ନୂଆଦିଲ୍ଲୀ, ୧୫।୮: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଆସନ୍ତା ମାସରୁ ୟୁଏଇରେ ଆରମ୍ଭ ହେବ। ଏଥିଲାଗି ଆଇପିଏଲ୍ର ଟାଇଟଲ୍ ପ୍ରାୟୋଜକ ଦୌଡ଼ରେ ଟାଟା ଗ୍ରୁପ୍ ସାମିଲ ହୋଇଛି। ବିଶ୍ୱର ଏହି ବ୍ୟୟବହୁଳ ଟି୨୦ ଲିଗ୍ର ଟାଇଟଲ୍ ପ୍ରାୟୋଜକ ହେବା ପାଇଁ ଟାଟା ଗ୍ରୁପ୍ ପକ୍ଷରୁ ‘ଏକ୍ସପ୍ରେସନ ଅଫ୍ ଇଣ୍ଟରେଷ୍ଟ’ (ଇଓଆଇ) ଦାଖଲ କରାଯାଇଛି। ପୂର୍ବରୁ ପ୍ରଯୁକ୍ତି ବିଦ୍ୟା କମ୍ପାନୀ ‘ଅନ୍ଏକାଡେମୀ’ ଓ ଫାଣ୍ଟାସି ସ୍ପୋଟର୍ସ ପ୍ଲାଟ୍ଫର୍ମ ‘ଡ୍ରିମ୍ ୧୧’ ମଧ୍ୟ ଟାଇଟଲ୍ ପ୍ରାୟୋଜକ ଦୌଡ଼ରେ ରହିଛନ୍ତି। ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ଇଓଆଇ ଦାଖଲ କରିବାର ଅନ୍ତିମ ତାରିଖ ଅଗଷ୍ଟ ୧୪ (ଶୁକ୍ରବାର) ଥିଲା। ଯୋଗ ଗୁରୁ ବାବା ରାମଦେବଙ୍କ ‘ପତଞ୍ଜଳ’ ଓ ଜିଓ କମୁନିକେଶନ ମଧ୍ୟ ଟାଇଟଲ୍ ପ୍ରାୟୋଜକ ଦୌଡ଼ରେ ରହିଥିଲେ ମଧ୍ୟ ବିସିସିଆଇ ପକ୍ଷରୁ ଏନେଇ କିଛି ସ୍ପଷ୍ଟ କରାଯାଇନାହିଁ। ଏଠାରେ ଉଲ୍ଲେଖଯୋଗ୍ୟ, ସେପ୍ଟେମ୍ବର ୧୮ରୁ ନଭେମ୍ବର ୧୦ ପର୍ଯ୍ୟନ୍ତ ଆଇପିଏଲ୍ର ତ୍ରୟୋଦଲ ସଂସ୍କରଣ ୟୁଏଇରେ ଖେଳାଯିବ। ଭାରତ ଓ ଚାଇନା ମଧ୍ୟରେ ଲାଗି ରହିଥିବା ସୀମା ଉତ୍ତେଜନା ଲାଗି ଚାଇନିଜ ମୋବାଇଲ୍ କମ୍ପାନୀ ଭିଭୋକୁ ଟାଇଟଲ୍ ପ୍ରାୟୋଜକ ଦୌଡ଼ରୁ ଗୋଟିଏ ବର୍ଷ ଲାଗି ବିସିସିଆଇ ବାଦ୍ ଦେଇଛି।