ଅନୁଗୋଳ ଅଫିସ,୫।୧୨ – ନଭେମ୍ବର ୨୬ ଓ ୨୭ ତାରିଖରେ ପୁରୀଠାରେ ଅନୁଷ୍ଠିତ ଗ୍ଲୋବାଲ ମଡେଲ ଇଣ୍ଡିଆ ଫ୍ୟାଶନ ଶୋ’ରେ ଚମକିଛନ୍ତି ଅନୁଗୋଳର ଶିକ୍ଷକ ସୌମ୍ୟ ରଞ୍ଜନ ଓ ଛାତ୍ରୀ ସାଇ ଲକ୍ସନ୍ୟା। ସୌମ୍ୟ ବେଷ୍ଟ ଆକ୍ଟିଭ ମଡେଲ ଭାବେ ପୁରସ୍କୃତ ହୋଇଥିବା ବେଳେ କୁନି ପ୍ରତିଭା ସାଇ ଲକ୍ସନ୍ୟା ହୋଇଛନ୍ତି ବେଷ୍ଟ ଜୁନିୟର।
ପୁଣେର ଗ୍ଲୋବାଲ ବିୟୁଟି ଇଣ୍ଟରନ୍ୟାଶନାଲ ଅର୍ଗାନାଇଜେଶନ ପକ୍ଷରୁ ଏହି ଫ୍ୟାଶନ ଶୋ’ ଆୟୋଜନ କରାଯାଇଥିଲା। ଏଥିରେ ଅନେକ ମଡେଲ ଭାଗ ନେଇଥିଲେ ବି ବଅଁରପାଳସ୍ଥିତ ଦିଲ୍ଲୀ ପବ୍ଲିକ ସ୍କୁଲରେ ବାଣିଜ୍ୟ ବିଭାଗର ଶିକ୍ଷକ ଥିବା ସୌମ୍ୟ ରଞ୍ଜନଙ୍କ ସମ୍ବଲପୁରୀ ବେଶ ପୋଷାକରେ ରାମ୍ପ ସବୁଠାରୁ ଆକର୍ଷଣୀୟ ଥିଲା। ଅନୁଗୋଳ ହେମସୁରପଡାର ବାବାଜୀ ଚରଣ ରାଉତ ଓ ସୌଦାମିନୀଙ୍କ ପୁଅ ସୌମ୍ୟଙ୍କ ପେସା ଶିକ୍ଷକତା ହୋଇଥିଲେ ମଧ୍ୟ ଫ୍ୟାଶନ ତାଙ୍କ ନିଶା ବୋଲି କହିଛନ୍ତି। ସ୍କୁଲରୁ ସମୟ ମିଳିବା ମାତ୍ରେ ସେ ମଡେଲିଂ ଅଭ୍ୟାସରେ ଲାଗିପଡ଼ନ୍ତି। ଦୈନିକ ଏଥିଲାଗି ଅଧଘଣ୍ଟାରୁ ଘଣ୍ଟାଏ ପରିଶ୍ରମ କରୁଥିବା ସୌମ୍ୟ ପ୍ରକାଶ କରିଛନ୍ତି। ସେହିପରି ଅନୁଗୋଳର କୁନି ପ୍ରତିଭା ସାଇ ଲକ୍ସନ୍ୟାଙ୍କ ସମ୍ବଲପୁରୀ ପୋଷାକରେ ରାମ୍ପ ବିଚାରକଙ୍କ ମନକୁ ଛୁଇଁପାରିଥିଲା। ସାଇ ଲକ୍ସନ୍ୟା ହେଉଛନ୍ତି ଅନୁଗୋଳ ରୋଟାରୀ ପବ୍ଲିକ ସ୍କୁଲର ଚତୁର୍ଥ ଶ୍ରେଣୀ ଛାତ୍ରୀ। ତାମ୍ରିତ କଲୋନୀରେ ରହୁଥିବା ଲକ୍ଷ୍ମଣ ସାହୁ ଓ ଲକ୍ଷ୍ମୀପ୍ରିୟା ସ୍ବାଇଁଙ୍କ ଏକମାତ୍ର ଝିଅ ସାଇ ଓଡ଼ିଶୀ ନୃତ୍ୟ, ଡ୍ରଇଁରେ ମଧ୍ୟ ରୁଚି ରଖିଛନ୍ତି। ଡ୍ରଇଁ ପ୍ରତିଯୋଗିତା ବେଳେ ବିଚାରଙ୍କ ପରାମର୍ଶ ଅନୁଯାୟୀ ସେ ମଡେଲିଂରେ ପାଦ ଦେଇଛନ୍ତି। ପୁଣେରେ ଏକ ଫ୍ୟାଶନ ଶୋ’ ପାଇଁ ତାଙ୍କୁ ମନୋନୀତ କରାଯାଇଥିବା ସାଇ ଲକ୍ସନ୍ୟା ପ୍ରକାଶ କରିଛନ୍ତି।
