ପ୍ୟାରିସ: ଆମେ ଶିକ୍ଷକଙ୍କୁ ସବୁବେଳେ ସରଳ ମଣିଷ ଭାବେ ଦେଖିବାକୁ ପାଇଥାଉ। ତାଙ୍କ ଆସନ ସର୍ବଦା ବହୁ ଊର୍ଦ୍ଧ୍ୱରେ ରହିଥାଏ। ସେମାନେ ନିଜ ଚାଲିଚଳନ, ବେଶଭୂଷାକୁ ସାଧାରଣ ରଖିଥା’ନ୍ତି। ହେଲେ ଜଣେ ବ୍ୟକ୍ତି ଅଛନ୍ତି, ଯିଏକି ପେସାରେ ଜଣେ ଶିକ୍ଷକ, ହେଲେ ତାଙ୍କୁ ଦେଖିଲେ କେହି ତାହା ଭାବିପାରିବେନି। ଫ୍ରାନ୍ସର ରାଜଧାନୀ ପ୍ୟାରିସ୍ରେ ରହୁଥିବା ଜଣେ ୩୭ ବର୍ଷୀୟ ସେଲ୍ଭେନ ହେଲେନି ତାଙ୍କ ଶରୀରର ଶତପ୍ରତିଶତ ଭାଗରେ ଟାଟୁ କରିଛନ୍ତି। ଏପରିକି ସେ ତାଙ୍କ ଆଖି ଡୋଳାରେ ମଧ୍ୟ ଟାଟୁ କରିଛନ୍ତି। ଏଥିପାଇଁ ସେ ପାଖାପାଖି ୫୮ ଲକ୍ଷ ୧୩ ହଜାର ଟଙ୍କା ଖର୍ଚ୍ଚ କରିଛନ୍ତି। ସେ ପ୍ରାଥମିକ ବିଦ୍ୟାଳୟରେ ଶିକ୍ଷକ ଭାବେ ପାଠ ପଢ଼ାଉଛନ୍ତି। ଏଥିସହ ହେଲେନି ଜଣେ ମଡେଲର ଏବଂ କମେଡିଆନ ମଧ୍ୟ। ସେ ତାଙ୍କର ଏହି ଟାଟୁ ଯାତ୍ରା ୧୦ ବର୍ଷ ପୂର୍ବେ ଆରମ୍ଭ କରିଥିଲେ। ସେ ଥରେ ଲଣ୍ଡନରେ ସୁଟ୍ବୁଟ୍ ପିନ୍ଧିଥିଲେ ମଧ୍ୟ ତାଙ୍କ ପାଖରେ ଟଙ୍କାର ଅଭାବ ରହିଥିଲା। ସେତେବେଳେ ସେ କ’ଣ କରିବେ ଜାଣିପାରି ନ ଥିଲେ। ହଠାତ୍ ତାଙ୍କର ନଜର ଜଣେ ବ୍ୟକ୍ତିଙ୍କ ଉପରେ ପଡ଼ିଲା, ଯିଏକି ବେକରେ ଟାଟୁ କରିଥିଲେ। ଅନ୍ୟ ଜଣେ ବ୍ୟକ୍ତି ତାଙ୍କ ଆଖିରେ ଟାଟୁ କରିଥିଲେ। ଏହା ଦେଖି ସେ ତାଙ୍କ ଶରୀରରେ ଟାଟୁ କରିବା କଥା ଚିନ୍ତା କରିଥିଲେ। ସେବେଠାରୁ ତାଙ୍କର ଟାଟୁ ଯାତ୍ରା ଆରମ୍ଭ ହୋଇଥିଲା। ସେ ୬ ମାସ ମଧ୍ୟରେ ପ୍ୟାରିସ୍ରେ ଟାଟୁର ପ୍ରଥମ ପର୍ଯ୍ୟାୟ କରିସାରିଥିଲେ। ଏବେ ସେ ଟାଟୁର ଦ୍ୱିତୀୟ ପର୍ଯ୍ୟାୟ ଆରମ୍ଭ କରିବାକୁ ଯାଉଛନ୍ତି। ଏହାପରେ ସେ ଟାଟୁର ତୃତୀୟ ଏବଂ ୪ର୍ଥ ପର୍ଯ୍ୟାୟ କରିବେ ବୋଲି କହିଛନ୍ତି। ଏହି ଟାଟୁ ପାଇଁ ସେ ତାଙ୍କ ଶରୀରର ସ୍ତନବୃନ୍ତ ସହ ନାଭିକୁ କାଢ଼ି ଦେଇଛନ୍ତି। ସେ ଟାଟୁକୁ ନିଜ ଶରୀରରେ ପୋଷାକ ଭଳି ପିନ୍ଧିବାକୁ ଚାହୁଁଥିବା କହିଛନ୍ତି।
