ଢେଙ୍କାନାଳ ଅଫିସ,୩।୫ ଢେଙ୍କାନାଳ ଟାଟାଷ୍ଟିଲ ମେରାମଣ୍ଡଳୀ ପକ୍ଷରୁ ସଡ଼କ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ କାରଖାନା ଭିତରକୁ ଆସୁଥିବା ଟ୍ରକ୍ଗୁଡିକୁ ପାର୍କିଂସ୍ଥାନ ଯୋଗାଇଦେବା ନିମନ୍ତେ ୩ଟି ନୂତନ ପାର୍କିଂ ୟାର୍ଡ ବ୍ୟବସ୍ଥା କରାଯାଇଛି। ୫୫ନଂ. ଜାତୀୟ ରାଜପଥରେ ଟ୍ରାଫିକ୍ ଜାମ୍କୁ ହ୍ରାସ କରିବା ପାଇଁ ଏହି ପଦକ୍ଷେପ ନିଆଯାଇଛି। ଇଟାପ ଗ୍ରାମ ନିକଟରେ ଥିବା ୬.୮ ଏକର ଜମିରେ ଏହି ବଡ ପରିବହନ ପାର୍କିଂ ସ୍ଥାନ କରାଯାଇଛି। ଏଠାରେ ଗୋଟିଏ ପ୍ରବେଶ ଓ ଗୋଟିଏ ପ୍ରସ୍ଥାନ ଫାଟକ ସହିତ ପାର୍କିଂୟାର୍ଡ ଭିତରେ ସୁରକ୍ଷା ପାଇଁ ୩ଟି ଚେକ୍ ପଏଣ୍ଟ ଏବଂ ୧୨୦ଟି ଗାଡି ପାର୍କିଂ ବ୍ୟବସ୍ଥା ରହିଛି। ଏଠାରେ ପ୍ରତିଦିନ ୨୭୦ଟି ବଡ ଟ୍ରକ୍ ଓ ଟ୍ରେଲର ପାର୍କିଂ କରୁଛନ୍ତି। ଏତଦ୍ବ୍ୟତୀତ ଏଠାରେ ଡ୍ରାଇଭରମାନଙ୍କ ସୁବିଧା ପାଇଁ ନିଜସ୍ବ କ୍ୟାବିନ, ବିଶ୍ରାମ କକ୍ଷ ଓ ଶୌଚାଳୟର ବ୍ୟବସ୍ଥା କରାଯାଇଛି। ସମସ୍ତ ସୁରକ୍ଷା ନିୟମ ପାଳନ କରୁଥିବା ଗାଡିକୁ ଏଠାରେ ପାର୍କିଂ କରାଯିବ। ଲୋଡିଂ ଓ ଅନଲୋଡିଂ ସ୍ଥାନରୁ ଡାକରା ନ ଆସିବା ପର୍ଯ୍ୟନ୍ତ କିମ୍ବା ପ୍ରବେଶ ନିଷେଧ ସମୟରେ କୌଣସି ଟ୍ରକ୍କୁ କାରଖାନା ଭିତରକୁ ପ୍ରବେଶ ପାଇଁ ଅନୁମତି ପ୍ରଦାନ କରାଯିବ ନାହିଁ। ସେହିପରି କାରଖାନା ଓ ସାମଗ୍ରୀ ପରିବହନ ଫାଟକ ନିକଟରେ ୨ଟି ଅତିରିକ୍ତ ପାର୍କିଂୟାର୍ଡ ବିକଶିତ କରାଯାଉଛି। ଏଠାରେ ୯୦ଟି ଗାଡିର ପାର୍କିଂ ବ୍ୟବସ୍ଥା କରାଯାଉଛି। ଭବିଷ୍ୟତରେ ଆହୁରି ୧୦୦ଟି ଟ୍ରକ୍ ପାଇଁ କାରଖାନା ପାର୍ଶ୍ୱବର୍ତ୍ତୀ ଜାତୀୟ ରାଜପଥ ନିକଟରେ ଏକ ପାର୍କିଂସ୍ଥାନ କରାଯିବାର ଯୋଜନା ରହିଛି। କାରଖାନା ନିକଟସ୍ଥ ୫୫ନଂ ଜାତୀୟ ରାଜପଥରେ ଟ୍ରକ ପାର୍କିଂକୁ ନିୟନ୍ତ୍ରଣ କରିବା ପାଇଁ କମ୍ପାନୀର ସୁରକ୍ଷା ଲଜିଷ୍ଟିକ୍ସ ଓ ନିରାପତ୍ତା ବିଭାଗ ପକ୍ଷରୁ ଯାଞ୍ଚ ବ୍ୟବସ୍ଥା କରାଯାଉଛି। ଟ୍ରାଫିକ ପରିଚାଳନାକୁ ସୁଗମ କରିବା ପାଇଁ ଜାତୀୟ ରାଜପଥରେ ଅତିରିକ୍ତ କର୍ମଚାରୀଙ୍କୁ ନିୟୋଜିତ କରାଯାଇଛି। ଏହାସହିତ ସ୍ଥାନୀୟ ଅଞ୍ଚଳରେ ଲୋକମାନଙ୍କୁ ସଡ଼କ ସୁରକ୍ଷା ସମ୍ପର୍କରେ ସଚେତନ ପାଇଁ ନିୟମିତ ଭାବେ ଯାତ୍ରୀ, ସ୍ଥାନୀୟ ଗ୍ରାମବାସୀ ଓ ଛାତ୍ରୀଛାତ୍ରଙ୍କ ନିମନ୍ତେ ସଚେତନତା ଅଭିଯାନ ଆୟୋଜନ କରାଯାଉଛି। ପ୍ରଶାସନ ସହାୟତାରେ ୫୫ନଂ ଜାତୀୟ ରାଜପଥରେ ମେଗା ସଡକ ସୁରକ୍ଷା ସଚେତନତା ରାଲି, ମଦ୍ୟପାନ ଯାଞ୍ଚ ଆଦି କାର୍ଯ୍ୟକ୍ରମର ଆୟୋଜନ କରାଯାଇଥିଲା।