ଚମ୍ପୁଆ,୨।୯(ମହେଶ୍ୱର ଦାସ): କେନ୍ଦୁଝର ଜିଲା ଚମ୍ପୁଆ ଏନ୍ଏସି ଅନ୍ତର୍ଗତ ୧ ନଂ. ୱାର୍ଡରେ ଥିବା ଗୋଧୂଳି ଉଚ୍ଚ ପ୍ରାଥମିକ ବିଦ୍ୟାଳୟରେ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି। ଶ୍ରେଣୀଗୃହ ଅଭାବରୁ ବିଦ୍ୟାଳୟର ଛାତ୍ରୀଛାତ୍ରମାନେ ବର୍ଷତମାମ ବାରଣ୍ଡାରେ ବସି ଶିକ୍ଷା ଗ୍ରହଣ କରୁଛନ୍ତି। ରତ୍ନଗର୍ଭା ଚମ୍ପୁଆ ସଦର ମହକୁମା ଶିକ୍ଷା ବିଭାଗରେ ଏହି ବିକଳ ଚିତ୍ର ଅତି ଦୁଃଖଦାୟକ ବୋଲି ସ୍ଥାନୀୟ ବୁଦ୍ଧିଜୀବୀ ମତ ପୋଷଣ କରିଛନ୍ତି।
ସୂଚନା ଅନୁଯାୟୀ, ଗୋଧୂଳି ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୫୮ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ପ୍ରାୟ ୯୯ ଭାଗ ଆଦିବାସୀ ଶ୍ରେଣୀର ଛାତ୍ରୀଛାତ୍ର ରହିଛନ୍ତି। ୩ଟି ଶ୍ରେଣୀଗୃହ ରହିଥିବା ବେଳେ ସେଥିରୁ ଗୋଟେ ଭାଙ୍ଗି ଯାଇଥିବା ବେଳେ ଅନ୍ୟ ୨ଟିରେ ଶିକ୍ଷାଦାନ କରାଯାଉଛି। ସ୍ଥାନ ପର୍ଯ୍ୟାପ୍ତ ହେଉ ନ ଥିବାରୁ ବାରଣ୍ଡାରେ ପଢ଼ାଯାଉଛି। ଅନେକ ସମୟରେ ଭଙ୍ଗା ଘରେ ମଧ୍ୟ ପିଲାଙ୍କୁ ବସାଇ ଶିକ୍ଷାଦାନ କରାଯାଉଛି। ଏଥିସହ ଛାତ୍ରଙ୍କ ପାଇଁ ଉଦ୍ଧିଷ୍ଟ ଶୌଚାଳୟ ଭାଙ୍ଗିଯାଇଛି। ଦୀର୍ଘ ୫ ବର୍ଷ ହେବ ରୋଷେଇ ଘରର ଛପର ଗଳିପଡ଼ିଥିବା ବେଳେ ମରାମତି କରାଯାଉନହିଁ। ପ୍ରଧାନଶିକ୍ଷକ ରଞ୍ଜିତ କୁମାର ପ୍ରଧାନ କହିଛନ୍ତି, ସମସ୍ୟା ସମ୍ପର୍କରେ ଏକ ମାସ ପୂର୍ବେ ଚମ୍ପୁଆ ଏନ୍ଏସିକୁ ଜଣାଇଛି। ବ୍ଲକ୍ ଶିକ୍ଷା ଅଧିକାରୀଙ୍କଠାରୁ ଅନୁମତି ପତ୍ର ଆଣିଲେ ସମାଧାନ ପାଇଁ ପଦକ୍ଷେପ ନିଆଯିବ ବୋଲି ଏନ୍ଏସି କର୍ତ୍ତୃପକ୍ଷ କହିଥିବା ସେ କହିଛନ୍ତି। ଚମ୍ପୁଆ ବ୍ଲକ୍ ସହକାରୀ ଶିକ୍ଷା ଅଧିକାରୀ ନରେନ୍ଦ୍ର ନାଏକ କହିଛନ୍ତି, ଆବଶ୍ୟକ ଶ୍ରେଣୀଗୃହ ଅଭାବରୁ ପିଲା ବାରଣ୍ଡାରେ ବସି ପଢୁଛନ୍ତି। ବିଭାଗ ପକ୍ଷରୁ ଚମ୍ପୁଆ ବିଜ୍ଞାପିତ ଅଞ୍ଚଳ ପରିଷଦକୁ ୧ ମାସ ପୂର୍ବରୁ ସମସ୍ୟା ସମାଧାନ ପାଇଁ ଅବଗତ କରିସାରିଛୁ। ବିଜ୍ଞାପିତ ଅଞ୍ଚଳ ପରିଷଦର ସହକାରୀ ଯନ୍ତ୍ରୀ ସୁଧାକର ଦାସ କହିଛନ୍ତି, ଉକ୍ତ ଘଟଣା ବିଷୟରେ ଅବଗତ ଅଛନ୍ତି। ନୂତନ ଶ୍ରେଣୀଗୃହ ପାଇଁ ଜିଲା ଖଣିଜ ପାଣ୍ଠିରୁ ଅନୁଦାନ ନିମନ୍ତେ ପ୍ରସ୍ତାବ ଦେବା ସହିତ ଗତ ଅଗଷ୍ଟ ୨୫ରେ ୨ ଗୋଟି ଶ୍ରେଣୀଗୃହ ନିର୍ମାଣ ନିମନ୍ତେ ପ୍ରାୟ ୩୦ ଲକ୍ଷ ଟଙ୍କାର ଅଟକଳ କରାଯାଇ ଉପରିସ୍ଥ ଅଧିକାରୀଙ୍କୁ ପ୍ରଦାନ କରାଯାଇଛି। ଅନୁଦାନ ଆସିଲେ ତୁରନ୍ତ ଏଥିପ୍ରତି ପଦକ୍ଷେପ ନିଆଯିବ ବୋଲି ସୂଚନା ଦେଇଛନ୍ତି।