ସେମିଳିଗୁଡ଼ା/ସୁନାବେଡ଼ା,୧୭ା୨(ସ୍ବ.ପ୍ର.): ୨୬ ନମ୍ବର ଜାତୀୟ ରାଜପଥ ସେମିଳିଗୁଡ଼ା ଗଙ୍ଗାମା’ ମନ୍ଦିର ନିକଟରେ ଏକ ଟ୍ରକ୍ ସ୍କୁଟିକୁ ଧକ୍କା ଦେଇଛି। ଫଳରେ ଘଟଣାସ୍ଥଳରେ ସ୍କୁଲ ଯାଉଥିବା ଜଣେ ଶିକ୍ଷୟିତ୍ରୀଙ୍କ ମୃତ୍ୟୁ ହୋଇଛି। ସେ ହେଲେ ଅନ୍ନପୂର୍ଣ୍ଣା କୁମାରୀ ପଣ୍ଡା (୪୯)।
ମିଳିଥିବା ସୂଚନା ମୁତାବକ, କାକିଗାଁରୋଡ୍ସ୍ଥିତ ନିଜ ବାସଭବନରୁ ଅନ୍ନପୂର୍ଣ୍ଣା ସ୍କୁଟି (ଓଆର୍ ୧୦ ଏଫ୍-୨୨୦୫) ଯୋଗେ ପାକଝୋଲା ପଞ୍ଚାୟତର ଉପରମାନିଆସ୍ଥିତ ସ୍କୁଲକୁ ଯାଉଥିବା ବେଳେ ଏକ ଟ୍ରକ୍(ଏନ୍ଏଲ୍ ୦୧ଏସି-୭୨୨୧) ତାଙ୍କୁ ପଛପଟ ଧକ୍କା ଦେଇ ଫେରାର ହୋଇଯାଇଥିଲା। ପରେ ଘଟଣା ସ୍ଥଳରେ ଉତ୍ତେଜନା ପରିସ୍ଥିତି ଦେଖାଦେଇଥିଲା । ଖବର ପାଇ ସେମିଳିଗୁଡ଼ା ଥାନା ଅଧିକାରୀ ପ୍ରଦ୍ୟୁମ୍ନ କୁମାର ମହାପାତ୍ର, ତହସିଲଦାର ରଞ୍ଜିତାମେରୀ ନାୟକ, ଏସ୍ଆଇ ଦୀପକ ବାରିକ, ଏଏସ୍ଆଇ ଦିଗନ୍ତ ପ୍ରଭୁସହାୟ ପ୍ରମୁଖ ପହଞ୍ଚି ଲୋକଙ୍କୁ ବୁଝାଶୁଝା କରି ମୃତଦେହ ଜବତ କରି ବ୍ୟବଚ୍ଛେଦ ଲାଗି ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲ କୋରାପୁଟକୁ ପଠାଇଥିଲେ। ଫେରାର ହୋଇଯାଇଥିବା ଟ୍ରକ୍କୁ କୁନ୍ଦୁଲି ହାଟ ନିକଟରୁ ଠାବ କରାଯାଇଛି। ଡ୍ରାଇଭରକୁ ଥାନାରେ ଅଟକ ରଖାଯାଇ ପଚରାଉଚରା କରାଯାଉଛି। ଏନେଇ ପୋଲିସ ଏକ ମାମଲା(ନଂ. ୨୫/୨୨) ରୁଜୁ କରି ଅଧିକ ତଦନ୍ତ ଜାରି ରହିଛି । ସୂଚନାଯୋଗ୍ୟ, ଶିକ୍ଷୟିତ୍ରୀ ଅନ୍ନପୂର୍ଣ୍ଣା ଦୁଇମାସ ତଳେ ଲକ୍ଷ୍ମୀପୁର ବ୍ଲକରୁ ବଦଳି ହୋଇ ସେମିଳିଗୁଡ଼ା ବ୍ଲକର ଉପରୋକ୍ତ ବିଦ୍ୟାଳୟକୁ ଆସିଥିଲେ।