ନୂଆଦିଲ୍ଲୀ : ସରକାର ରାଷ୍ଟ୍ରାୟତ୍ତ ଏୟାର ଇଣ୍ଡିଆର ଘରୋଇକରଣ ଲାଗି ପ୍ରକ୍ରିୟା ଜାରି ରଖିଛନ୍ତି। ସୋମବାର ସୁଦ୍ଧା ଏହି ବିମାନ କମ୍ପାନୀ ନିଲାମ ପ୍ରକ୍ରିୟାରେ ଭାଗନେବା ଲାଗି ଏକ୍ସପ୍ରେଶନ ଅଫ୍ ଇଣ୍ଟରେଷ୍ଟ(ଇଓଆଇ) ବା ଆଗ୍ରହ ପତ୍ର ଦାଖଲ କରିବାର ସୀମା ଧାର୍ଯ୍ୟ କରାଯାଇଥିଲା। ଏହି ବିମାନ କମ୍ପାନୀ ଲାଗି ଏକାଧିକ ଇଓଆଇ ହସ୍ତଗତ ହୋଇଥିବା ସରକାର ସ୍ପଷ୍ଟ କରିଛନ୍ତି। ଏୟାର ଇଣ୍ଡିଆ ଅଧିଗ୍ରହଣ ଦୌଡ଼ରେ ରହିଥିବା ପ୍ରମୁଖ ଦାବିଦାର ମଧ୍ୟରେ ଟାଟା ଗ୍ରୁପ୍ ଆଗରେ ରହିଛି। ଏୟାର ଇଣ୍ଡିଆକୁ ଟାଟା ଗ୍ରୁପ୍ ପ୍ରଥମେ ସ୍ଥାପନ କରିଥିଲା। ହେଲେ ପରବର୍ତ୍ତୀ ସମୟରେ ଏହା ସରକାରଙ୍କ ହେପାଜତକୁ ଆସିଛି। ଟାଟା ଗ୍ରୁପ୍ ଏୟାର ଏସିଆ ସହାୟତାରେ ଇଓଆଇ ଦାଖଲ କରିଥିବା ଜଣାପଡିଛି। ଉଲ୍ଲେଖଯୋଗ୍ୟ, ଏୟାର ଏସିଆ ସହ ମିଳିତ ହୋଇ ଯୌଥ ଉଦ୍ୟୋଗରେ ଟାଟା ଭାରତରେ ବିମାନ ସେବା ଯୋଗାଉଛି।
ଏହାକୁ ବିଚାରକଲେ ଏୟାର ଇଣ୍ଡିଆର ପୁଣି ଥରେ ଘର ବାହୁଡା ହୋଇପାରେ ବୋଲି କୁହାଯାଉଛି। ଟାଟା ଗ୍ରୁପ୍ ବାଦ୍ ଏୟାର ଇଣ୍ଡିଆର ଏକ କର୍ମଚାରୀ ଗୋଷ୍ଠୀ, ନ୍ୟୁୟର୍କରେ ବସବାସ କରୁଥିବା ଭାରତୀୟ ବଂଶୋଦ୍ଭବ ଏବଂ ମଧ୍ୟ ଏୟାର ଇଣ୍ଡିଆ ଲାଗି ଆଗ୍ରହ ଦେଖାଇଛନ୍ତି। ସ୍ପାଇସ ଜେଟ୍ ପ୍ରମୋଟର ଅଜୟ ସିଂ ଏହି ଧାରାରେ ସାମିଲ ହେବେ କି ନାହିଁ ସେ ନେଇ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇ ନାହିଁ। ସରକାରଙ୍କ ପକ୍ଷରୁ ଏକ ଟୁଇଟରେ କୁହାଯାଇଛି, ଏୟାର ଇଣ୍ଡିଆ ଘରୋଇକରଣ ଲାଗି ଏକାଧିକ ଆଗ୍ରହ ପତ୍ର ହସ୍ତଗତ ହୋଇଛି। ଏଥିଲାଗି ବର୍ତ୍ତମାନ ଦ୍ୱିତୀୟ ପର୍ଯ୍ୟାୟ କାର୍ଯ୍ୟପନ୍ଥା ହାତକୁ ନିଆଯାଉଛି। ଟ୍ରାଞ୍ଜାକଶନ ବର୍ତ୍ତମାନ ଦ୍ୱିତୀୟ ପର୍ଯ୍ୟାୟରେ ରହିଥିବା ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ (ଦୀପମ) ପକ୍ଷରୁ ସ୍ପଷ୍ଟ କରାଯାଇଛି।
ସୂଚନାଯୋଗ୍ୟ, ଟାଟା ଗ୍ରୁପ୍ ଗତ ସପ୍ତାହରେ ଏୟାର ଇଣ୍ଡିଆ ନିଲାମରେ ଭାଗନେବା ଲାଗି ପଦକ୍ଷେପ ନେଇଛି। ବିଡିଂରେ ଟାଟା ଗ୍ରୁପ୍ ସଫଳ ହେଲେ ୬୭ ବର୍ଷ ପରେ ପରେ ପୁଣି ଏୟାର ଇଣ୍ଡିଆ ଟାଟା ଗ୍ରୁପ୍କୁ ଫେରିବ। ସରକାର ୨୦୧୮ରେ ଏୟାର ଇଣ୍ଡିଆକୁ ବିକ୍ରି କରିବା ଲାଗି ପ୍ରକ୍ରିୟା ଆରମ୍ଭ କରିଥିଲେ। ହେଲେ ଏଥିଲାଗି କୌଣସି କମ୍ପାନୀ ଆଗ୍ରହ ଦେଖାଇ ନ ଥିଲେ। ମାତ୍ର ଚଳିତ ଥର କିଛି କମ୍ପାନୀ ଏ ନେଇ ଆଗେଇ ଆସିଛନ୍ତି।
୧୯୫୩ରେ ଏୟାର ଇଣ୍ଡିଆ ଘରୋଇକରଣ ହୋଇଥିଲା
୧୯୩୨ରେ ଟାଟା ଗ୍ରୁପ୍ ଟାଟା ଏୟାର ଲାଇନ୍ସ ନାମରେ ଏକ ବିମାନ କମ୍ପାନୀ(ବର୍ତ୍ତମାନର ଏୟାର ଇଣ୍ଡିଆ) ଆରମ୍ଭ କରିଥିଲା। ୧୯୫୩ରେ ଭାରତ ସରକାର ଏହି ବିମାନ କମ୍ପାନୀ ନିଜ ଅଧିକାରୀ କ୍ଷେତ୍ରକୁ ନେଇଥିଲେ। ଗତ ବର୍ଷ ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ କହିଥିଲେ, ଏୟାର ଇଣ୍ଡିଆ ଘରୋଇକରଣ ନ ହେଲେ ବନ୍ଦ ହୋଇଯିବ। ପୁରୀ ପୁଣି ରବିବାର କହିଛନ୍ତି, ଏୟାର ଇଣ୍ଡିଆର ଘରୋଇକରଣ ଏକ ଗୋପନୀୟ ପ୍ରକ୍ରିୟା। ଆଗାମୀ କାର୍ଯ୍ୟପନ୍ଥା ସମ୍ପର୍କରେ ଦୀପମ ଅବଗତ କରାଇବ ବୋଲି ମତ ରଖିଥିଲେ।