କେନ୍ଦୁଝର, ୮ା୪ ଶିକ୍ଷକତା କରିବା ସହ ସ୍ବଦେଶୀ ବିଚାର ଧାରା ରଖି ଚାଷ ଓ ଗୋସେବା କରି ଏକ ନିଆରା ପରିଚୟ ସୃଷ୍ଟି କରିଛନ୍ତି ପାଟଣା ବ୍ଲକ ଡେଣୁଆ ଗ୍ରାମର ଡମ୍ବରୁଧର ମହାନ୍ତ। ମୁରୁସୁଆଁ ନୋଡାଲ ହାଇସ୍କୁଲରେ ହିନ୍ଦି ଶିକ୍ଷକ ଭାବେ କାମ କରିଆସୁଥିବା ଡମ୍ବରୁଧରଙ୍କ ବାପା ସ୍ବର୍ଗତ ବିଶ୍ୱନାଥ ମହାନ୍ତ ଜଣେ ଚାଷୀ ଥିଲେ। ବାପାଙ୍କ ଦେହାନ୍ତ ପରେ ଭାଇମାନଙ୍କ ମଧ୍ୟରେ ଭାଗ ବେଳେ ୨/୩ଟି ଗୋରୁଗାଈ ପାଇଥିଲେ। ଆଜି ତାଙ୍କର ଗୋସେବା ମନୋଭାବ ଯୋଗୁ ଏହି ସଂଖ୍ୟା ୪୮ରେ ପହଞ୍ଚିଛି। ଗୋସେବା ଠାରୁ ଅନ୍ୟ କାୈଣସି ଧାର୍ମିକ କାର୍ଯ୍ୟନାହିଁ। ଏଣୁ ଏହି ସେବା କାର୍ଯ୍ୟରେ ତାଙ୍କ ସ୍ତ୍ରୀ କାଞ୍ଚନମଣୀ ମହାନ୍ତ ସହାୟତା କରିଥାନ୍ତି। ଗୋରୁଗାଈଙ୍କୁ ଖାଦ୍ୟପାନୀୟ ଦେବା ସହ କ୍ଷୀର ଦୁହିଁଥାନ୍ତି।
କ୍ଷୀରକୁ ଘରେ ବ୍ୟବହାର କରିବା ସହ ବଳକା ସ୍ଥାନୀୟ ସୋସାଇଟି ତଥା ସ୍ଥାନୀୟ ଲୋକଙ୍କୁ ବିକିଥାନ୍ତି। ଏଣୁ ଘରେ କ୍ଷୀର, ଦହି ବା ଘିଅର ଅଭାବ ନାହିଁ ା ସେସବୁ ବିକି ଯାହା ମିଳେ ସେଥିରେ ଗୋରୁଗାଈଙ୍କ ପାଇଁ ଖାଦ୍ୟ ଯୋଗାଡ଼ କରିଥାନ୍ତି। ପଶୁ ଚିକିତ୍ସା କେନ୍ଦ୍ର ପକ୍ଷରୁ ଚିକିତ୍ସା ସେବା ମିଳୁଥିଲେ ହେଁ ଏଥିପାଇଁ ସରକାରୀ ପ୍ରୋତ୍ସାହନ କିଛି ମିଳୁନାହିଁ ବୋଲି ତାଙ୍କ ସ୍ତ୍ରୀ କହିଛନ୍ତି।
ଗୋବରରେ ଦୁଇଟି ଗୋବର ଗ୍ୟାସ ପ୍ଲାଣ୍ଟ କରି ରୋଷେଇ କାର୍ଯ୍ୟରେ ବ୍ୟବହାର କରୁଛନ୍ତି। ସେହିପରି ଗୋ ମୂତ୍ରରେ ନିମ୍ବ ପତ୍ର, ଅରଖ ପତ୍ର ମିଶାଇ କୀଟନାଶକ ଔଷଧ ପ୍ରସ୍ତୁତ କରି ନିଜର ବାଡ଼ିବଗିଚାରେ ଉପଯୋଗ କରିଥାନ୍ତି। ସେହିପରି ଖତକୁ ବ୍ୟବହାର କରି ଜୈବିକ ସାର ପ୍ରସ୍ତୁତ କରି ନିଜର ଜମି ଓ ବାଡିବଗିଚାରେ ଫସଲ ତଥା ପନିପରିବା ଚାଷ କରୁଥିବା କୁହନ୍ତି ା
ଶିକ୍ଷକତା ପରେ ବଳକା ସମୟକୁ ଗୋରୁଗାଈଙ୍କ ସେବା ତଥା ବାଡିବଗିଚା, ଚାଷ କାର୍ଯ୍ୟ ଆଦିରେ ବିନିଯୋଗ କରିଥାନ୍ତି ବୋଲି ଡମ୍ବରୁଧର କୁହନ୍ତି। ସେହିପରି ଘରେ ଛେଳି, କୁକୁଡା, ବତକ ମଧ୍ୟ ପାଳନ କରିଛନ୍ତି ା ଆଗକୁ ୧୦୦ ଗୋରୁଗାଈ ରଖିବା ସହ ଜୈବିକ ପ୍ରଣାଳୀ ଚାଷ କରି ଅନ୍ୟମାନଙ୍କ ପାଇଁ ଦୃଷ୍ଟାନ୍ତ ସାଜିବା ତଥା ଗୋବର ଦୀପ, ଗୋ ମୂତ୍ରରୁ ଫିନାଇଲ ପ୍ରସ୍ତୁତ କରି ସମସ୍ତଙ୍କୁ ବ୍ୟବହାର ପାଇଁ ସଚେତନତ କରିବା ଆଶା ରଖିଛନ୍ତି। ଡମ୍ବରୁଧରଙ୍କ ଦୁଇ ପୁଅ ଓ ଝିଅ ଅଛନ୍ତି ା ସେମାନେ ପାଠ ପଢୁଛନ୍ତି ା ସେ ପତଞ୍ଜଳୀ ଯୋଗ ସମିତି ଓ ଭାରତ ସ୍ବାଭିମାନର ଜିଲା ପ୍ରଭାରୀ ରହିଥିବା ବେଳେ ସ୍ବଦେଶୀ ସାମଗ୍ରୀର ବ୍ୟବହାର, ପାରମ୍ପରିକ ଚିକିତ୍ସା ବ୍ୟବସ୍ଥାର ବିକାଶ ପାଇଁ ଚାଲିଥିବା ଜନଆନ୍ଦୋଳନକୁ ସମସ୍ତଙ୍କ ପାଖରେ ପହଞ୍ଚାଇବା ପାଇଁ ଉଦ୍ୟମ ଜାରି ରଖିଥିବା କହିଛନ୍ତି।