ବେଙ୍ଗାଲୁରୁ,୧୪।୩: ଏମ୍. ଚିନ୍ନାସ୍ବାମୀ ଷ୍ଟାଡିୟମରେ ଶ୍ରୀଲଙ୍କା ବିପକ୍ଷରେ ଅନୁଷ୍ଠିତ ଦିବାରାତ୍ର ଟେଷ୍ଟକୁ ଭାରତୀୟ ଦଳ ୩ ଦିନ ମଧ୍ୟରେ ଜିତି ନେଇଛି। ଦ୍ୱିତୀୟ ଟେଷ୍ଟରେ ରୋହିତ ଶର୍ମାଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ୨୩୮ ରନ୍ରେ ଶ୍ରୀଲଙ୍କାକୁ ହରାଇ ଦେଇଛି। ଏଥିଯୋଗୁ ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍କୁ ଭାରତ ୨-୦ରେ ପୋଛି ନେଇଛି।
ପ୍ରଥମ ଇନିଂସରେ ଭାରତୀୟ ଦଳ ୨୫୨ ରନ୍ କରିଥିବା ବେଳେ ୧୦୯ ରନ୍ରେ ସୀମିତ ରହିଥିଲା ଶ୍ରୀଲଙ୍କା। ଦ୍ୱିତୀୟ ଇନିଂସରେ ଭାରତ ୩୦୩/୯ରେ ପାଳି ଘୋଷଣା କରିବାରୁ ଭ୍ରମଣକାରୀ ଦଳ ଆଗରେ ଛିଡ଼ା ହୋଇଥିଲା ୪୪୭ ରନ୍ର ବିଶାଳ ଟାର୍ଗେଟ। କେବଳ ଅଧିନାୟକ ଦିମୁଥ କରୁଣାରତ୍ନେ (୧୦୭) ଓ କୁସାଲ ମେଣ୍ଡିସ(୫୪)ଙ୍କୁ ଛାଡ଼ି ଦେଲେ ଅନ୍ୟ କେହି ଭାରତୀୟ ବୋଲରଙ୍କୁ ଉଚିତ ମୁକାବିଲା କରିପାରି ନ ଥିଲେ। ଫଳରେ ଶ୍ରୀଲଙ୍କା ଦ୍ୱିତୀୟ ଇନିଂସରେ ୨୦୮ ରନ୍ରେ ଅଲଆଉଟ୍ ହୋଇଯାଇଥିଲା। ଭାରତ ପାଇଁ ରବିଚନ୍ଦ୍ରନ ଅଶ୍ୱିନ ୪ ଉଇକେଟ ନେଇଥିବା ବେଳେ ଯଶପ୍ରୀତ ବୁମରା ୩ ସଫଳତା ହାସଲ କରିଛନ୍ତି।