ବ୍ରହ୍ମପୁର ଅଫିସ,୩୦ା୧୨: ବୈଦ୍ୟନାଥପୁର ଥାନା ନିକଟ କମାପଲ୍ଲି ଓଭରବ୍ରିଜରେ ନଭେମ୍ବର ୨୫ ତାରିଖରେ ଜଣେ ଶିକ୍ଷକଙ୍କୁ ଆକ୍ରମଣ କରି ଲୁଟେରା ଗ୍ୟାଙ୍ଗ ତାଙ୍କ ସୁନାଚେନ, ପକେଟରୁ ଟଙ୍କା ଓ ମୋବାଇଲ ଫୋନ ଲୁଟି ନେଇଥିଲେ। ଲୁଟେରାମାନେ ନେଇଯାଇଥିବା ମୋବାଇଲ ଫୋନକୁ ପୋଲିସ ଟ୍ରାକିଂ କରିଥିଲା। ହେଲେ ଉକ୍ତ ମୋବାଇଲ ସୁଇଚ ଅଫ ରହିଥିବାରୁ ତାହାକୁ ଟ୍ରାକିଂ କରିବାରେ ବିଫଳ ରହିଛି। ଅନ୍ୟପଟେ ଲୁଟେରା ମାନେ ବ୍ୟବହାର କରୁଥିବା କାର ନମ୍ବରକୁ ମଧ୍ୟ ଟ୍ରାକିଂ କରାଯାଉଥିବା କୁହାଯାଇଥିଲେ ବି ଘଟଣାର ମାସକ ପରେ ପୋଲିସ ଲୁଟେରା ଗ୍ୟାଙ୍ଗର ସୁରାଗ ପାଇ ପାରିନାହିଁ। ଯାହାଫଳରେ ସେମାନେ ଏବେ ନିର୍ଭୟରେ ଗୋଟିଏ ପରେ ଗୋଟିଏ କାଣ୍ଡ କାଣ୍ଡ ଘଟାଉଛନ୍ତି।
ସୂଚନାଯୋଗ୍ୟ, କନ୍ଧମାଳ ଜିଲାରେ ଶିକ୍ଷକତା କରୁଥିବା ଆସିକାର ଡ଼ମ୍ବୁରଧର ଭୂୟାଁ ଓ ତାଙ୍କ ସାଙ୍ଗ ଚନ୍ଦନ ପଟ୍ଟନାୟକ ଅଫିସ କାମରେ କଟକ ଯାଇଥିଲେ। ସେମାନେ ଗତ ୨୫ ତାରିଖ ବିଳମ୍ବିତ ରାତ୍ରରେ ବାଇକରେ ବ୍ରହ୍ମପୁର ଦେଇ ଆସିକା ଫେରୁଥିବା ବେଳେ କମାପଲି ଓଭରବ୍ରିଜରେ ଏକ କାର (ନଂ ଓଡ଼ି ୦୫- ଏମ -୦୧୧୧) ରାସ୍ତା ମଝିରେ ରହିଥିଲା। କାର ଭିତରୁ ୩/୪ ଜଣ ଯୁବକ ବାହାରି ଡ଼ମ୍ବୁରଙ୍କୁ ଆକ୍ରମଣ କରିବା ସହ ସେ ପିନ୍ଧିଥିବା ୨୨ ଗ୍ରାମ ଓଜନର ଏକ ସୁନା ଚେନ, ପକେଟରୁ ୨୦ ହଜାର ଟଙ୍କା ଓ ଏକ ଦାମୀ ମୋବାଇଲ ଲୁଟି ନେଇଥିଲେ। ଡ଼ମ୍ବୁରଙ୍କ ସାଙ୍ଗ ଚନ୍ଦନ ଏହାର ପ୍ରତିବାଦ କରିବାରୁ ତାଙ୍କୁ ମଧ୍ୟ ଲୁଟେରାମାନେ ଆକ୍ରମଣ କରିଥିଲେ। ଏ ନେଇ ବୈଦ୍ୟନାଥପୁର ଥାନାରେ ଡମ୍ବରୁଙ୍କ ଅଭିଯୋଗ ପ୍ରକାରେ ୪୧୦/୨୨ ରେ ଏକ ମାମଲା ରୁଜୁ ହୋଇଛି।