ବ୍ରହ୍ମପୁର ଅଫିସ,୧୪ା୧୧: ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲ କଲେଜ ଓ ହସ୍ପିଟାଲର ଟିବି ଆଣ୍ଡ ଚେଷ୍ଟ ବିଭାଗରେ ଖୁବ୍ଶୀଘ୍ର ପିଜି ପାଠ୍ୟକ୍ରମ ଆରମ୍ଭ ହେବ। ଏନେଇ ଶନିବାର ଏମ୍ସିଆଇ (ମେଡିକାଲ କାଉନସିଲ ଅଫ ଇଣ୍ଡିଆ)ର ଜଣେ ପ୍ରତିନିଧି ଏମ୍କେସିଜିକୁ ଦିନିକିଆ ପରିଦର୍ଶନରେ ଆସିଛନ୍ତି। ଆନ୍ଧ୍ରପ୍ରଦେଶର ଭାଇଜାକ ମେଡିକାଲ କଲେଜର ଟିଭି ଓ ଚେଷ୍ଟ ବିଭାଗର ପ୍ରଫେସର ବିଜୟ କୁମାର ଶନିବାର ଏମ୍କେସିଜି ମେଡିକାଲର ବିଭିନ୍ନ ୱାର୍ଡ ପରିଦର୍ଶନ କରି ଭିତ୍ତିଭୂମି ଯାଞ୍ଚ କରିଛନ୍ତି। ସେ ମେଡିକାଲର ଟିଭି ୱାର୍ଡ, ପାଥୋଲୋଜି, ଏକ୍ସ-ରେ, ଲାବୋରେଟୋରି, ଆଉଟଡୋର, ଇନ୍ଡୋର ପରିଦର୍ଶନ ବେଳେ ତାଙ୍କ ସହ ଏମ୍କେସିଜି ଅଧୀକ୍ଷକ ପ୍ରଫେସର ସନ୍ତୋଷ କୁମାର ମିଶ୍ର ଓ ଅଧ୍ୟକ୍ଷ ପ୍ରଫେସର ଅବନୀକାନ୍ତ ମିଶ୍ର ଉପସ୍ଥିତ ଥିଲେ। ଏମ୍କେସିଜିରେ ପିଜି ପାଠ୍ୟକ୍ରମ ଆରମ୍ଭ କରିବା ପୂର୍ବରୁ ସେଥିପାଇଁ ଆବଶ୍ୟକ ପ୍ରଫେସର ତଥା ଡାକ୍ତରଙ୍କ ସମେତ ଭିତ୍ତିଭୂମି ଯାଞ୍ଚ କରାଯାଉଛି ବୋଲି ଅଧ୍ୟକ୍ଷ ତଥା ଡିନ୍ ପ୍ରଫେସର ଅବନୀକାନ୍ତ ମିଶ୍ରଙ୍କ ଠାରୁ ସୂଚନା ମିଳିଛି।
ଏଠାରେ ଟିବି ଆଣ୍ଡ ଚେଷ୍ଟ ବିଭାଗ ରହିଥିଲେ ମଧ୍ୟ ପିଜି ପାଠ୍ୟକ୍ରମ ନ ଥିଲା। କରୋନା ପରେ ପିଜି ପାଠ୍ୟକ୍ରମ ଖୋଲିବାକୁ ଏମ୍କେସିଜି କର୍ତ୍ତୃପକ୍ଷ ଏମ୍ସିଆଇ ନିକଟରେ ଆବେଦନ କରିଥିଲେ। ଏମ୍ସିଆଇର ଏକ ପ୍ରତିନିଧି ଭିତ୍ତିଭୂମି ଯାଞ୍ଚ କରିବାକୁ ଶନିବାର ଆସିଛନ୍ତି। ଏମ୍କେସିଜି ଟିବି ଆଣ୍ଡ ଚେଷ୍ଟ ବିଭାଗରେ ବର୍ତ୍ତମାନ ଜଣେ ପ୍ରଫେସର, ଜଣେ ଆସୋସିଏଟ ପ୍ରଫେସର ଓ ୨ ଜଣ ଆସିଷ୍ଟାଣ୍ଟ ପ୍ରଫେସର ରହିଛନ୍ତି। ସେହିକ୍ରମରେ ଏଠାରେ ୨ଟି ପିଜି ସିଟ୍ ପାଇଁ ଏମ୍ସିଆଇ ପକ୍ଷରୁ ଅନୁମତି ମିଳିବ ବୋଲି ଏମ୍କେସିଜି କର୍ତ୍ତୃପକ୍ଷ ଆଶା ରଖିଛନ୍ତି। ଚଳିତବର୍ଷ ଶେଷସୁଦ୍ଧା ଏମ୍ସିଆଇ ପକ୍ଷରୁ ଅନୁମତି ମିଳିପାରେ।