ସିଡ୍ନୀ, ୨୩।୧୦-
ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ପରେ ଭାରତୀୟ କ୍ରିକେଟ ଦଳ ଅଷ୍ଟ୍ରେଲିଆ ଯିବ। ସେଠାରେ ଦଳ ପ୍ରଥମେ ସିଡ୍ନୀ ଓ କାନ୍ବେରାରେ ୩ଟି ଲେଖାଏ ଏକଦିବସୀୟ ଓ ଟି୨୦ ମ୍ୟାଚ ଖେଳିବ। ଅଷ୍ଟ୍ରେଲିଆରେ ପହଞ୍ଚତ୍ବା ପରେ ବାଧ୍ୟତାମୂଳକ କ୍ୱାରାଣ୍ଟାଇନ୍ ସମୟରେ ଟ୍ରେନିଂ ପାଇଁ ନ୍ୟୁ ସାଉଥ୍ ଓ୍ବେଲ୍ସ ସରକାର ଅନୁମତି ଦେବାପରେ ଏହି ନିଷ୍ପତ୍ତି ନିଆଯାଇଛି। ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରୁ ଭାରତୀୟ ଓ ଅଷ୍ଟ୍ରେଲିଆ କ୍ରିକେଟ ଦଳ ଏଠାରେ ପହଞ୍ଚତ୍ବା ପରେ ଟ୍ରେନିଂ ପାଇଁ ଅନୁମତି ଦେବାକୁ ନ୍ୟୁ ସାଉଥ୍ ଓ୍ବେଲ୍ସ ସରକାର ଓ କ୍ରିକେଟ ଅଷ୍ଟ୍ରେଲିଆ ମଧ୍ୟରେ ଚୁକ୍ତି ହୋଇଛି। ପ୍ରକାଶ ଯୋଗ୍ୟ ଯେ, ଭାରତୀୟ ଦଳ ୟୁଏଇରୁ ସିଧା ବ୍ରିସ୍ବେନ୍ ଯିବାନେଇ ପୂର୍ବରୁ ପ୍ରସ୍ତାବ ଥିଲା। ମାତ୍ର କୁଇନ୍ସଲାଣ୍ଡ ରାଜ୍ୟ ସ୍ବାସ୍ଥ୍ୟ ବିଭାଗର ଅଧିକାରୀମାନେ ୧୪ ଦିନିଆ କ୍ୱାରାଣ୍ଟାଇନ୍ ନିୟମରେ କୋହଳ କରି ବିରାଟ କୋହଲିଙ୍କ ଦଳକୁ ଟ୍ରେନିଂ ପାଇଁ ଅନୁମତି ଦେବାକୁ ରାଜି ହେଲେ ନାହିଁ। ଅଷ୍ଟ୍ରେଲିଆ ଗସ୍ତରେ ଭାରତ ପ୍ରଥମ ଦୁଇଟି ଦିନିକିଆ ନଭେମ୍ବର ୨୭ ଓ ୨୯ରେ ସିଡ୍ନୀ କ୍ରିକେଟ ଗ୍ରାଉଣ୍ଡରେ ଖେଳିବ। ଅନ୍ତିମ ମ୍ୟାଚଟି କାନ୍ବେରା ମାନୁକା ଓଭାଲରେ ଅନୁଷ୍ଠିତ ହେବ। ସେହିପରି ସିରିଜର ପ୍ରଥମ ଟି୨୦ ମ୍ୟାଚ କାନ୍ବେରାରେ ହେବାପରେ ଅବଶିଷ୍ଟ ୨ଟି ମ୍ୟାଚ ସିଡ୍ନୀରେ ଖେଳାଯିବ।
ସୀମିତ ଓଭର ସିରିଜ ପରେ ଫ୍ଲଡ୍ଲାଇଟରେ ପିଙ୍କ୍ବଲ ଟେଷ୍ଟ ଡିସେମ୍ବର ୧୭ରୁ ୨୧ ଆଡିଲେଡ୍ରେ ଅନୁଷ୍ଠିତ ହେବ। ବକ୍ସିଂ ଡେ’ ଟେଷ୍ଟ ଡିସେମ୍ବର ୨୬ରୁ ସେହି ଆଡିଲେଡ୍ରେ ଖେଳାଯିବ। କୋଭିଡ-୧୯ ସ୍ଥିତିକୁ ଦୃଷ୍ଟିରେ ରଖି ମେଲବୋର୍ନ କ୍ରିକେଟ ଗ୍ରାଉଣ୍ଡ(ଏମ୍ସିଜି)ରେ ଏହି ଟେଷ୍ଟ ହେବନାହିଁ ବୋଲି ନିଷ୍ପତ୍ତି ହୋଇଛି। ନୂଆ ବର୍ଷର ଟେଷ୍ଟ ସିଡ୍ନୀଠାରେ ଜାନୁୟାରୀ ୭ରୁ ୧୧ ପର୍ଯ୍ୟନ୍ତ ଏବଂ ୪ର୍ଥ ତଥା ଅନ୍ତିମ ଟେଷ୍ଟ ବ୍ରିସବେନ୍ରେ ଜାନୁୟାରୀ ୧୫ରୁ ଅନୁଷ୍ଠିତ ହେବ। କାର୍ଯ୍ୟସୂଚୀକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଅନୁମୋଦନ କରିବାପରେ କ୍ରିକେଟ ଅଷ୍ଟ୍ରେଲିଆ ଆନୁଷ୍ଠାନିକ ଭାବେ ଏହାକୁ ଘୋଷଣା କରିବା ଅନୁମାନ କରାଯାଉଛି।
