କୋକସରା,୬ା୪(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ ଆମପାଣି ପଞ୍ଚାୟତ ସାହାଜଖୋଲ ଜଙ୍ଗଲ ମଧ୍ୟରେ ରହିଥିବା ଆଦିବାସୀ ଗାଁ ବିରିମୁହାଣ ଉଚ୍ଚ ପ୍ରାଥମିକ ବିଦ୍ୟାଳୟର ରୂପରେଖ ଦୂରରୁ ଦେଖି ଯେ କେହି ଘଡ଼ିଏ ଅଟକି ଯିବ। ଦୂରରୁ ଟ୍ରେନ୍ ସଦୃଶ ଦେଖାଯାଉଛି ସ୍କୁଲ। ସେହି ଟ୍ରେନ୍ ସଦୃଶ ଶ୍ରେଣୀ କୋଠରି ଭିତରେ ଚାଲିଛି ପ୍ରାଥମିକ ବିଦ୍ୟାଳୟ । ହୁଏତ ଆପଣଙ୍କୁ କଥାଟି ଅଡ଼ୁଆ ଲାଗିପାରେ। ହେଲେ ଏମିତି କିଛି ପରିକଳ୍ପନା କରିଛନ୍ତି ଦୁର୍ଗମ ଉପାନ୍ତ ଅଞ୍ଚଳରେ ସ୍କୁଲରେ ନିଯୁକ୍ତି ପାଇଥିବା ଶିକ୍ଷକ ଓ ସ୍କୁଲ ପରିଚାଳନା କମିଟି ।
ବିରିମୁହାଣରେ ଥିବା ସ୍କୁଲରେ ଏବେ ବିରିମୁହାଣ, କାଦୋମଲି, ଆନ୍ଧିଝରଣ, ସର୍ଗିପାଣି ଗାଁର ୧୧୩ ଜଣ ଛାତ୍ରୀଛାତ୍ର ପଢୁଛନ୍ତି। ସାହାଜଖୋଲ ଜଙ୍ଗଲ ମଧ୍ୟରେ ରହିଥିବା ବିରିମୁହାଣ ଗାଁର ଏହି ଉପାନ୍ତ ବିଦ୍ୟାଳୟ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ଶିକ୍ଷକମାନେ ମଧ୍ୟ ପିଲାଙ୍କୁ ଶିକ୍ଷା ପାଇଁ ପ୍ରୋତ୍ସାହିତ କରୁଥିବା ସହ ପିଲାଙ୍କ ପାଇଁ ପାନୀୟ ଜଳ ନିମନ୍ତେ ଆକ୍ୱାଗାର୍ଡ ଲଗାଇଛନ୍ତି। ସ୍କୁଲରେ ଶୈକ୍ଷିକ ବାତାବରଣ ପାଇଁ ଉପଯୁକ୍ତ ବ୍ୟବସ୍ଥା କରାଯାଇଛି। ବିଗତ ୨ ବର୍ଷ କୋଭିଡ ପରେ ସ୍କୁଲର ନୂତନ କଳେବର ଦେଖି ଛାତ୍ରୀଛାତ୍ର, ଅଭିଭାବକ, ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ଖୁସି ଦେଖିବାକୁ ମିଳିଛି। ଛାତ୍ରୀଛାତ୍ର ମଧ୍ୟ ଉତ୍ସାହର ସହ ସ୍କୁଲ ଆସୁଥିବା କହିଛନ୍ତି ସ୍କୁଲର ଭାରପ୍ରାପ୍ତ ପ୍ରଧାନ ଶିକ୍ଷକ ଈଶ୍ୱରୀ ପ୍ରସାଦ ଅଗସ୍ତି। ତେବେ ସ୍କୁଲରେ ପାଚେରି ନ ଥିବାରୁ ସ୍କୁଲର ପରିବେଶ ନଷ୍ଟ ହେଉଥିବା କହିଛନ୍ତି ପ୍ରଧାନ ଶିକ୍ଷକ। କୌଣସି ଅନୁଦାନରୁ ସ୍କୁଲ ପାଚେରି ନିର୍ମାଣ ହେଲେ ସ୍କୁଲ ସୁରକ୍ଷିତ ରହିବ ବୋଲି କହିଛନ୍ତି ସ୍କୁଲ ପରିଚଲାନା କମିଟିର ସଦସ୍ୟମାନେ । ଏଣୁ ବ୍ଲକ ଶିକ୍ଷା ବିଭାଗ ଏ ଦିଗରେ ଦୃଷ୍ଟି ଦେବାକୁ ଦାବି କରିଛନ୍ତି। ଏନେଇ ବ୍ଲକ ଅତିରିକ୍ତ ଶିକ୍ଷା ଅଧିକାରୀ ତଥା ବିଆରସିସି ତୋଫାନ ମାଝିଙ୍କୁ ପଚାରିବାରୁ ବର୍ତ୍ତମାନ ଦାୟିତ୍ୱରେ ଥିବା ପ୍ରଧାନ ଶିକ୍ଷକ ବିଦ୍ୟାଳୟ ଅନୁଦାନ ପାଣ୍ଠିର ସଦ୍ ବିନିଯୋଗ କରୁଥିବା ଓ ବିଦ୍ୟାଳୟକୁ ଆକର୍ଷଣୀୟ କରିଥିବାରୁ ପିଲାଙ୍କ ଉପସ୍ଥାନ ବଢ଼ିବା ସହ ଶିକ୍ଷାଦାନ ମଧ୍ୟ ଠିକ୍ ଭାବେ ହେଉଥିବା ଓ ଅନୁଦାନ ଆସିଲେ ବିଦ୍ୟାଳୟର ପାଚେରି ନିର୍ମାଣ କରାଯିବ ବୋଲି କହିଛନ୍ତି ।
