ବରଗଡ଼,୧୫।୯(ପ୍ରେମାନନ୍ଦ ଖମାରୀ): ପ୍ରାଥମିକ ଏବଂ ଉଚ୍ଚ ପ୍ରାଥମିକ ବିଦ୍ୟାଳୟରେ ସମସ୍ତ ପ୍ରକାରର ଠିକା ନିଯୁକ୍ତି ଉଚ୍ଛେଦ, କେନ୍ଦ୍ରୀୟ ହାରରେ ଦରମା ପ୍ରଦାନ ଏବଂ ପୁରୁଣା ପେନସନ ବ୍ୟବସ୍ଥା ଲାଗୁ କରିବା ଦାବିରେ ରାଜ୍ୟବ୍ୟାପୀ ଶିକ୍ଷକଙ୍କ ଆନ୍ଦୋଳନ ଚାଲିଛି। ଏଥିରୁ ବରଗଡ଼ ଜିଲା ମଧ୍ୟ ବାଦ ପଡି ନାହିଁ ।
ଗୁରୁବାର ଜିଲାର ୧୨ଟି ବ୍ଲକ ମଧ୍ୟରୁ ୧୦ଟି ବ୍ଲକର ଶିକ୍ଷକ, ଶିକ୍ଷୟିତ୍ରୀ ଆନ୍ଦୋଳନକୁ ଓହ୍ଲାଇ ଥିବାବେଳେ ଶୁକ୍ରବାର ଜିଲାର ଅନ୍ୟ ୨ଟି ବ୍ଲକ ବରଗଡ଼ ଏବଂ ସୋହେଲା ବ୍ଲକର ଶିକ୍ଷକ, ଶିକ୍ଷୟିତ୍ରୀମାନେ ଆନ୍ଦୋଳନରେ ସାମିଲ ହୋଇଛନ୍ତି । ଏହିକ୍ରମରେ ଶିକ୍ଷକ, ଶିକ୍ଷୟିତ୍ରୀମାନେ ପ୍ରତିଦିନ ସ୍ଥାନୀୟ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ସମବେତ ହେଉଛନ୍ତି। ପରେ ମହାତ୍ମା ଗାନ୍ଧୀଙ୍କ ପ୍ରତିଛବି ରଖି ଧାରଣାରେ ବସୁଛନ୍ତି। ଏହା ସହିତ ଦାବି ପୂରଣ ନେଇ ନାରାବାଜି କରୁଛନ୍ତି। ସ୍କୁଲ ଛାଡି ଶିକ୍ଷକ, ଶିକ୍ଷୟିତ୍ରୀ ଏଭଳି ଆନ୍ଦୋଳନକୁ ଓହ୍ଲାଇ ଥିବା ଯୋଗୁ ବରଗଡ଼ ଜିଲାର ସମସ୍ତ ପ୍ରାଥମିକ, ଉଚ୍ଚ ପ୍ରାଥମିକ ସ୍କୁଲରେ ପାଠପଢା ଠପ୍ ହୋଇଯାଇଛି । ବହି ବସ୍ତା ଧରି ପିଲାମାନେ ସ୍କୁଲକୁ ପଢିବାକୁ ଆସୁଥିଲେ ହେଁ ଶେଷରେ ନିରାଶ ହୋଇ ଘରକୁ ଫେରୁଥିବା ପରିଲକ୍ଷିତ ହେଉଛି।
