ଜୟପୁର,୧୭।୧୧: ଟି୨୦ ବିଶ୍ୱକପ୍ରେ ନୈରାଶ୍ୟଜନକ ପ୍ରଦର୍ଶନ କରିଥିବା ଟିମ୍ ଇଣ୍ଡିଆ ସ୍ବଦେଶ ଫେରିବା ପରେ ମଧ୍ୟ ସଂଘର୍ଷ କରୁଛି। ଅବଶ୍ୟ ବୁଧବାର ଖେଳାଯାଇଥିବା ମ୍ୟାଚ୍ରେ ନ୍ୟୁଜିଲାଣ୍ଡକୁ ୫ ଉଇକେଟରେ ହରାଇ ଦେଇଛି ଭାରତ। କିନ୍ତୁ ୧୬୫ ରନ୍ର ପିଛା କରୁଥିବା ଘରୋଇ ଦଳ ଏକଦା ସୁବିଧାଜନକ(୧୦୯/୧) ସ୍ଥିତିରେ ଥିଲା। ତଥାପି ମ୍ୟାଚ୍କୁ ଜିତିବା ପାଇଁ ଭାରତୀୟ ଦଳକୁ ୧୯.୪ ଓଭର ପର୍ଯ୍ୟନ୍ତ ଲଢ଼େଇ କରିବାକୁ ପଡ଼ିଥିଲା। ଏହି ବିଜୟ ସହ ଭାରତୀୟ କ୍ରିକେଟରେ ନୂଆ ଯୁଗ ଆରମ୍ଭ ହୋଇଛି।
ଟିମ୍ ଇଣ୍ଡିଆକୁ ଭଲ ଆରମ୍ଭ ଦେଇଥିଲେ ଅଧିନାୟକ ରୋହିତ ଶର୍ମା ୪୮ (୫ ଚୌକା ଓ ୨ ଛକା) ଓ ସୂର୍ଯ୍ୟକୁମାର ଯାଦବ ୬୨ (୬ ଚୌକା ଓ ୩ ଛକା)। ଦଳ ୧୩ ଓଭର ସୁଦ୍ଧା ୧ ଉଇକେଟ ୧୦୮ ରନ୍ କରିଥିଲା। ମ୍ୟାଚ୍ରେ ଶେଷ ଆଡ଼କୁ ଟ୍ରେଣ୍ଟ ବୋଲ୍ଟ (୨ ଉଇକେଟ), ଟିମ୍ ସୌଦି ଓ ଡାରଲି ମିଚେଲ ଗୋଟିଏ ପରେ ଗୋଟିଏ ଉଇକେଟ ନେଇ ମ୍ୟାଚ୍ରେ ନ୍ୟୁଜିଲାଣ୍ଡ ପାଇଁ ସମ୍ଭାବନା ସୃଷ୍ଟି କରିଥିଲେ। କିନ୍ତୁ ଚୌକା ମାରି ମ୍ୟାଚ୍ ଭାରତକୁ ଜିତାଇ ଦେଇଥିଲେ ରିଷଭ ପନ୍ତ।
ପୂର୍ବରୁ ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ନ୍ୟୁଜିଲାଣ୍ଡକୁ ପ୍ରଥମ ଓଭରରେ ବଡ଼ ଝଟକା ଦେଇଥିଲେ ଭୁବନେଶ୍ୱର କୁମାର। ଏହାପରେ ମାର୍ଟିନ ଗୁପଟିଲ ୭୦ (୩ ଚୌକା ଓ ୪ ଛକା) ଏବଂ ମାର୍କ ଚାପମ୍ୟାନ (୬୩ ରନ୍, ୬ ଚୌକା ଓ ୨ ଛକା) ଦର୍ଶନୀୟ ଅର୍ଦ୍ଧଶତୀୟ ଇନିଂସ ଖେଳିଥିଲେ। ଦୁହେଁ ଦ୍ୱିତୀୟ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ିଥିଲେ ୧୦୯ ରନ୍। କିନ୍ତୁ ୧୪ ତମ ଓଭରରେ ଅଶ୍ୱିନ ଦୁଇ ଉଇକେଟ ନେବାରୁ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିଥିଲା ଭାରତ। ବୋଲିଂରେ ଭୁବି ଓ ଅଶ୍ୱିନ ୨ ଉଇକେଟ ନେଇଥିଲେ।