ନିରାକାରପୁର,୧୮।୨(ମାନସ ଚନ୍ଦ୍ର ପଟ୍ଟନାୟକ ): ଖୋର୍ଦ୍ଧା ଜିଲା ନିରାକାରପୁର କଲେଜ ଖେଳପଡ଼ିଆର ପଶ୍ଚିମ ପାର୍ଶ୍ୱରେ ଥିବା ଏକ ଭଡାଘରୁ ଜଣେ ଶିକ୍ଷକଙ୍କ ମୃତଦେହ ନିରାକାରପୁର ପୋଲିସ ଜବତ କରିଛି। ପରିବାର ଲୋକଙ୍କ ଉପସ୍ଥିତିରେ ପୋଲିସ ମୃତଦେହ ବ୍ୟବଚ୍ଛେଦ ପରେ ରବିବାର ହସ୍ତାନ୍ତର କରିଛି। ତେବେ ଶିକ୍ଷକଙ୍କ ସାନଭାଇ ନିତ୍ୟାନନ୍ଦ ବ୍ରହ୍ମାଙ୍କ ଅଭିଯୋଗକୁ ଭିତ୍ତି କରି ନିରାକାରପୁର ପୋଲିସ ଏକ ମାମଲା(ନଂ.୨/୨୪) ରୁଜୁ କରି ତଦନ୍ତ ଜାରି ରହିଥିବା ତଦନ୍ତକାରୀ ସବ୍ଇନ୍ସପେକ୍ଟର ଅରବିନ୍ଦ ରାଉଳ ସୂଚନା ଦେଇଛନ୍ତି ।
ମୃତ ଶିକ୍ଷକ ଜଣକ ହେଲେ କଣାସବ୍ଲକ ଦିବ୍ୟସିଂପୁର ପଞ୍ଚାୟତ ଅଧୀନ କନକଦୁର୍ଗା ସରକାରୀ ଉଚ୍ଚ ବିଦ୍ୟାଳୟର ଟିଜି ଶିକ୍ଷକ ସତ୍ୟାନନ୍ଦ ବ୍ରହ୍ମା(୫୨)। ତାଙ୍କ ଘର ଯାଜପୁର ଜିଲା ଚଣ୍ଡିଖୋଲ ଥାନା ଅନ୍ତର୍ଗତ କଣ୍ଟିଗାଡ଼ିଆ ଗ୍ରାମରେ । ସେ ଦୀର୍ଘ ୨୫ବର୍ଷରୁ ଊଦ୍ଦର୍ବ ହେଲା ଉକ୍ତ ସ୍କୁଲରେ ଶିକ୍ଷକତା କରୁଥିଲେ।