ବରଗଡ଼ ଅଫିସ୍,୨୩।୫: ରାଜ୍ୟ ମନ୍ତ୍ରିମଣ୍ଡଳ ପୁନର୍ଗଠନରେ ବରଗଡ଼ ଜିଲା ଭଟଲି ବିଧାୟକ ସୁଶାନ୍ତ ସିଂଙ୍କୁ ମନ୍ତ୍ରୀପଦ ନ ମିଳିବାରୁ ତାଙ୍କ ସମର୍ଥକ ମହଲରେ ଅସନ୍ତୋଷ ପ୍ରକାଶ ପାଇଛି। ଏ ନେଇ ଜିଲା ଯୁବ ବିଜେଡି ସଭାପତି ପ୍ରଦ୍ୟୁମ୍ନ କୁମାର ତ୍ରିପାଠୀ ନିଜ ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି, ଦଳ ପାଇଁ ସୁଶାନ୍ତ ଦିନରାତି ପରିଶ୍ରମ କରୁଛନ୍ତି। ପ୍ରତ୍ୟେକ ଉପନିର୍ବାଚନରେ ସେ ତାଙ୍କ ଦକ୍ଷତା ପ୍ରତିପାଦିତ କରି ସାରିଛନ୍ତି। ମନ୍ତ୍ରିମଣ୍ଡଳ ପୁନର୍ଗଠନରେ ସୁଶାନ୍ତଙ୍କୁ ମନ୍ତ୍ରୀପଦ ମିଳିବ ବୋଲି ବରଗଡ଼ ଜିଲାରେ ଦଳର ସମସ୍ତ ଯୁବ, ଛାତ୍ର, ମହିଳା କର୍ମୀଙ୍କଠାରୁ ସାଧାରଣ ଲୋକେ ଆଶା ରଖିଥିଲେ। ମାତ୍ର ତାହା ନ ହେବାରୁ ସମସ୍ତଙ୍କ ମନ ଖରାପ ଅଛି। ଦଳର ସଭାପତି ତଥା ମୁଖ୍ୟମନ୍ତ୍ରୀଙ୍କ ତାହା ବ୍ୟକ୍ତିଗତ ନିଷ୍ପତ୍ତି। ତାକୁ ସମସ୍ତେ ସ୍ବୀକାର କରିବା ସହିତ ସମ୍ମାନ ଦେବାକୁ ପଡ଼ିବ। କିନ୍ତୁ ସୁଶାନ୍ତ ସିଂଙ୍କ ଭଳି ନେତାଙ୍କୁ ଅବହେଳା କରା ନ ଯାଉ, ତାଙ୍କୁ ଅବହେଳା କରାଗଲେ ତାହା ଦଳ ପାଇଁ ହିଁ କ୍ଷତି ହେବ ବୋଲି ତ୍ରିପାଠୀ କହିଛନ୍ତି। ତେବେ ସୁଶାନ୍ତଙ୍କ ପ୍ରତି ଦଳରେ ଅବହେଳା କରାଯାଇଛି କି ବୋଲି ପଚାରିବାରୁ ଅବହେଳା ନା ଚକ୍ରାନ୍ତ, ସେ ନେଇ ସମସ୍ତେ ଦ୍ୱନ୍ଦ୍ୱରେ ଅଛନ୍ତି। କାରଣ ମୁଖ୍ୟମନ୍ତ୍ରୀଙ୍କ ଗୁଡ୍ ଲିଷ୍ଟରେ ସୁଶାନ୍ତ ଅଛନ୍ତି। ସେହିପରି ମନ୍ତ୍ରିମଣ୍ଡଳ ପୁନର୍ଗଠନ ପୂର୍ବରୁ ଗଣମାଧ୍ୟମ ସମ୍ଭାବ୍ୟ ତାଲିକାରେ ମଧ୍ୟ ସୁଶାନ୍ତଙ୍କ ନାମ ଆସିଥିଲା ବୋଲି ତ୍ରିପାଠୀ କହିଥିଲେ।