ଭୁବନେଶ୍ୱର,୫।୯(ବ୍ୟୁରୋ): ଗୁରୁଦିବସରେ ଗୁରୁଙ୍କୁ ପୂଜା କରାଯାଏ। କିନ୍ତୁ ଏଭଳି ପବିତ୍ର ଦିବସରେ ଗୁରୁମାନେ କାନ ଧରି ଆଣ୍ଠେଇବା ସମସ୍ତଙ୍କୁ ଚକିତ କରିଛି। ଅନୁଦାନରୁ ବାଦ୍ ପଡ଼ିଥିବା ବିଦ୍ୟାଳୟମାନଙ୍କୁ ଅନୁଦାନ ପ୍ରଦାନ ନିମନ୍ତେ ଭୁବନେଶ୍ୱର ଗାନ୍ଧୀମାର୍ଗରେ ଚାଲିଥିବା ଶିକ୍ଷକଙ୍କ ଆନ୍ଦୋଳନର ରବିବାର ଥିଲା ଚତୁର୍ଥ ଦିନ। ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା) ଆହ୍ବାନରେ ଚାଲିଥିବା ଏହି ଗଣଧାରଣାର ଚତୁର୍ଥ ଦିବସରେ ଶିକ୍ଷକମାନେ କାନ ଧରି ଆଣ୍ଠେଇ ନିଜ ଦାବି ପାଇଁ ପ୍ରତିବାଦ କରିଥିଲେ। ଏହି ଅହୋରାତ୍ର ଗଣଧାରଣା ୪ଦିନ ବିତି ଯାଇଥିଲେ ମଧ୍ୟ ସରକାରଙ୍କ ପକ୍ଷରୁ ଆଲୋଚନା କରାଯାଇ ନାହିଁ। ଏପରି କି ଗୁରୁଦିବସ ଭଳି ପବିତ୍ର ଦିବସରେ ମଧ୍ୟ ସରକାର ଶିକ୍ଷକମାନଙ୍କୁ ରାଜରାସ୍ତାରେ ବସିବା ପାଇଁ ବାଧ୍ୟ କଲେ ବୋଲି ଓଷ୍ଟାର ସାଧାରଣ ସମ୍ପାଦକ ପ୍ରକାଶ ଚନ୍ଦ୍ର ମହାନ୍ତି କହିଛନ୍ତି।
