ମୋରଡ଼ା,୧୭ା୭(ସ୍ମାରକ ମାଜୀ): ରାଜ୍ୟ ସରକାର ୫-ଟି ଜରିଆରେ ସମସ୍ତ ବିଦ୍ୟାଳୟ, ମହାବିଦ୍ୟାଳୟର ଉନ୍ନତୀକରଣ କରୁଛନ୍ତି। ଶିକ୍ଷା ପ୍ରତି ପିଲାଙ୍କୁ ଆକର୍ଷିତ କରିବା ଓ ଶିକ୍ଷା କ୍ଷେତ୍ରରେ ପରିବର୍ତ୍ତନ ଆଣିବାକୁ ଅନେକ କୋଟି ଟଙ୍କା ଖର୍ଚ୍ଚ ହେଉଛି। ମାତ୍ର ମୟୂରଭଞ୍ଜ ଜିଲା ଶୁଳିଆପଦା ବ୍ଲକ୍ରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ବ୍ଲକ୍ର ଅଁଳାକୁଡ଼ା ପଞ୍ଚାୟତର ଚକଶୁଳିଆପଦାରେ ଥିବା ଉତ୍କଳ ବନାନୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ବିନା ଅଧ୍ୟାପକରେ ଶିକ୍ଷା ବ୍ୟବସ୍ଥା ଚାଲିଛି। ମହାବିଦ୍ୟାଳୟଟି ପଶ୍ଚିମବଙ୍ଗ ସୀମାନ୍ତରେ ଥିବାରୁ ଶିକ୍ଷା ବ୍ୟବସ୍ଥା ଉପରେ ସରକାରଙ୍କ ନଜର ପଡୁନାହିଁ ବୋଲି ସାଧାରଣରେ ଅଭିଯୋଗ ହୋଇଛି l
ସୂଚନା ଅନୁଯାୟୀ, ୧୯୮୮ରେ ପ୍ରତିଷ୍ଠା ହୋଇଥିବା ଉକ୍ତ ଉଚ୍ଚ ମାଧ୍ୟମିକ ବିଦ୍ୟାଳୟରେ କଳା ପାଠ୍ୟକ୍ରମ ଖୋଲାଯାଇଛି। ବର୍ତ୍ତମାନ +୨କଳା ଦ୍ୱିତୀୟ ବର୍ଷରେ ୧୨୮ ଛାତ୍ରୀଛାତ୍ର ଅଧ୍ୟୟନରତ। ଚଳିତ ବର୍ଷ ପ୍ରଥମ ପର୍ଯ୍ୟାୟରେ ୯୮ ଜଣ ଛାତ୍ରୀଛାତ୍ର ନାମ ଲେଖାଇ ସାରିଲେଣି। ତେବେ ପରିତାପର ବିଷୟ ବର୍ତ୍ତମାନ ଉକ୍ତ ଉଚ୍ଚ ମାଧ୍ୟମିକ ବିଦ୍ୟାଳୟରେ ଆଦୌ ଅଧ୍ୟାପକ, ଅଧ୍ୟକ୍ଷ ନାହାନ୍ତି। ବ୍ଲକ୍ର ମହାବିଲା ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରିନ୍ସିପାଲ ସପ୍ତାହରେ ଦିନେ, ୨ଦିନ ଏଠାକୁ ଆସି କାର୍ଯ୍ୟ କରନ୍ତି। ବିଦ୍ୟାଳୟରେ ସମସ୍ତ ବିଭାଗ ଯଥା ଓଡ଼ିଆ, ଇଂରାଜୀ ସାହିତ୍ୟ, ଇତିହାସ, ଅର୍ଥନୀତି, ରାଜନୀତି, ତର୍କ ବିଜ୍ଞାନରେ ନିମନ୍ତ୍ରିତ ଅଧ୍ୟାପକମାନଙ୍କ ଦ୍ୱାରା ସପ୍ତାହରେ ୨ରୁ ୩ ଦିନ ପାଠପଢ଼ା ଚାଲିଛି। ସେହିପରି କିରାଣି ପଦ ଫାଙ୍କା ଥିବାରୁ ଅଫିସ କାର୍ଯ୍ୟ ଖେଳ ଶିକ୍ଷକ ସୁଜିତ ଦାସ, ସହକାରୀ ଲାଇବ୍ରେରିଆନ କମଳଲୋଚନ ସେନାପତି, ପିଅନ ଲକ୍ଷ୍ମଣ ହଁାସଦା କରୁଛନ୍ତି। ୱାଚ୍ମ୍ୟାନ ଧରଣୀ ସେଠୀ, ସୁଇପର ସଚିନ କୁମାର ସାଉ ମଧ୍ୟ ସହଯୋଗ କରନ୍ତି। ଏନେଇ ଦ୍ୱାଦଶ ଶ୍ରେଣୀର ଛାତ୍ରୀ ସୁମିତା ହଁାସଦା, ଛାତ୍ର ସାଇନିନାତ ବେହେରା କୁହନ୍ତି, ଚଳିତ ଶିକ୍ଷା ବର୍ଷ ଅଧା ଅତିକ୍ରମ କରିଥିବା ବେଳେ ପାଠପଢ଼ା ହୋଇନାହିଁ। ଫଳରେ କିପରି ବୋର୍ଡ ପରୀକ୍ଷା ଦେବେ ସେନେଇ ଚିନ୍ତା ପ୍ରକଟ କରିଛନ୍ତି। ଯଥାଶୀଘ୍ର ସ୍ଥାୟୀ ଅଧ୍ୟାପକ ନିଯୁକ୍ତି ପାଇଁ ଦାବି କରାଯାଇଛି l
ଉଚ୍ଚ ମାଧ୍ୟମିକ ଶିକ୍ଷା ପରିଷଦର ଉତ୍ତର ଓଡ଼ିଶା ଜୋନ୍ କାଉନ୍ସିଲର ଜୟଦେବ ପରମାଣିକ କହିଛନ୍ତି, ପୂର୍ବରୁ ସମସ୍ୟା ସମ୍ପର୍କରେ ଉଚ୍ଚ ଶିକ୍ଷା ବିଭାଗ ଓ ଉପଜିଲାପାଳଙ୍କୁ ଅବଗତ କରାଯାଇଛି। ଏ ନେଇ ପୁଣି ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇବେ ବୋଲି ସେ କହିଥିଲେ।
