ୍ଭ ହୋଇଥିଲା। ସେବାୟତ ସଂଘ ସଭାପତି ତପନ କୁମାର ରଣା, ବାପୁଜୀ ରଣା, ଧ୍ରୁବରଣାଙ୍କ ସମେତ ସମସ୍ତ ସେବାୟତଙ୍କ ଦ୍ୱାରା ମନ୍ଦିରରେ ପୂଜାର୍ଚ୍ଚନା ଲାଗି ରହିଛି।
ମନ୍ଦିର ନିର୍ବାହୀ ଅଧିକାରୀ ଟିକେ ରେଡି,ତହସିଲଦାର ସନ୍ତୋଷ କୁମାର ସାହୁ, ଥାନା ଆଇଆଇସି ପ୍ରିୟସ ରଞ୍ଜନ ଛୋଟରାୟଙ୍କ ସମେତ ପୋଲିସ ଫୋର୍ସ ମୁତୟନ ରହି ଟ୍ରାଫିକ ଓ ଆଇନ ଶୃଙ୍ଖଳାକୁ ନିୟନ୍ତ୍ରଣ କରୁଛନ୍ତି।
