ଆନନ୍ଦପୁର,୨୮।୬(ସନ୍ତୋଷ ରାଉତ): କେନ୍ଦୁଝର ଜିଲା ଘସିପୁରା ଥାନା ଅଞ୍ଚଳରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଘସିପୁରା ପୋଲିସ ବୁଧବାର ଉଦ୍ଧାର କରିଥିବା ଗଳିତ ମୃତଦେହ ଘଟଣାର ପର୍ଦାଫାଶ ହୋଇଛି। ଦୁର୍ବୃତ୍ତମାନେ ଟ୍ୟାକ୍ସି ଚୋରି କରି ଡ୍ରାଇଭରଙ୍କୁ ଅତି ନିର୍ମମ ଭାବେ ହତ୍ୟା କରି ଫିଙ୍ଗି ଦେଇଥିବା ଘଟଣା ଜଣାପଡିଛି।
ସୂଚନାଯୋଗ୍ୟ, ୨୦ ନମ୍ବର ଜାତୀୟ ରାଜପଥ ଘସିପୁରା ଥାନା ଅଧୀନ ଦରଖଳା ନିକଟ ରାସ୍ତା ପାର୍ଶ୍ୱରୁ ପୋଲିସ ଏକ ଗଳିତ ମୃତଦେହ ଉଦ୍ଧାର କରିଥିଲା। ଏନେଇ ପୋଲିସ ଏକ ଅପମୃତ୍ୟୁ ମାମଲା(ନଂ.୩୨.୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ତଦନ୍ତ ପରେ ମୃତଦେହ ପୁରୀ ଜିଲା କଣାସ ଥାନା ଛୋଟିଯୋଡି ଗାଁର ଭଗବାନ ବଇରି ଓରଫ ରଞ୍ଜନ ବୋଲି ଜାଣିବାକୁ ପାଇଥିଲା। ପୋଲିସଠାରୁ ଖବର ପାଇ ମୃତକଙ୍କ ସମ୍ପର୍କୀୟ ଚିନ୍ତାମଣି ବଇରୀ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ପହଞ୍ଚି ଆବଶ୍ୟକ ପରିଚୟ ଦେଇ ମୃତଦେହ ଚିହ୍ନଟ କରି ଘରକୁ ନେଇଛନ୍ତି।
ଅନ୍ୟପକ୍ଷେ ଟ୍ୟାକ୍ସି ଡ୍ରାଇଭର ନିଖୋଜ ଥିବା ଖବର ପୋଲିସ ନଜରରେ ରହିଥିଲା ବୋଲି ଘସିପୁରା ଥାନା ଅଧିକାରୀ ବିକ୍ରମ କୁମାର ଭୁୟାଁ କହିଛନ୍ତି। ଏପରିକି ଟ୍ୟାକ୍ସି ଚାଳକଙ୍କ ମୋବାଇଲ ଟ୍ରେସିଂ ଦ୍ୱାରା ସେ ଘଟଗାଁ ରେଞ୍ଜ ଅଞ୍ଚଳରେ ରହିଥିବା ଜଣାପଡିଥିଲା। ପୋଲିସ ମୃତଦେହ ଉଦ୍ଧାର କରି ପରିଚୟ ପାଇବା ପରେ ମୃତକଙ୍କ ପରିବାର ଲୋକଙ୍କୁ ସୂଚନା ଦିଆଯାଇଥିଲା।
ସୂଚନାଯୋଗ୍ୟ, ଭଗବାନ ପେସାରେ ଜଣେ ଟ୍ୟାକ୍ସି ଡ୍ରାଇଭର ଥିବାବେଳେ ଚଳିତ ମାସ ୨୪ ତାରିଖ ସନ୍ଧ୍ୟାରେ କଟକ କଲେଜ ଛକରୁ ୨ଜଣ ପୁଅ ଓ ଜଣେ ଝିଅ ଯାଜପୁର ଯିବାକୁ କହି ଭଡ଼ାରେ ନେଇଥିଲେ। ପରବର୍ତ୍ତୀ ସମୟରେ ଭଗବାନଙ୍କ ଆଉ କୌଣସି ପତ୍ତା ମିଳି ନ ଥିଲା। ପରିବାର ଲୋକେ ଅନେକ ଖୋଜାଖୋଜି ପରେ ଥାନାର ଦ୍ୱାରସ୍ଥ ହୋଇଥିଲେ। ଏନେଇ ୨୫ ତାରିଖ ସନ୍ଧ୍ୟାରେ କଟକ ମାଲଗୋଦାମ ଥାନାରେ ଭଗବାନ ନିଖୋଜ ଥିବା ନେଇ ଅଭିଯୋଗ ହୋଇଥିଲା।
